Mumbai Tuisunsuo 29/03/09 Vol 1 Issue 29

HMANGAINA THLANTUI

Stephan C. Hmar

Ni khat chu room sunga inthungin ramtin ka ngaituo a. Chuonglai chun, nisa intrengtak chun kan room zawn chu indawi lek lovin a hung em a. Room chu a suk lum zuol a, ka thlantui a suk far truk truk a. Ka thlantui far tin chun nu-le-pa ha’n an nauhai an siem puithling tumna leia harsat mangang thlantui an lo seng nasat dingzie a mi’n hriet zuoltir a. Nu-le-pa hai lo hlutzie le an aiaw theitu ding an um nawzie hriet zuol na’n a mi hluobit ta ringawt el a.

Nu-le-pa hai pawimawzie hriet zuolna dingin hei sui inthuk met ei tih. Pathienin mihriem a siem dan hi, thilsiem danghai nekin a danglam a. A hnara Ama hringna thuok ngei an thuok lut a nih. Hi lei hin, mihriem chu mihring, ngaituona inthrangpei thei nei a hung ni ta a. Nisienlakhawm, Pathienin mihriem ngaituona lungril a pek hi, tedawng tak el, a mihriem vekin a siem changkang pei a tul thung tlat. Hi lungril tedawng tak siem changkangna sin, thlantui far zawi zawi khawpa lo thaw hmasataktu chu ei nu-le-pa hai an nih.

Ei hung piengtlak hlim khan lungril ngaituona mumal bo der ei na, tap khek chau naw chu hriet ei nei nawh. Sienkhawm, Pathienin nu-le-pa hmangin, A hmangaina a hung suklang a. Chun-le-zuo’n duot em em in, an mi enkawl a. Damdawi tha tha ei sakruong nalin, puonlum tha tha an min siltir a. Ei nuhai lem hi chu an sawl zuol a nih. Inrim taka thla tam an mi pai hnungin, an nenetui hlutak an mi la hei innektir nawk ta pei. Taksa mumal khawm putzo lo hielin, nuhai chun an taksa vitamin le mineral tha tha chu phal takin an min nektir hlak a nih.

Ei nu le pa sininrim ra chu ei chunga chun a hung inlang pei a. Ei lungril ngaituona inthangin, ei taksa rurelhai a hung inthanglien pei a. Hi khawm hi dittawk lovin, ei lungril ngaituona chu hma a sawn zuol peina dingin inchukna sikula hai, tha le zung, pawisa tamtak sengin an min kaitir nawk ta pei. Lungril mi petu Pathien le, chu lungrilin, hrietna le varna thalem a nei theina dinga, theitawp suotu nu pa hai hlutzie hi chinlem bova tlangau pui tlak takzet a nih. Mumbai-a ei hung tlangtla theina khawm anni inrimra lei lieu lieu a hung ni ta pei.

Tuhin thil iengkim a danglam lemna, thil changkang lemna hmun Mumbai-a ei um a. Pawisa le thil dang dang, a tam am a tlawm am, hlaw suok thei in ei um ta. Ei nu-le-pahai inrimna ra vawng a nih. Naute, lungril mumal neilo ei ni laia inthawka Pathien hmangaina ei chunga inlangtir hmasataktu ei nu-le-pa hai hlutzie hi iengkhawmin mi’n theinghiltir naw sien nuom a um takzet.

Ei Prime Minister hmasatak Jawaharlal Nehru kha entawn tlak tak a nih. India rama piengin, England rama thiemna an chuk a. India le saaphai nunphung inkawpin a hringnun kha a hmang a nih. Sienkhawm a sika ngirngam a nu piengna India ram baka ngainat lem a nei thei nawh.

Hienga nu-le-pahai thlantui hlutzie ei ngaituo chang hin, hnuoia hung tum Isu Krista’n rinumna tamtak tuora, thlantui thisen ang hiela fara inthlanna sin a hung thaw hlutzie hriet suok naw thei an ngai nawh. Chawimawi nghawklo, ropuina Lalpa’n rinum tinreng thina chen a hung tuor muolsuo leia beisaina nei thei chau ei nih. Gethsmani-a ei Lalpa thlantui kha theinghil ngai nawng ei tiu. Mahatma Gandhi-in, “Tukhawm sakhuona neilo chu tuipui tui a’nthawka tui farkhat lak dawk ang a nih. Boral ngei a tih”, a lo ti angin A thlantui le thisen kingna sakhuoa hin ngirdet tlat ei tiu. Hlawtlingna le damna a um.

Khawvel le vana hmun ei chang theina dinga hmangaina thlantui, ei ta ding lieu lieu a suk suoktu hai hi innghil ngai nawng ei tiu.