Thursday, May 8, 2014

BAT PAHNIHAI (HMAR CHRISTIAN FELLOWSHIP MUMBAI 7TH FOUNDING DAY)

By: Lalrothang Tusing

Ahmasa takin kum sari chen tlung thei dinga mi ṭhuoitu ei Lalpa hmingin chibai. Kum 2008 laia ei hnam hming ngei chawia inkhawmna ei hang ṭan tir lai ngaituo chun hma ei sawn ve ṭhet ṭhetin an langa hmatieng peia khawm Pathienin ami la ṭhuoi zawm pei ei beisei bawk anih. 1st Anniversary ei hmang ṭum khan HCFM hung inṭan dan kimchang takin ka zieka, tu ṭum hin chun a kip-a-kawia hung thursuok ka tum ta nawa. Pathien zara hun ṭha ei la hmu nawk pei ani chun, kum sawm am sawmhni am, chu huna chun kimchang nawk zuola ziek dingin ka lo insingsa lem anih. Chu bâka Secretary a’nthawk khawma report a hung pek tho ding ani leiin tuta ṭum chu ei hung inṭan danhai iengkhawm hung thursuok ka tum hran naw anih.
Awleh, ei thupui hang lut inla, mihriem hi khawvel var ei hung hmu charin bat ieng amani tak ei nei nghala. Tlâkna leilung le seilienna dungzuin ei bathai chu an chennaw rup ei thei. Amiruokchu bat anthawka fihlim tukhawm ei um bîk nawh. Ei bathai hi sil-le-puon le tangka khawm anlo ni kher kher naw thei. Bat ngaisak mi ei ni le ninaw chu mani nekin ei batna haiin an mi hriet chieng lem hlak. Bat rul hi mawphurna le phurrika ei ngai am ti chu mani chunga innghat a nih. A la un deu le zelthel deu khawm um bawk ei tih. Bat ngaisak le ngaisaknaw hi mihriem mizie le nunphung inkhina ani rawp hlak. Mi, ieng anga insukngup le titak mut khawm, bat ngaisaklo mi chu hnung tienga nui- êu hlawna chauh a nih.
Fâk zawngna le insung harsatna leia kawrawnghai sukbit tumin khuol rama awinawtuhai laia khawsa dingin “Liendo Thlang det a “ ti angin ei thlangtla peia. India Hmar-sak rawt a’nthawkin tlâk tieng panin Arabian tuipui hrula ei zun sungbum phar a.A ram mihai le hang enkhi chun vaak hawnlaia tuiva-arngo ang hiel deu thawa thlir hrang awlsamin ei um a. Piengken le sakruong a hlak chu ruol banlo hang ti em chi chu an naw de khawmin a hnung thuol pawl ti thei chu ei nih. A ram mihai le chu sakhuona inanglo, hnam nunphung khawm inang bawklo, fâk-le du zawng dangdai bawk, châng dan le hawiher chena khawm zierâng inhnaina neilo hrim hrim ei ni sih. Sienkhawm insung khawsakna tlawma eilo sawk zangkhai tak duoi rawi mawh tia chuongang danglamna popo khawm chu haiderin ei sepui raw do fan fan hlaka. Pathien hring neitu ei nina zarin le ei harsatna hrezingin chuong harsatna tlâmpuihai chu ka sawl ka kham khawm ti thei loin ei tuor ṭawk ṭawk pei bawka. Hiengang harsatna ngawpui le thlipui nuoivelna paltlang dingin hin ei hringnun a thar a thara Pathien anthawkin incher thar pei ei pawimaw zing anih. Chuong niloa ei harsatna le retheina hai ei inchalrempui el chun ei hmelma lientak satan suklawm hle pal ei ti inlau a uma, chu ruol ruol chun ei hnam nunphunghai chen vuoi ripna thei anih.

Mani in lum makasana kawr le vaihai laia ei khawsakna a hin ei ringtu nina ei inphat hlek ding an nawa. Chu nek hman hmanin cheldet sau sau lem a ei hnam nunphung vawnghimna kawnga khawm ei theina zawn senga hmangruo pawimaw ni ei tum pei bawk ding a nih. Nu-le-pa, sung-le-kuo le khuo-le veng hai hmu phaknawna rama ramṭang ni inla khawm a pawimaw tak lai pakhat chu ei puonri hai intawm meua ei fe nasan a hin chieng taka intuk nghet ding ei nih. Mani nuom zawnga inlap rak raka a thli fena tienga tienga inlên el ding chu ei ni nawh. Iengkim ei thawna taphawta ei ringtu nina mihai hmu le thiem-thei dinga suklang ding ei ni bawk. “ Be a Roman when you are in a Rome” ti hi a ṭhat lai zingin a zo-a-zai chun a ṭha vawng kher nawa, ringnawtu hai thlêk dan anga ei nun ei khalve pei chun boralna lampui ei hraw mek alo ni zing ding anih. “ Joshua 1:8 “ Hi dan bu hin I bau chu suoksan hlek naw sienla, chu thuziekhai po po chu I zawm tlat thiena dingin sun le zan in I ngaituo ding a nih, chuongchun I lampui chu suktluon pei I ta I hung hlawtling pei ding anih”, a ei hmu ang in khawlai hmuna khawm ei ringtu nina cheldeta ei lampuihai suktluontu dingin Pathien ei ko zing a pawimawi a nih. Ringtu inti seng seng khawm kawr le vai le saphai le chu Pathien ei inpâk nuom dan a lo indanga. Eini hai chun Independent hla nguoi ruoia khuong le hang sakhai hi inhawi ei tia ei thlarau khawm a chawm deu niin ei hriet bawk.  Hienglai zing hin ei hnam aidentiti khawm vawng zinga Pathien-in ṭawng le hnam neia a mi’n duong ani ang hrimin, chu humhimna le ringum taka a hnung zui hi Lalpa ei bat ani meu sia.

Khawlai hmuna um inla khawm siemtu Pathien-in hnam pakhat ni ve dinga a mi’n dinna hi hre zinga ei ṭawng ngeia ama ei chawibîkna hi ei bat lien tak ani ti hi a nawn a nawna in hril hriet pei ei ṭul a nih. Hmar Christian Fellowship, Mumbai hi Pathien thlarau-in umpui zing ding ditsakna ka hung inhlan cheu.

                                                                                            (chris2ktusing@yahoo.co.in a contact thei anih.)

No comments:

Post a Comment