Monday, September 29, 2008

Mumbai Tuisunsuo 28/09/08 Vol 1 Issue 5

KAN KHUOLNA LE KAN ZINNA RAM

-Jim D. Gangte

Kum 197... a inthawk khan hi khawvel rinumtaka ka khuolzin chu ka lo tan ve der el ta a. Hrieklawk, hmulawk ieng khawm um loin, in riengtak le invai takin ka lo fe ve nak nak a. Beiseina le tum bik nei loin, mihriem duthusam na rama ka loin khuol ve hlak a. Khawvel hi a lo va lienin a lo ropui ngei, kei ang mihriem teplo tak ta ding lem chun a ropui zie chu ka ngaituonain a suongtuo phak reng reng nawh. Hi khawvel mipui tam tak lai chun ka hang thang ve el chu a na tiin iemmani chang chu ka ngai a tha viu hlak.Khawvel par thlanin, ka thei tawpin in khuol nhget thlat ka tum a. Ka ngaituona popo ka seng ve hlak a, an hawi in a ropui de aw khuonu ram ngei hi chu.

Nisienlakhawm, hun la ni hai a hungin her liem pei a, kum hai a fe pei ang chun, kei khawm ka lo puitling ve pei a. Ka khawvel hmu dan hai khawm a lo danglam oei a, hmaa khawvel ropuina ka zawng le ka hnawt lawp lawp hai kha, tu hlak hin iengma lo el a nih ti ka hung hriet ta deu deu a. Khawvel ropuina, mawina, thilthawtheina popo hai hi ka dam sung hhnawt lang khawm ka hnawt phak naw ding ti ka hriet chieng ta a, Inkhuol tum khan, inkhuolna hlak an nawh ti ka hung hriet a.Khawvel hi a hoin, a tawpin chatuon ram a ni naw zie ka chieng deu deu a. Kum tamtak hnungin hi hi a nih ka thu tawp na chu...

1) Khawvel hi chatuon ram an nawh :

Hla phuoktu chun" Hi hnuoi ram mi ei ni nawh, khuolzin fe mek lai ei nih" a lo ti a. Hi khawvel hi eiin zinna ram a nih ti hi ei chieng seng ka nuom. Ram inhawi lem, chatuon ram ei pan mek lai hin, suol thil hai bansan in, khawvel mawina a inthuom loin a mi siemtu ditzawngin ei nun hai hmang seng ei tiu.

2) Mihriem hringna hi hlobet par ang chau a nih:

Chatuon ram mi eini naw leiin, ei khawvel hring nun hi a tawp hun la um ngei a tih." Damsung tawite hmang dingin saruokin ei pieng a" hla phuoktu chun a lo tih, chu lei chun, ei nitin hun hmang dan hi, ei sin hai a, ei umdan kawng tinrenga, vawisun bak chu chance nei ta nawng ka tih tiin, ei thil thaw ta phawt a, ei thaw tawpna ang dingin ei thawng ei tiu. Thiltha thaw hi bansan nawng ei tiu.

3)Khawvel le Mihriem tawpna chu Pathien a nih:

Iengpo hrilin,thawin, ngaituo hlakin la khawm, khawvel le mihriem ta ding hin chu, Pathien hi ei tawp na a nih. Ei vanglaini, hratlai le thatlai ni hai a hin Pathien hre loin, inphatsanin, mamaw naw angin um hlak in la khawm, nikhat chu ei lungngaiei beidawng tawpkhawk ni la hung tlung a ta, chu hun a chun a nih, fe na ding dang umloin, ei thu ni loin Pathien kuma bawk ei lan tal lut tho tho ding a nih. Chu lei chun, unau, khawvela hin hun sawt naw te ei nei, ei hun iengtin am hmang pei ei tum a? Hun ei la nei, kirin,simin ama kuomtieng pan ei tiu. Zinga hun la um thou a tih (You don't have the promise of tomorrow) ti naw rawh, tuhin, vawisun hin Pathienin hun a mi pek.

Ram nel umlo, khawvel hringnun ram hi suoksan dingin in puocha seng ei tiu. Pathienin malsawm raw se che. ( Hi article i tiem lai hin, ngaituona iemani chu i nei ngei ka beisei, Pathien le in inkar thu khawm a ni el thei, baw zui nghal rawh, insir naw tawp i tih.)

"Only One Life
T'll soon pass away
But only what's done for Christ
Will Last."



Editorial

Ei hriet seng ta angina a nikhat laia ei unaupa Stephan a pa’n alo boral na le inzawm khan tlawmngai hi ei vawng zing chu alo va trul de aw. Tu mi lakpek theilo ei pi le pu hai ro hlutakel tlawmngaina, hilai Mumbai khawpui hin nasa nawk zuol hin ei phur suok pei chu thil mâkmaw anih. Thratni hi chu ei tuok vawng kher naw khawma mihriem a tunga ngir taphawt chun sietni ruok hi chu fûr le thlasik inkhel lo ding ang thoa ei tuok seng ding anih. Ka sawl ka kham tah, ti el lova mi popo sawl ta hnunga la thaw trang trangna ram hi ani tlawmngaina ei I ti tak chuh. Mi thaw chen chen char thaw kha tlawmngaina ala tling phâk nawa, mani si-le trha hrietna leia thaw chau ani lem. Chu niloa inhlemna dinga zawnga suonlam siema pum tuok ringawt lem hi chu abila tho lo, a muol muola inhmang an ni tawp el anih.

Ei hun awl nei dân chu veng le Mumbai chu tekhi ruol ni hlawl naw nih. Veng tieng chu hun awl ei neirawna: khawlai lengna ding, mithi in lengna ding, hla pawl inchûkna ding le hun thawveng dang dang hai. Amiruokchu Mumbai khawpui-a ruok hin chu a chintak a’nthawka a lientak chen mani hun pal seng hi ei ditkhawp naw tawl hle. Hun siemtu’n hin mitin kuoma a dingin nikhata darkar 24 seng ami pek hi eini Mumbaikars hai tading chun darkarhni (2Hrs) mi belsa pek the ihram sien ei nuom rum rum el hlak anih. Ani ngei hun hi a pawimaw a hmang thiem khawm a trul hrim anih. Hun vawng diklo ti damhi chu mani mani inhlemna chau niloin mi hun inruk pek ani leiin rukru trium tak ang tluk anih. Chuchu ei hun hmang inbichil dân ei hei belsa zawk anih.

Hieng hi Mumbai khawsunga ei hun intertap dân chu ani a. Chulai zing chun ei umna hai an kâr-in-kîk thei bawk a pawimaw hle naw lem hin chu inpan vel ti khawm hi thilharsa chu ani takzet. Mumbai Hmar Welfare alo um tran ta a chun an thlawppui ding ruol thratak Hmar Christian Fellowship a hung pieng nawka siet le thrat ei tuok chang khawm tlawm chun inko bûm khawm a suk awlsam pha sawt niin an lang. Karkhat a chawl ei nei sun Pathienni hin inkhawm dingin ei fe khawm tawl mar mar a eiin hmu khawm hin ruolthar dam ei siem a thil hlimumtak chu anih. Khawpui a chu Biekin hin information role khawm tamtak a play hlaka inkhawm khawm ngaitha el chi chu ni hlawl lo anih. Thil hrim hrim chu ngai pawimaw le pawimawnaw kar hi a hla hlaka hun ei siemrem dan khawm hi ei ngaipawina lienko a innghat vawng chu alo nih. Mi tukhawm hun awl hau bîk hrim hi an umnawa chu nek hman chu ei ngai pawimawna hin a bûkrik lem hlak anih. Hi le inzawm pei hin tu el hin la zuk tuok inzawm zut el naw inla khawm nakie tieng chu nat le sat thil ah cham le chamlova inko bûmna eila hung tawng pei ding chu anih.

Mi’n thawhai sien kei lo awl hadam lang ti hi iengtik lai khawma hmelma trium ani ti hi ei hriet tasa lo nisienkhawm chieng taka ngaituo thar nawk rawp hlak ding chu alo nih.


TUOLSUNG CHANCHIN

## Ei Welfare Secretary Pu Stephan C Hmar,lusun na lei-a Tuithaphai(Churachandpur) a hun iem-a-ni chen hang cham chuh 27th Sept 2008 inrinni khan damtakin Mumbai khawpui a lo hung tlung nawk tah.Veng tieng sung-le kuo haiin lusunna thu-ah la thlakhla hle hai sien khawm,Mumbai tieng sin le insung thil-ah tulna tamtak a nei leiin,chamsawt thei lova hung kir nawk anih. Lusun sungkuo hai ei tawngtaina-ah la hre zing ei tieu.

## Tv Joseph L Joute khawm thlatin-a landlord hai leh rent chuongchang thu-ah in kei buoi tul ta lovin Mulund-ah quarter 1 BHK a hmu-a chu,Kalina mi le sa,a biekin Lanu hai hawiher mawi la thlakhla leiin a in hmu hi a hnawl.

##Nilaini 24th Sept 2008 khan Upa Paulienmang, Pi Siemvel, Pi Nieng le Pi Rohluopui hai chun Mumbai sawttak an mi uop hnungin,Tuithaphai panin an lo kir tah.Mumbai haiin ei ngaihlea, abik takin ei upapa Paulienmang lem hih chuh Fellowship le Welfare min hlan pek tu a ni el bak-ah ,ser-le-sang thil-ah ei hmang tak ani leiin eiin pam hle.

##Ei Editorial Board member Tv Jacob Shakum khawm natna leiin ni thum zet sie-khawn thei lovin a laikhum sang a bel.Chuong ang bawkin ei Editorial Board member Tv(eh...) Pu Lalthakhum(Buonga) khawm Assistant Commandent,UPSC hnuoi-a exam dingin tuva kar po po chuh Kolivery kawtthler hmu hman meu lek lovin an puo cha.

## Ei IFS kumhlun(Lt Lathanzau Pudaite) nau mi tlumtak Tv.Peter Pudaite khawm tulai hin Mumbai-ah hungin zin zawk chuh a pa lo boral sanna thu-ah chamsawt hman lovin Aizawl tieng a lo liem nawk tah.

## Tv Luv John ,Mumbai Talkies a inlartak, ni khat lai-a birthday lawm le inchong pa khan,lanu sms inchat lova dawng thei ta dingin le a hello nuom hai ta dingin Biekna khawl(Cell phone) tharhlawk le Number thar a lo nei tah.Hi taka hin aw....9769871865....confirm Number: 9769871865

## Ei Editorial Board member Tv Daihmingthang Pudaite khawmin,ni tin tin a,vai daba-a fak le dawn in-nghat tul ta lo chuh thukhat, a nuom hun hun a, Lanu a tu tu khawm a inah in lawi thei ta ding le fak-le-dawn hnieng hnar taka hrai thei ta dingin,Gas stove/connection thar a lo nei tah. Mi ringum taka inthawka chanchin ei lo dawng danin,Kolivery lanu then lem chuh a lo fiel der ta nieng a tih.

##Tuta pathienni hmasak tarik 21st Sept, 2008 khan, Manipur Civil Service(MCS) chu mi tamtakin in Imphal hmun-ah exam an pek.HSA member ngei khawm thahnem fe in exam an pek ve ti chanchin ei lo dawng.


TAWNGBAU

## Kolkata ka um lai-a ka thilthaw thatak nia kala hriet zing chu ka pi thawlawm ding chengruk(Rs6) ka thawn kha la ni’ng atih.
Tv Lalthasang

## Lalruotkim, na’n thri thar i neia kei chu ngaizawng thar ka nei. “Chu iengti am mii..?” Ka zukta a tlu nghal el an nawm...Awlsam rura....
Tv Immanuel Zarzolien

## Chawlni zantieng Lalrothang Tusing hai in-ah ka zu lenga, “Lalrothang, thingpui hung inlum rawh” ka zuk ti dek dek chu an nu Sari’n (Duot taka an pa’n Sarpui ti-a a ko)a lo phalnaw rimsie a hawi!!....An pa thaibawi taka anlang ding chu a lo phal aw-zawng nawh.
Tv Marc Lalrohlan SEBI

## Ei nunghaktehai hi venga sap hming neilo vawng niin ka hriet si Mumbai-ah hin Sap hming an nei tawl firfera Chami (CST)khawm saw ieng Sap hming am, ama le ama alo inpek ve ding chu maw?
Tv Joseph L Juote (Kalina HmarWatchman)

##Ngaizawng pathum ka zuk contract zet chuh ka boss pa Jacob 007 chun ami tluk ta naw rimsi.JamesBond(007) chuh kei ku hih kan ta hih.
Tv Lalthasang

## U Lalrothang, nang chau ka hril che ani aw, kan in ngaizawng hih tukhawm hril thak naw rawh uo!
Tv Reuben khawbung

##Pu hai ,kei chuh mi lo ngaithiem ro aw...kei chuh nuhmei chiterek buoi in ka buoi char char anih.
Tv Donald(Ngaite)

Saturday, September 20, 2008

Mumbai Tuisunsuo 21/09/08 Vol 1 Issue 4

HMEITHAINU THAWLAWM
- Darsiemlien Ruolngul

Baibul a hin thawlawm inthawtu iemanizat hmu ding an um a, amiruokchu hi hmeithainu thawlawm inthaw anga hril hlaw hi chu um kher naw nih.

Baibula ei hmu angin Tempula fe, milien le mihausa haiin thawlawm tam tak tak an thlak sup sup lai chun hmeithainu pakhat hin dartangka pahni a hung thlak ve a, mi inzakthei deu tading lem chun hang thlak ve ngam na ding chi khom ni kher naw nih. Amiruokchu hi hmeithainu ruok hin chu a thawlawm neisun tlawmte chu inzapui der lovin, tulai tong takah ‘confi’ deuva a thlak ni ring a um.

Eini rawiin thawlawm bawmah poisa nawi ei thlak ding pha mi’n hmu rawi an tih ti inlau ni awmtaka thawlawm bawm pur meuva ei thlak ang khan chu a thlak naw ni ngei a tih, a bul laia lo um ve Isu Krista khan a thaw zat a hriet thei tlat el! Hi a thawlawm thlak lai lo hmutu midanghaiin iengtinam an ngai ve ding chu Baibula a’nziek ve naw leiin ei hriet thei nawh a, a then lem chun khang zat chauh thlak nek chun thlak naw law law sien, khom lo ti rawi naw nim. Isu Krista ruokchun chuong ang chun a lo ngai naw kher el! Chuonga ngai nek hmanin “hi hmeithainu hin midanghai popo nekin a thlak rawn lem a nih” a ti dai el. A san chu Isu Krista, mihriemhai lungril le ngaituonahai popo hre theitu chun hi hmeithainu hin a neisun takmeu, inro der lo le phal taka Pathien kuomah a’n hlan a nih ti kha a hriet tlat leiin hieng ang hin a hril a nih ti Baibulah ei hmuh.

Hi hmeithainu thawlawm inthaw chungchanga sermon thlaktuhaiin an hril dan tlangpui chu thawlawm ei thaw hin a tam le tlawm hi Pathienin a ngaipoimaw nawh a, lungril a en lem a nih ti tiengpangin an hril deu pei a.Ei lungrila tlawmte thlak nuomna ei nei kha Isu Krista hin a ngaisang ve dim ti ruokchu ngaituo um tak a nih.

Hienga hriltuhai hi thawlawm inthaw tam ngam ngai lo, mani inthiemfawmna dinga an hril khom a ni el thei.Hi hmeithainu’n thawlawm tlawmte chauh a’nthaw nasan le einin tlawmte ei inthaw nasan hi inang naw vieu dingin ka ring. Isu Krista’n a hril angin amanu hin chu a neisun takmeu a’nthaw a nih a, enirawiin ei inthaw ve hi chu ei nei hmun sangkhata thea hmunkhat ang vel khom a tlingzo ngut dim chu!

Sorkar sinthaw, company thaa sinthaw, officer lien etc etc tiin ei sinthaw le nina uongpui vieu siin Sunday thawlawm thaw pha leh kut inleng naw sasaa thawlawm bawm pur ngai hiel khopa tlawm le inzapui um ei inthaw hlak le hmeithainu thawlawm hi chu khaikhin chi an nawh, inthlau tak a nih!

Hieng lawm lawma thawlawm pekah ei tiksiet le harsa ei ti em em nasan hi mihriem sierkop le Pathien sierkop a’nang naw a nih ti ei hreitfuk hlak naw lei ni dingin ka ring. Mihriem hisap dan chun Rs.10 i neia, Rs. 3 inthaw chun Rs.7 chauh nei ta ding, Pathien sierkop a ruokchu Rs 10 i neia, Rs 3 inthaw chun a neka tam nei ding. Inang naw tak a ni hrim a nih. Mihausa le milienhaiin tangka tam tak tak an inthawhai neka hmeithainu dar tangka pahni chauh Isu Krista’n tam lema a hmu tlat el kha chu mihriem sierkop chun a hisap naw chu a ni phot el.

Mitinin sum ret thiem le sum hmang thiem hi hausakna le neinungna ni dingin ngai seng mei ei tih, sum ret khom ei thiemin thawlawm pekah ei tik khom a se tawl hle. Amiruokchu ei tiksiet le ei sum ret thiem ngaituoin a hausa le neinung chu ei vang hle thung!

Zawlnei Haggai chun “In um danhai hi ngun takin sut ro. In ching teu a, tlawmte in sik a. Infak a ,in tlai si naw a. In dawn a, In khop si nawh.Thuom in hak a, in lum si nawh. In sum hlaw suokhai hlak chu mansa popa thlak ang chauh a nih” tiin a lo hril a nih.

Ei Baibul hin neinung le hausakna dingin sum ret thiem, tiksie le sum inkhawl khawm thiem dingin a mi hril ngai nawh a, phal taka pek chu a tam lem hmuna a ni thu le, mamaw bak kompui chu tlakranna a ni thu a mi hril lem a nih. Thuvarhai 11:24-26 a chun hieng ang hin ei hmu a: “Phal taka pek chu a tam lem hmuna a na, mamaw bak kompui chu tlakranna a nih.Mi tiktlai chu hmuingil a ta,tuia chawmtu chu tuia chawm ve ning a tih. Hlawkna hnot leia bu inrotu chu tongsie inphurin um a ta, a pe suok nuomtu ruokchu malsawma vurin um a tih” tiin.

Hi hi a'ndik a nih ti Baibulah hmun tam takah hmu theiin a um. Chuonghai laia pakhat chu Zarefat-a hmeithainu kha a nih. Ama chun fak ding an neisun, a naupa le an fak ding ai chu Pathien zawlnei Elija kuomah an pek a, Israel rama tam tlak sung po pova an fak ding an nei pha el khelah, hmeithainu naupa khom khan thina a pumpel pha a ni kha.

Hmeithainu, a neisun dar tangka pahni inthawtu khom kha bungheiin a thi ti ei hrietzui ta chuong nawh a. Hang ngairuot ringot khomin Isu Krista’n khang lawma a ngaisang kha fak ding neilo le rimsi taka a’n umsong tir ring a um naw a nih.

Chuleiin, Baibul ringtuhai ei inti si chun Baibula inziekhai hi ringzo ei tiu. Mihriem sierkopa chok lovin Pathien sierkopin chok ve tang ei tiuva, thawlawm le thilpek dang dangah tiktlai ei tiu.

Pe ro khai, chuongchun pekin um in tih
Pekah Pathien hneban thei naw ti nih
Pathienin mihriem lei a bat ngai nawh
Malsawmna hnar a lo ni si.


LAWMTHU

Mihriem ngaia hun lo tak la nisienkhawma siemtu Pathienin a kuoma chawl hadam dinga kan pa Lienchung(67) alo thuoi chu a tuor harsa kan tiin a puordo ana hle. Amiruokchu hnuoi rinumna hai popo maksana bawngnene le khuoizu luongna rama Angel hai le Hallelui rem ding ani leiin lawmna tamtak kan n ei. Kan beisei phâk le kan phulo chunga, mani hun in teptertak kara, mi hung trawiawm tu le tlawmngaitaka, mi hung pantu hai popo kha mimal in lawmthu kan hung hril seng naw leiin MumbaiTuisunsuo fethlengin lawmthu kan hung hril anih. Chun MumbaiHmar Welfare Association le Hmar Christian Fellowship Mumbai hai mi hung uopna le ngainatna hai popo kha kan lawm hle bawk. Atawptaka dingin in tlawmngaina hai kha hlu le mawi kantia, in inrimna le sawlna hai popo kha Pathienin a lêt tam in malsawm ngei raw sen cheu.

Mr & Mrs Stephan C. Hmar


LAWMTHU

Ei chanchin phek hi ei trantir lai khan computer hmang ding eiin vai ruoia. Chulaichun Nk Cathy Lalrohlu-in a Laptop in phaltaka amin hmangtir na zar in vawisunni chen in chat lovin ei Tuisunsuo hnar a lan chikput thei zinga. An phalna chunga lawm thu kan hung hril.

- Editorial Board


TUOLSUNG CHANCHIN

#Ei tlangval Marc Lalrohlan khawm in laptop thar hlawk (Sony- Vaio CR 313), ruotui la ţham lo a lo in chawk tah. Mumbai Tuisunsuo sutna dinga ei hmang ţangkai ngei Editorial Board chun a beisei. Tuhin chu ei Tuisunsuo hnar khawm hrat nawk zuol hleng a tih.An chong nawk vat ei beisei.

# Bawngsuong, inhnik taka suong inchaw nuomtu hai chun Pu Lalhmunsang(Ruthi Pa) Kalina in pan thei zing anih. Inchaw nuom tu hai chun mobile No. 9819217834 ah order/indawn thei zing a nih. A lovin chaw ta ha’n,an hnik zie ha hi’p in an hril.

# 18th Thlaram, Ningani zan khan Pu Stephan C Hmar (Secy MHWA)apa Lienchung (67) chun an inlum Rengkai, Churachandpur hmuna hnuoi rinumna intem nawk ta ngailo dingin Paradis a amilo chawl san tah. Hi zan hin Nupui, Papui, Nunghak le Tlangval tlawmngai thahnem tawktak fekhawmin ruongthut siemin lengkhawm khawvara hun hmang anih. Hi hun a hin MHWA le HCFM hai in hunser hmangna an nei a. Chun zing dar 5:00 in Rengkai panin Mumbai Airport anthawkin Jet Airways in a vuong suok. Lusun sungkuo hai MumbaiTuisunsuo chun a tuorpui hle a nih.

#Ei tlangval suong em em Tv Lalliensuong,Tata Institute of Social Sciences (TISS) a, Post Graduate in Disaster Management inchuk mek chuh, anchukna le inzawm in Bihar-a tuilienin a sukbuoina hmun-a a cham mek.

#Ei Editorial Board Member Tv.John K Dulian khawm tuva kartawp chuh Kalina Lanu hai runsang kai lek hman lo dingin Malad-a, an Company Swamy BBDO huoihawtna hnuoi-a,Advertising tieng a thiemna belsa dingin Workshop in a ţhang mek.

#Pi Esther Songate khawm a pa Rev Ruolhlei Pakhuongte damnawna lei a Tuiţhaphai ah(C.C.Pur) hun iemami chen chama hang fe chu damtakin zani zan khan Mumbai khawpui a hung tlung nawk tah.

#Chanchin ei dawng danin, hungtlung ding 24-25th October, 2008 khin unau Pune han Sport an nei ding ana. Mumbai hai khawm 25th October ni khin sport a ţhang ve dingin an mi hung fiel. Chuleichun nunghak le tlangval hai kha lo inla fit tan ta ro khai . Chun hi nia chawl in nei thei ngeina dingin lo insingsa ro.


TAWNGBAU

#Mumbai Tuisunsuo Editorial Board han,Tuisunsuo an tlangzar ţum khan chu, Jacob khawm an lang sang khuou el an nawm.Vanglai a min hrietsuok tir a hawi!
Ms.Lalnunthieng, PG Warden

#Tuisunsuo inti inti a,a hmel khawm lan hmu reng reng lova, aman in mi dawl nghal a. Ei nin intiem hman reng reng lova, zingkar khuo a var leh,Cooker ah ei lu ei phum naw chau(A zingkar tho phingţam taluo).
Nk.Hmangaizuol(Daw-te)

#Kalina tieng ka zuk vuong phei chu,ka natna po po a bo vawng. Kalina hi ka lo ngei ma ma chu a ni hih.
Nk.Cathy Lalrohlu(NewMs Kalina)

#Lalroutkim chu keiin lo en kawl ka ta anel an nawm!(Sari an ţhuoi zana, James Daihmingthang Pudaite in Sari a hnemna ankanem.)
Tv.James Daihmingthang Pudaite.

#Achha………..tuhin park-a exercise ka lak lai tak anih. In news kha sutzo inla, tlangval hai kha lovin sawizawi vat vat ta ro.(Phone-a Sepa a hung biekna anih)
Pu Darthangluoi Sinate

#A mi hung bie nuom hai chun,sina kan um lai mi hung call hlak unla, line hmu awl lem a tih. (Phone a busy zinghai)
Nk.Linda & Zuolte, (CST Rd.Sis.)

#Tulai chu ka buoi taluo,ieng khawm ka ngaituo hmannawh. Mengte naunei ang elin in kan sawn kan sawn el anih. Inkhawmna hun ding an dei thlawt nawh.
Nk.Buongi (Ms TransferMawi)


21/09/08 Vol 1 Issue 4

Monday, September 15, 2008

HMANGAINA’N SINGMIT A SUKDEL

- Samuel Songate

Vawikhat chu Mumbai a inthawka Pune pan dinga Dadar-a bus ka nghak laiin nunghak le tlangval danglam deu hi kan tuokpui a. Ka bus chuongna ding tieng inhmaw taka ka pan lai chun anni chu inhmaw lo zet hin kei ka tieng ngha in an hung insawm phei hnak hnak a. An inlang dan anthawk ringawt khawm chun nupa inngai tak el anni naw tawp khawma ngaizawng inhmangai tak an nih ti chu inhmai ruol ding an nawh. A nuhmei lem chun a pasal lem chu a dâra innghai ti ti deu pum hin a chel a, tulai tawng takin an romantic tawp.

Kan inpêl malamin ka zuk en chieng chun chu tlangval chu a bân vawitieng hi a um nawh a. A kiu chung lai hin a bân a bawng leiin a bûl tui a. Tlangval pieng fel le hmel fel ve tak, an chei dan khawm mawikhai tak ni si, a bân a bûl tlat el chu pawi ka zuk ti pui khawp el a. A bân bûlna tak chu a mawinaw el chauh niloin a bûl dan khawm chu pangzat um tieng pang hi a nih a. Ama hlak chun zakaw bânbûl a la hâk nawk nghal. Ama bân bûl bawk, a zakaw bân bûl bawk. A piengsuolna chu an lang chieng zuol hle.

Amiruokchu ka zuk en chieng nawk deu chun a nunghak intlawnpui nu chun a bân bawngna tak a chun ten dêr loin ngaimuong em emin a chel tlat chu ka hei hmu nawk a. Chuonga ka zuk inpêl pui char chun ka lungrilah thil a hung in lang zawk a. ‘Love is blind’ an lo ti vet chu saw ngei sawh an ta sawh! ka tih a. Chu tlangval piengphung, a lu sîp anthawka a ke hmawr chena ena a mawinawna tak, a kut bawngna tak el, nunghak khawmin an ditnawna dinga ka ringna hmun taka chun chu nunghak chun ngaimuong em em in a chel lem hlauh a ni chu!

A piengsuolna, a mawinawna tak le a thatnawnatak chu hmangaina in a mit a sukdel tlat leiin a nunghaknu ta ding chun a lungsiet umna tak in an chang lem tah a ni chu! Mak ti deu puma ka bus innghatna tieng ka pan zing lai chun ka lungril a bawk chun “Pathien hmangaina khawm hi tuta ang char kha a nih” ti hi a hung inlang nawk a. Ka zuk ngaituo zui pei takluo chun kei khawm ka suolna le ka tirdakumna tak, Pathien ta dinga ka tlingzonawna tak a khan Isu’n hmangaitak le lunginsiet takin a mi lo chel ve zing a nih ti ka hung hriet suok a.

Kei le kei ka zuk in en a, ka suolnahai zo zai leh, Pathien ta ding chun tirdakum taluo ringawt el ka ni zie hai ka zuk ngaituo a; sienkhawm hmangaina’n Pathien mit a sukdel tlat leia ka suolnahai a mi hmu pek nuom ta naw zie ka zuk hriet thar nawk chun hlim le lawm takin bus a chun ka lût tah a. Pastor Thangngur in “A felna le a thienghlimna, a ropuinahai ka hang thlîr velin; ka ta dingin hmun a um nawh A hmangaina tuipui a naw hin chu!” a lo ti hi chu a va hei ti fûk char char de aw! Pathien thienghlim, suol le inchalrem thei thak lo ni si in, kei misuol tirdakum tak el a mi hei hmangai ngawi ngawi el hi chu hrietthiem a harsa bawk a nih.

Lampui intluonin Pathien hmangaina ropui zie, a mak zie, an thuk zie le an sang zie hai ka ngaituo zawm pei a. Tuipui kamah ei ngira ei mit in a hmu phak chin chu chîte chauh a na, ei hmu phâk bâk, mit in a tlin phâk bâk a khan tuifinriet lien taluo ringawt, a zâu dan le a lien hril ruollo a la um angin Pathien hmangaina khawm hi ei hring hrietna in a hriet phâk chin hi chu chîkte chauh a na, ei la hmu phak lo le ei la hriet phak lo hi hril ruolloa nasa a la um a nih! Pathien hmangaina hi hriet seng ruol ding a lo ninaw zie chu a hnuoia hla hin a hril chieng hle.

“Could we with ink the ocean fill,

And were the skies of parchment made,

Were every stalk on earth a quill,

And every man a scribe by trade,

To write the love of God above,

Would drain the ocean dry.

Nor could the scroll contain the whole,

Though stretched from sky to sky.”

Vol 1 Issue 3