GOOD FRIDAY LE EASTER PUOLIN - Rohming Khawbung

Rohming Khawbung

‘ …thinga khai taphawt chu Pathien tawngsephur an ni sih a,’Deut 21:23 ti ani tlat si leiin Juda Pachal, sinsiena(inchikna) phut tlat tu hai tading le Pathien chu lungngaina le natna hre lo, lungsenna le lawmna khawm hre lo ang hiela ring tlattu Grik mi ziktluok tading chun Pathien naupa meu krawsah a thi ti hi chu ring in tak ve hleng a tih. Amiruokchu hla siemtu’n,’Mivar mihriemna hin chu, a ngaituosuok zo ngai naw che, ka sandamtu I thuruk hi. Aw an thukin a van sang ngei, khawvel var hai nekin, Pathien hmangaina thu hi, van le khawvel ah a sip ie,’ti hin a phuosuokin a dawn(answer) chieng hle awm e.

---

Tirko Paula’n,’ Kraws thu chu bohmang zinghai tading chun invetna a ni sih a, eini sandam zinghai tading ruok chun Pathien thilthawtheina a ni lem,’(1 Kor 1:18)tiin a lo hril a. Khawvel ropuina anthawka thlir chun kraws thu tawngsie phur , misuol tawpkhawk hai cho chantawk le phutawk anih. Pathien thlarau anthawka hmufie tuhai ruok chun kraws thilthaw theizie hi hriechiengin an ngaisang a, huoisen takin Lalpa an zui hlak. Hi kraws hmang hin ram an kap lien pei a, zohnatlak laia eini hmar hai chen khawmin zam loin Lalpa tadingin chanchintha ram hrang2 le hmun hrang2 ah hrilin ei lo puong ve ta hiela, anih, harsatna a tam po leh kraws a inthawkin hratna an thal rawn a, mihai tadingin malsawmna ni thei ding khawpin ke an lo pen hiel hlak. Harsat rinum kara khawm tuor tang2na, hmusit tuhai tadinga tawngtai pekna hiel an hung nei hlak. Chuongang hmusit tuhai ngaidama, tawngtai pekna lungril inngaitlawmna thilthawtheinaruok chu khawvel mihai ta ding chun invetna a lo ni lem sih a, ringtuhai tading ruok chun chungtienga mark score na, ei Lal Isu mizie ei put phakna umsun anih.(ingngaitlawmna chu ei Lalpa Isu mizie 1 laia mi ani sih a).

Ngaidamna hi Pathien anthawka suok ani zie khawm kraws anthok bawk hin ei hmu a, khanga Isu kraws a an khaikang hnunga Pa kuomah ama deusawa suk nawmna a, khengbet tuhai ngei2 ngaidam dinga a la hang hni tawk2 khan ngaidamtu ngirhmun ropui le pawimaw zie amin hmu chieng tir hle. Hre ran puma min tuortir tum tal2 hai le mi suk natum tawk2 hai Lalpa hminga ei ngaidam hin dawizep ni si loin hnena ei puong a lo ni lem ran alo nih a, mihriem ram anthawka thil thei lo anga in lang kha Krista zarah ei hnena, ei thil thawtheina suklangna alo ni lem dai alo nih. Vawithum lai in phatsantu Peter kha vawithum lai Isu’n a beram hai enkawl dingin a ko tlat el, a beidawng lungngai lai taka inphatsan tupa kha Isu ruok chun a la hmang nuom tlat, eini chun thil ho deu a mi phatsantu khawm ei hmu pei meu ta ngai nawh, hi tak hi Pathien le mihriem danglamna, mihriem hai tadinga malsawmna le vangneina tawp khawk chu anih. Chulei chun iengzata tama suol khawm Pathien chun hi kraws a a naupa thina hin an thi tir sa a, ngaidamna famkima mi ngaidamin Ama tadingin ami lo la hmang nuom ran a, chu chun chu thina(suol an thawka ngaidamna famkim) anthawka nun thar(hringna thar) ami pek zie khawm an entir nghal bawk awm e.

Ama Lal Isu’n,”tukhawmin mi zui a nuom chun mani inhnawlin nitin a kraws putin mi zui raw se,”(Luka 9:23)a tih a. ‘Mani inhnawlin’ a ti lai tak hi a tam lem hin ei theinghil hlak am anih or ei ngai pawimaw naw lem? Rinum ei tuor pei naw a, Krista hminga chan/tuor ei in lau a, mani lunginsietnain ei khat(sip) tawl a (a ziektu ngei khawm hi ka nih). Thil tha chu hrie ran inla khawm ei thaw vawng kher nawh, hrat nawna nei seng ei ni sih a. Chulei tak chun anih nitina hnena puong in suol thupha chawina ei nei a ngai a. Chu nitina ei kraws chu zo le zang ti taka put dingin ami phut kher nawh, tlukpui chang nei inla khawm, tho nawka tuorsel taka put a ei kalvari tlang(Isu Krista ke bulahj) a in nghat dingin ami ti lem anih(Kalvari tlang kha Pa le khawvel inrem nawkna hlensuokna hmun ani sih a). Chungchun ama’n Pa kuom ami thlungpui ding ani si a(‘kei hi lampui le thutak le hringna ka nih, keimaa fe naw chu tukhawm Pa kuom an tlung ngai nawh.John 14:6). Temple puonzar a lai taka an tler khan, hnuoi le van mi daidangtu eden bawsietna suol kha Krista zarah sukchimin a um a, thiempu hai fe tleng kher ngai ta loin suol ngaidamna an thei tah ti an entir a, thlarau tieng malsawmna ei dawng theina dinga a mi dangtu po2 le, mihriem le mihriem (juda le jentail) inkara ami daidangtu chu a lai takah suk tlerin Van kawtkhar chu ami hung hawng pek ta anih(chutaka chun Juda mi an um thei nawha, Grik mi khawm an um thei bawk nawh…..Krista Isua chun inrengin pumkhat in ni sih a. Gal 3:28). Amiruokchu van kawtkhar chu inhawng ringawt sien khawm Pa kuom tlung ding chun a lampui ei hriet phawt a ngai a, chu chu Johan 14:6 a khin ei hmu a, chu ding chun nitina mani inhnawla(Krista a chun mani rinum poisa lo in) ei kraws ei put khi a lo tul ta ani chuh.

Awle Jehova (chungtienga mi ni lo) le Johnson hai unauin,’in tho tir in tak taluo’ an mi ti naw na dingin hienghin a thonawkna hin hang suk tawp ei tih aw. Isu nun pumpui kha Pathien naupa a nizie puongsuokna ani a, a thonawkna hin a nemnghet hle anih. Krista kha tho nawk ta naw ang sienla, a tuorna ringawt hin chu umzie tluontling nei naw nih. 1 Peter 2:24 a ei hmu angin suolna ah thi in, felna ah hring tum in la, ei nitin sinthawna ah beidawngin ei tum anga thil a fe naw a ‘Lalpa iem a ti le?’ ti ngawi2 hielin ei lo inrum ani khawmin, A DAWNNA TAK2 CHU RINGTU HAI TADING CHUN KRISTA A CHO HIN A LO UM ANIH. Krista thina le thonawkna hin ei ni sengah lungril thar mi pe seng sien nuom a um hle.

(Varna a mimawl, felnaa mi ang lo, retheina a hausa tlat kei ringna tlawm, butter le cheese neka sathu le bekanthu du lemin ka nuna hmu ding um thak lo sermon ang hiel ka hang ziek hi mak in ti awm, keikhawmin mak ka ti ve tho, nachu a tul ning atih lungrila an lang tlat si a leh, a san ding awm Sepa le Daia’n an hriet naw ang tho in kei, a ziektu ngei khawm hin ka hriet bik chuong nawh.)

HAPPY EASTER IN RENGIN.

(rohming@ymail.com)