Mumbai Tuisunsuo 25/01/09 Vol 1 Issue 22

Amchi Mumbai

Ei khuolzinna ram Mumbai a hin buoi nei nuoi hlak inla khawm, nakie tieng Mumbai ka umlai a thil dangdai deu ka hmu le thaw hai tia ei tu le te hai kuoma ei lan zawt thei ve thei ding thenkhat hai khu experience lovin Mumbai maksan tum nawng ei tiu.

NEWSPAPER PAGE 3 A INLANG NUOM CHUN - Mumbai a nitin chanchinbuhai a inlang I nuom chun mi inlar, hmeltha, huasa le danglam deu ni kher kher a lo trul nawh. I thlalak an nawleh I ruolhai le in party-na thlalak Mumbai Times Page 3-a inlang ve sien ti I nuom Medianet, Times Gruophai hei phone la a thlalak size le an lang tam dan ding i zirin a man le a hung suok ding hun hung hril thap nghal el an ti che. Zuk in suk lar deu met dam eilo um a ni chun 022- 2273- 5483 hi phone thei zing a nih.

MUMBAI-A CITY BUS LAMPUI SEI TAK - Sum tlawmte senga Mumbai fang kuol I nuom chun Borivali Station (E) a bus No. 524 man la Vashi chen cheng 22 chau sengin tlung thei I ta chun Mumbai khawpui khawm fang kuol zek thei bawk I tih. Hi bus lamtluong hi 44 km zet a sei ania darkar hni zet lampui a nih. I thawve nuom sin chun alo thaw tasa Tv Lalthasang le James Daihmingthang hai kawla ngaiven thei zing a nih. An hriet chieng hle a ni kha aw....

MUMBAIA JAPAN THLANMUOL LE CHINESE TEMPLE - Nipponzan Myohoji chun Japanese temple tia threnkhatin an I ko bawk Worli hmun lai sawm hrietlar taluo Japan hai thlanmuol a uma. Hriet dan chun hi thlanmuol hi Japan anthawka hung inpemlut threnkhathai le Japan nawchizawr iemani zat zet hai rawna vam hi hmun a hin sie a nih. Hi hmun hi a hmu nuom hai chun hi address hi aw... Japanese temple,Hindu Shamshan Bhoomi, E Moses Road, Worli. Hieng ang bawk hin Mumbai-a Chinese Temple umsun hmu nuom tuhai chun Nawab Tank Road, Mazagaon a hin, abiktakin Chinese New Year hunlai fe chi tak a nih.

LEM ZIEK (PORTRAIT) - Tlalakna hmang ngai lova kut a ziek ngei i lim, banga tar thei nghal mawi em em a ziek I dit chun Jehangir Art Gallery kawthler hei hrut pheila I lem ziek nuomin lo inchu mur mur el an tic he. Hmai nam raklo lkhawm nam patin an ziek suok el anih. Mumbai-a um ini si vawikhawt chu pan chi ni ngei a tih.

POWAI-A NGAIKUOI KAM - Powai Dil a khin ngaikuoi kam phal ani a chu ROU(Meiteihai nga hming) nekin awle an tam lem el thei ani aw... Maharashtra State Angling Association chun ngaikuoi kam hin a tui a thienghlimna vawng tlat chu a tum.

NUHMEI KAWRHNUOI - Kawrhnuoi inchawk nuom chang I size ilo hriet naw pala an nawle I hril inzak ani chun bouina ding reng reng a um nawh. Crawford Markey pan el la an hei hmu char in I size ding chu lo hril dik chat el an tih. Thawtranni anthawk Inrinni chen I va nepin i van chawk true thei anih. Anachu vaihai in zerhuom tla vanga an en che kha thil pawia ngailo met trul mai a tih. An naw si chun tlangval thiekthu se deu thruoi khawm thra’ng a tih.

BANG ZIEK TRIEL (GRAFFITI WALL) - Sap filma ei hmu hlak, mi tamtak in ei lo thaw nuom ve hlak rawng chi dang dang hmanga bang ziek triel i tho nuom ve chun, Bhulabhai Desai Road, Mahalakshmi pan el rawh. Hi taka hin i lungril a sipliem hai, thumal tawi te te, anno le trawng mawi le mawi lo iva ziek rang hrep thei (tu khawm in pawi anti nawh).

MUMBAI-A ZUN IN HLUITAK - Bombay Dockyard laia um Bombay Castle a chun Mumbai khawpui sunga zun in hluitak hmu thei zingin a la um . Hi zun in hi ei pi le puhai dier bengchep chaua tuol an leng hunlai, kum 1750A.D. anthawk ta khan an lo hmang tran dai tah. I van zun ve nuom chun kum khat sungin vawi 12 chau chance a um. Thlatin ah Chawlni (Sunday) hmasatak chau hin an hawng hlak a nih. I ngaituo sin ve ding eini chu tu chen hin veng tieng vantlang zun in mumal la neilo ei tam ani aw.. Changkang dan an thlau hle. In zun hi India mi cho phal ani!!!

STRAND BOOK FAIR - Lekha bu inhnik hai tading leu leu Stand Book Fair hi kumkhat sung voi hni, January le September a nei hlak ani. Lekhabu akim in an man hle. A ni le hun hre nuom hai chun 2208-6103 call thei ani.

Chanchin Lawrkhawm

# Pu Darzakhum Songate le a sunghai chu chawl hmangin an fe. Damtaka Aamchi Mumbai an hung kir nawk kar ei lo nghakhla hle. MT chun sungkuo chawl hmang inhawi dingin a nuompui hle.

# Lo sawt vang ta sienla khawm ei theinghil ngailo Nk Jimry Krismas hmanga veng fe chu damtakin Mumbai khawpui kar liemta khan alo hung tlung nawk tah. MT chun a sinthawna thra taka sunzawm nawk dingin a ditsak hle.

# Tv Carlos Lienlal a sangpa Planning Thangboi, kum 18 mi chu tui-a changsuol leiin liemtah Pathienni zantieng khan alo boral tah. Hi zan la la hin MHWA le HCFM in rawina hnuoina –a lusun sungkuohai meng puia lengkhawmna hun hmang a nih. Nunghak Tlangval thrahnem tawk tak fe khawm a nih. MT chun lusun sungkuohai a tuor pui tak zet.

# Edlyn Sinate D/o Pu Darthangluoi Sinate chun an School Anual Sports an neina a 80m race-a gold medal a lak a, chun, Elsie khawm, fancy dress a silver medal a lak.Ei lawmpui hle a an lawman dawng hi a lawmna’n voisun an inchong nghal bawk. MT chun an hlawtlingna hi a lawmpui hle a hmatieng pei a khawm hlawtlingna tamtak dawng nawk pei dingin ditsakna an hlan nghal.

# Eini laia hun sawttak lo um ta hlak nunghak fel em em le biek inhawi, Nk Niengneimawi(Mawite) chu bawrsawmna leiin veng tienga damdawi in enkawl dingin zanituk khan veng tieng panin alo suok tah.

# Ei lo hriet seng ta ang khan hung tlung ding 5^th-8^th Feb. khin unau Pune hai chun hartharnawkna Camp nei an tuma chu taka ding chun Fellowship member hai popo fiel seng ei ni ang bawkin thrang seng tum ei tiu. Hi Camp a Speaker ding Rev. H C Thiek khawm biek fel diem ani tah.

# Thei ang anga ei lo buoipui ve trawk trawk MT website kha tuhin chu blog nita loin Website puitling nei thei ta dingin Pu Kaprosang Juote a tlawmngaina le an phalna leiin induong tran mek a nih. Ei website thar hming ding chu www. mumbaihmar.com a nita ding a nih. Thilthra thawtuhai ke chu a mawi ie chawimawiin la um nawk pei an tih.

# Pu Jacob Shakum le Pi Merina hai Honey hmangin Taj Mahal le Qutub Minar hmun hai biethu inhlan zing puma an fang kuol hnungin damtakin an runlum Powai,Mumbai damtakin liemtah Pathienni zantieng khan an lo bung tlung nawk tah.

# Ei fellowship hung kan dingin Pune a inthok in Pastor Lalsiesang le a ruolhai mi pathum zanikhan damtakin an hung tlung. Vosun hin Pastor Lalsiesang in rongbawlnna nei nghal ati. MT in ei lo welcome hle.

Trawngbau Lawrkhawm

## Nunghak ei hei leng ei ti leh, an kut tin le ke tin baak hre lo hai. Hohlim pui ei hei tum ngiel le hlak chu Bandra khel tieng bak chu hril pui thei ni hlawl lo hai. A buoi thlak thei bawk chu a nih.

-Mumbai Val Upa

## Sam keitluon chu ka lo thiem mama nieng a ti maw..... nunghak sam ka kei tluon pek hai chu pasal an nei zat zat nghal el a nih. Lo en tanla in awi naw leh, Sary, Merina le Engzam.

- NK Vanlalcham

## Sam keitluon tluon in an nei pei a kei khawm ka kei tluon ve el ta diem a ni aw.....

- Nk Rachel Lalhrietpui

## Nuhmei nei nuom in um chun min roommate pui el roh. Ka roommate pui hai chu nuhmei an nei pei hlak a nih. Nang te I nei nuom ve am? Kei chu mi theinghil unla nangni lem kha.... Hmu ta zing inti kan naw a hmunaw bik khawm ka ni chuong bawk nawh.

- Tv John K Dulian

## Jude Cross Junction (Ruth Khawbung hai PG hlui lutna lai kha)lai hi a kuo a chin a chu Kolivery kawtthler lai chu a pawimaw tak anih. Ei lut threl vei chun ei inhmang ram a nel. Chulei chun a chin khawm hi a pawimaw tho ani aw... Heh Heh Heeh...

- Tv Joe Songate

## Mumbai vai hai ku hi in bawl an thiem tawl ngawt el maw.. inrel khak khak hin an bawl tawla in trum bak hin ei in hnawping lal tawla, a thren ek in lem chu SAAP thaklai an bang ei kiss thei zing ana.

- Nk. Joy Rebecca Khawbung

## Kei chu ka imu a suok ta chun tlangval mi tir ti dam chu ka dawn lo el a nih. Chu nelh!!!!!!!!!

- Nk Rebecca T Ngaite

In Awi Am?

In awi am, ei lo hriet dan chun ei tlangvalhai threnkhat Bollywood Film shooting dingin an fe a mawi fahrana an sam hai an khuoitho sar chu a mawi zuolna ding ti in an lo met kawl pek lem dei chu ti.... Amakin apoi thei ngei maw......

Mumbai Tuisunsuo 18/01/09 Vol 1 Issue 21

TLANG LEIPUI

Stephan C Hmar

Kumhlui a fe liem thut thut a, kum thar a hung in her lut mup mup lai khan, huphurna le lawmna inchawkpawl nuoiin ka lo tuok ve a. Hun fe liem ta hai suikirin, ka ngaituona mithai hla tak kan le’ntir a. Chuong lai chun, sumpui pik tak kara, van buong fie kawnga an hung inlang hlak ang ela chiengin, tiena ka pa rawia Ngurte rama tlang leipui kan nei lai hun a hung inlang a. Ka khuo nasatakin a suksawt a. Hi hnuoi hringnun, par anga hung vul hlak khawm hi, leipui thlai hring dup hlak hai, chul tawl an inchang hlak angin, ni khat chu a la tuoi ve ding a na.. ti in ka ngaituo inthuk tul tul a. Vanglaini, ei hrat lai hun hmang that a tulzie a min hriet suoktir nasa em em a.

Khang hun lai khan, kum a hung thar ve pha leh, kan tlang leipui ding mi vat pektu di’n mi kan ruoi hlak a. Anni chun, ramril inthuk tak tak hang fangin, thlai thatna ding awma an ringna muolhai per an hang zep khum a.Van boruok inthleng danglam dan ngaichang zingin, phalbi nisa inteng tak hnuoiah, an muol thlang hai chu an vat fai hlak a. An vat thluk thing-le-ruo lien tak tak, chap tia hming ei inbuk el hlak hai chu, muol inten tak tak lai chun an zal nghen nghuon a.Phalbi nisa emtawl dingin an hnusie hlak a.

Thlasik nisa inteng tak hnuoia chap-hai chu sawtnawte karin an hung tawl nghal a. An tawl tawk ta maw an ti pha, an raw fai a; thlai chingna dinga lo rawfai chu ringmu ei ti hlak. A kang fai zo lo, hmangkhaw hai chu an sie buma, an la raw nawn nawk hlak a. A hun hung tlung pha a thlai chi thlak el thei di’n, inzozap sa vawngin ringmu chu an mi lo tuorem pek hlak.

April thla a hung tlung chun, thlai chi hai chawiin leipui tieng, thlai chi tu dingin kan fe a. Ka nu-le-pa’n thlai chi an thlak mawl mawl a. Kei ruok chu naupang, thil hriet nuom lai tak ka ni leiin, “Chuong thil inhram chu iem? Khi va thil vuong khi iem?” tiin ka lo indawn mawl mawl zing a. Ka pa chun, ramril bel thilhring hai chanchin a hriet hriet chu a mi hril pei a.

Muolhai khawk kawk kawk in,“ In thlai chi bawm hai deng kawi unla, thlai chi a hun lai tu vat vat ro”, ti ni awm fahranin Deng-kawi-raw-kawk vate chu an hram kawk kawk zing a. A umna zawn hre nuomin ka ngha kuol ka ngha kuol hlak. Muol khingtieng a inthawk in, muolpho le hlawsam inlau der lovin Lai-king-ro-kou-in, van ruotui a lo ko zing bawk. Tuk-tur-iek, tuk-tur-iek, tia inhram Vathu sir lai an vuong kuol zing bawk; an thla hai puok thlap thlapin an zap a, thing zar tha tha an bel pei a. Zantieng ninem, lo-vai tin a hun pha, zaithiem Rengkhawthim-in, reng, reng tiin kawl-kaw-dawnga nisa liem ding chu a mangtha a, inthim inthieng hung tum tla mek chu a lo lawm lut zing bawk. Khang lai hun kha a lo inhawi tak a nih.

Zuopa thlazar hnuoia lungphangna um der lova, ramril beltu thilhring ha’n a der um hrim hrim lova, a ni ding ang taka rimawi an rem ngaithlak lai hun baka hun thienghlim le hlim um a um thei nawk di’n ka ring ta nawh.

Thlaichi kan tu hai chu, van daidaw ha’n an lo chawm zing a; an hung kak dawk ier ier a. June thla a hung tlung a, van malsawmna ruopui a hung sur tan ta a. Thlai, to dawk ier ier hai chun ruotui chu an ngei em em a. July/August thla a hung invawi a, inno le hring seu suouin an hung inchawr suok ta vawng a. Rim le ra tin reng, mawi tak takin an hung insuo ta a. Mumbai-a a hro a ei hmu phak chau hieng lengmaser,khumhoi le behna ha’n an vanglaini chenin, zothlifim hnuoia an tle sep sep a. An sir el ah fanghma, vaimim, dawnkhaw ti hai an lo ra nghen nghuon bawk. Tu namthlak a’nthawkin ei zuk thlir a, lawnglengin lipui tui a dai hning dal dal ang el a, virthli’n sawmfang hring duoi a hei dai tle sep sup hmu baka mit suktleitu a um thei nawk ta di’m a nih?

Thlaihna le a ra hai chu kan va phur dawk zut zut pei a. Rahmasa Pathien kawla kan pek hnungin, a then kan hme a, a then kan zawr pei bawk.Mani kut sinthaw ra, hmutu le chentu ni chu, kut pha chunga lunghlu um nekin a hlu lem a nih.

Hi hringmi nun ang thovin, leipui thlai hai khawm vanglaini tawite chau an nei a. Thlasik a hung tlung a,dawntam sukseitu ding ringawtin, leipui lo hring dup hlak hai kha chul ram tawl an hung ni ta lem a. Hang thlir vel la, an vanglai rim an put zo ta naw a. Taimaka invak a ei hmu phak sun khawm, chul manta, chul ruotuoite ti dam an ni tawk. Bethlieng le bething, inkhat phara lo inkhai hai khawm, vanglai tisa an put phak ta nawh; an vanglai ngaia kur-in-kuk a thlep ngawi ngawi anni tawl. An inder that laia an inzam khum, thing le ruohai muolpho takin an ngir nghen nghuon a. Dawntam thu sukseitu ding chauvin.

Ei vanglaini, fur tui anga hrat, sienkhawm bo nawk el ding hih ieng tina’m hmang ei ta? Leipui thlai le nungcha ha’n mawina tinreng insuo a an lo hmang zo hlak angin ei hmang ve naw di’m a nih? A lo inkhel pal chun, insirin ko kir, ko kir inla khawm, hung kir nawk di’n an in mawi si nawh.

Chanchin Lawrkhom

~Pu Lalrothang le Pi Sari hai chu Thenmuol khuo-ah Kohran dan angin Pastor hma-a,tiem-tlat-e, ti-in;kut insui thratna an nei.An innei thlalak khom hi thrahnem tak,zongtra le sapthei tui,ba’ka a hung hawna.A en nuom hai chun Koliery street-Mag Industries 1st floor a en thei zingin a sie.Tuhin chu Kohran dan sunga laklut a ni ta bawk leiin,ei fellowship ah a kuol-a-tai a hma a lak thar nawk member hai chun ei beisei hle.

~PG Warden Lalnunthieng chu tuta kar kiem ta khan,a damnawna in-en-kawl dingin ruol dang pahni leh khuo tieng an suok.Chanchin ei lo dawng pei danin,an khuo sielmat khom damtakin a tlung.Ama hih,a naunu Mumbai tieng-a inchukna thralem-a inkai tir beisei lei-a hung thruoi thla tum nghal bawk anih.

~Krismas hmanga fe,thlang hung tla hnung deu,Mumbai,tuva kara hung tlung ei hei hriet thei po hai:Just inneithra Mr&Mrs Lalrothang Tusing,Buongthangmawi(Buongi) le Niengneimawi(Mawite).

~ Tulai hin ei student hai Zarzolien(Cl-xii),Irene Lalumpui Amo(Cl-xi) le Irose Amo(Cl-xi) hai chu Internal Evaluation hnuoi-a,unit test exam an nei mek.Result thra le lawm um tak a hung hmu ngei MT chun a nuom pui hle.

~ Joseph Songate,Bangalore-a kum 5 lai Cognizant ta dinga ringum taka sin a thaw hnungin,Mumbai(Powai) a Cognizant hai Office a sinthaw zawm dinga ditsakna a hmu leiin,ei ni Mumbai hmar hai a mi lo hung zaw’m ve tah.Tuhin Powai ah lan nghat phot in,Kalina tieng-a runhmun thar rem dingin hungin sawn lut vat dingin an buotsai.

Trongbau

“Tuisunsuo hai hih ka tongbau in la suo ve thrak nawh.Oldest youth sis hi lai hin ei um ve zinga”

Nk Irose Amo

“ Mi lawmpui ro,Computhar ka lo nei ve ta-a” ~James Daihmingthang(Computhar ti thumal hih Dai-a thumal hmudawk liu liu anih-Ed)

“ Khawsawt Gurup kha Khawli in suktawp sien khom,tuhin kei-in a thar kan din nok anih.Member a nuom(2) zom thei zing”

Tv Donald

“ Nunghak ei-in tlon/ei leng lai-a,in ring deuva Skoda ti-a an mi lo hi chu,a fu’k naw deu anih.Abikin Marc le Dai-a hai hi,lam-ah an mi ko in ring thei sie”

Tv Zohmingsang (The Skoda Driver)

“ ..a mak ka tih..mumbai tlangval han tu chen(2) a ka hlasak thiem an la hriet naw hi..a biekin a chairman pa Zohmingsang(Skoda) khah..a lungriem in a thlak-a,a nawk a dingin a mi ruot ve top”

Nk Lalruotkim Joute

“Mumbai tlangval hai ka ring nek dai-in,in lo PAKHAT lem,kar hmasaka ei conductor ni sien,voisun a mi ni leh.Thing umnawna-ah ruo a hma’ng an ti,ei nih”

Pi Esther Songate

“ Mumbai tlangvai hai,a biekin MT tlangval hai James Dai-a rawi-in,Kan inah in hung leng hin ka U hai le Monica chau in hrieta,ei ni khom hair stylist ei um ve zinga”

Nk Ramthienghlim (Gamsiangtho)

I Awi Am?

“Ei nunghak threnkhat, inthar an zuk in sawnlut chau,tui dawn ding zuk um nghal lo,LRT hai tui, bottle-a hang lak ding hlak chun an landlord nu an tri sie,who cares ti hlol in, an stroller bag inri ral rala keiin,LRT in an pan-a,thuomhnaw la dawk ni awm takin,an stroller bag a chun tui bottle sip tral-a thun-in,an dawn ding tui chu an hang lak thei ni awm tak anih.”

“ Ei tlangval pakhat,Lalthasang chun Donal anih a tia,Mobile phone, in-biekna-a hmang ta nek nek in,zan thla var ruon ruon hnuoi-a hla sakna in a hmang ni awm tak anih ”

“ Emergency Fund hih ngai poimaw seng-in,a poisa pek el ba’ka, ei ruol dang, a la hrie lo hai hril dar pei ei tiu”

Mumbai Tuisunsuo 11/01/09 Vol 1 Issue 20

NUHMEI

Lalthakhum Khawbung

Thumal pakhat, "NUHMEI" ti hi tuta truma ei artikul thupui ding chu ni el sienla.Thumalkhat chau khom nisien,hang ngainep el ding chi chu an nawh. Nuhmei thrang lova khawvel hmang ding ni inla chu, ei khing-in-bai hle ding anih.An poimawna le hlutna hang suichieng chun, a khata thupui a hang hmang khom hi a phu hlie hlie niin ka hriet.Ka thei ang tawka ka ziekfung chelekin, ei ringna innghatna Bible besana hmangin, ka hung thairang ve nelnul ding anih. Bible chun, "Tukhom nuhmei hmutu chun thil thra a hmu a, chun LALPA ditsakna khom a chang a nih." (Thuvarhai 18:22) a ti a. Nuhmei hi thilthra, pasal tadinga siem lieu lieu an ni a. A neitu taphawt chu Pathien ditsakna dawngtu ani zie chieng takin an langa. A hnuoia Bible chang hin nuhmei poimo zie a tarlang nawk zuol anih.

Chun LALPA Pathien chun,”Pasal ama khat chova um hi a thra nawh; ama thrangpuitu ding, an koppui ding awm mi siempek ka ti ie a ta. Chuongchun LALPA Pathien chun Adam chu inhniktakin an intir a; Chuongchun a in lai chun a nakru pakhat a laka, a hmun chu taksain a suksip a; Chun LALPA Pathien chun Adama inthoka a lak nakru chu nuhmeiin a siem a, Adam kuoma a thruoi ta a. Chun Adam chun, ”Hi zet hi chu ka ruhaia inthoka ru, Ka taksaa inthok taksa ngei chu anih: Pasala inthoka lak suok a ni leiin,‘NUHMEI’ ti ning a tih,” a ta. (Genesis 2:18,21-23)

Awleh,nuhmei hi anlo poimo tak zet chu ning atih, Bible a khom pasal nek hmanin nuhmei chungchang hi an ziek rawn lem niin an lang a. Pathienin nuhmei hi pasal thrangpuitu ding, koppui ding, insung indinpuitu ding,chi inthlapuitu ding le a chawimawitu dinga alo siem an ni a.A tawi zongin, nuhmei hi pasal 'SUKFAMKIMTU' an nih.Chuonglaizing chun, nuhmei popo hi an in ang vawng nawa, nuhmeithra le thralo an inkat nuk anih. An mizie khom ei hang khaikhin chun, inpersol tak tak an nih.Nuhmei hi pasal sukfamkimtu ei ti lai zing hin, nuhmeithralo/ invet chu a pasal tadinga 'Hlinglukhum' ni lem in, insung thriekdartu ani lem. Bible a "THUVARHAI" a'nthokin Nuhmeithra le Nuhmeithralo mizie/nungchang hang tarlang met ei tih:

NUHMEITHRA

@Nuhmei ringum chu a pasal ta dingin lallukhum a na,(Thuvarhai 12;4)

@Nuhmei var chun in chu a bawla,(Tv. 14:1)

@In le hausaknahai hi thlatuhaia inthoka rochan an na, nuhmei var ruok hi chu LALPAa inthok a nih. (Thuvarhai 19:14)

@Nuhmei thra ringum chu tun am hmu thei a ta? A hlutna chu lungmantamhai nekin an sang dai a. A pasal lungril chu ama a chun a ngampa a, thilthra tlaksamna hrimhrim nei naw nih. Ama chun a damsung ni popo chun, a thaw thra a, a sukthranaw ngai nawh. Pat le sahmul dam chu a zonga, a kuthai chun thafantakin sin a thaw hlak.(Tv. 31:10-13)

@Mi rimsihai tieng chun a kut chu a phar a; a nih, mi retheihai chu a kuthai chun a ban hlak.(Tv. 31:20)

@A insung ta dinga lampuihai chu thratakin a en a, thabona bei hrimhrim chu a fak ngai nawh. A nauhai chu an hung thova, ama chu a ham a thra an ta, a pasal khom chun, ama chu an pak a; "Nuhmei tamtakhai chun ringumtakin an thaw ta a; nang chun an rengin i khum vong a," tiin.(Tv. 31:27-29)

@Ditsakna hi hlemhmang a na, hmelthra khom hi teplo meimei a nih, amiruokchu nuhmei, LALPA tritu chu, ama chu inpakin um a tih.(Tv. 31:30)

NUHMEI THRALO/INVET

@Amanu (nuhmei suol) chun a thleirawl lai pasal chu a nghatsan a; a Pathien thutlung chu a theinghil ta a: A in chun thina chu an nghai zinga, a lampuihai chu thinaah: A kuoma fe chu tukhom an hungkir nawk ta naw a, hringna lampuihai khom chu an chang ngai bok nawh.(Tv 2:17-19)

@Nuhmei suol hmurhai chu khuoizuin a far a, a bau chu hriek nekin an nal lem si a. Amiruokchu a tawptieng chu sairam khakin a kha a, kawlhnam ngeituo angin a ngei a. A kehai chu thinaah a fe thla a,a kalchawihai chun Sheol a sir hlak.(Tv. 5:3-5)

@Nuhmei invet chu a hmur a thiema, ama chu a mawl a, Iengkhawm a hriet nawh. (Tv. 9:13)

@Nuhmei hmelthra lungvarbo chu, vokpui hnara rangkachak kutsebi ang anih.(Tv. 11:22)

@Nuhmei var chun in chu a bawla, nuhmei invet ruok chun a kuthaiin a thriek hlak. (Tv. 14:1)

@Nuhmei hrangsie le in puia um nek chun, inchung kilkhawra cheng chu a thra lem. (Tv. 21:9)

@Nuhmei awna zong le hrangsie le um nekin thlaler a um a thra lem.(Tv. 21:19)

@Raw ching nia ruomal thla hmerhmer le, nuhmei hrangsie chu angkhat an nih. (Tv. 27:15)

@Nuhmei uire lampui khom chuongang bok chu ana, a fak a, a hmur chu a hruk a, "thil suol ka thaw nawh," a ti nawk a.(Tv. 30:20)

A chunga ei hung tarlanghai anthawk khin, nuhmeithra le thralo mizie/nungchang chu chiengtakin ei hmu thei a.Nuhmei hin insung a mawphurna lientak an neia.Insung nun relfel hi an mawphurna niin, an relfel zo naw phapha insung a buoi hlak. Ei mimal insung anhoi theina ding chun nuhmeithra ei mamaw anih.Ei mimal insung anhoi seng pha chun, hril ngailovin ei sosaiti hung inhoi ngei atih.Nuhmeivar chun in inhoitak a bawla, a pasal le nauhai tadingin vanram a siem pek hlak. Insung inhoi chu VANRAM hnaitak ani si a...

Chanchin Lawrkhom

## Ruthi PG,kolivery kotlher bul el a innghat hlak,tlangval tamtak ta dinga,zuk lut kher naw khoma,lawmbula ela um ani leiin;thlamuong um khawp rak hlak chu,PG tha lem in nghatna ding hmu-in, inner-Kalina ti thei ding;Kalina–Kurla border tieng an lovin sawn tah.L-o-C a um an ta leiin, tlangval hai kha helmet le leng a trul el thei ding an tah.

## Unaupa Jim D Gangte&family hai chu khawsakna thralem ding in hmu-in,tuta Nunthieng PG umna thlang tieng tuta kar khan an lovin sawn tah.

##Vengtieng masi hmanga fe,Mumbai hung tlung nawk ta ei hriet thei po hai:Zoliensang Joute,K Lalremruata,John K Dulian,Vanlalchami.

## Vanlalhrietpuii Amo(U te te ti-a el hriet lar lem) chu nuhmei tieng natna leiin tuta kar tawp tieng khan a bawrsawmna enkawlin a umin,tuhin chu thrat tieng a pan nawk ti chanchin ei lo dawng.Ei tawngtaina na ah hrie zawm pei ei tiu.

Trongbau

“Kalina tieng ei hung leng suk de’k 2 a,a area a lien in mi ti-a,a ngaitho hnawt-a hung ei ni hi the”

Tv Donald Ngaite

“….Phareh Phareh…….”

Tv John K Dulian(Sielmat-Ngai)

“Monu in kutsebi a min buntir dinglai ka kut an thin chei(2) chu.Nervous am Kailash effect?Ka hriet bik ta nawh.”

Pu Lalrothang Tusing (Just inneithra)

“Kan PG umna thar hih an kil ta boka,hi taka la hung leng hram(2) hai hi chu,iem-a-nih,a um ti na an tal;in hriet thiem am”

Nk Eli Khawbung

“Ka U(Lienlal) hih ka pieng hma’n birthday vawi 20 vel a lo hmang ta-a chu,ka nunghak hnung chen khomin birthday a la nei ta rawp.”

Nk Mary (PG Nurse)

“Ka Room Mate hai khom karnawk an hung ta ding anih” (A Room Mate hai hi a U nu le a Pasal an anih)

Nk Lalruotkim Joute

“Mumbai-ah saphming nei hi in buoipui veta,kei chu Mumbai ka hung hma dai-a saphming nei kan tah.”

Ms Julie Lalnunthieng

“Kei lem chu ka pieng hma dai-a saphming nei kan tah sawn naw.”

Nk Eden-par-mawi Khawli

Mumbai Tuisunsuo 04/01/09 Vol 1 Issue 19

CHRISTMAS 2008 THLIRKIRNA

Darzakhum Songate

Christmas a hung hnaia, vengtieng u le nau tamtakin an mi suoksan khan Christmas ei hmang thei di'm aw ti inlauna rieu ka lo nei a. Eihang inrawn kuol vel khan mi 20/30 vel chu a hmang thei ding um tho ei tih ti dam ngaidan nei an uma. Ei hmang ding an chun Powai Income-tax Colony ah Quarter nei pahni ei uma, hmunkhata thlaisuonga,hmunkhata inkhawm inla ti ei hotu Pu. Lalthrakhum le Tv. Joseph Joute in ngaidan an hung siema. A rem hle baka in neituhai khawm inpezotakin anlo inphala,Christmas program chu ei hang siem ve nawk nawka,a hlawtling dim ti lungrila umzing pumin.

Thingthakni a hung tlung khan Christmas hmang ding mi ding mi 50 chuong ei um ding anti chun, lungril a buoimap! Hi zat ei um ding chun Hall hawding lo ngaituo awm ani veile, Jehovah Jire! ti ve tawp in thilbuoipuituhai le kan inthre rikngawt!

Program dar hni ti kha minute sawma inhnu'n kan tlunga an hmapawl ninaw ni'm intichu kei khuongpu taka in ngai thrungna ding khawm ka chang ta nawh.An hawi kher ngei ie! Mi an hung pungpei,inneitupa Pu Stephen a hmai sa hlat hlatin chair haw ding ngaituo in annu Pi Joyce in a thrungna hmu hmu kha Bathroom le Kitchen chena remkuolin a lo buoi ve bawk. Tuoltevanglai-a inkhawm intar tak, truong a chim khawma hnuoi tla bik um theilo ang kha kan nih.A tawpa chu Pu Darthangluoi in naupang po tir dawkin mi threnkhat a keng naw hai le staircase ah a van thrung pui hlawl.

Pu Lalthrakhum( Buonga) rawi, naupang Sunday School haiin hla le Bible chang an hril chun mitin lung a tawk hle.Ei Fellowship Chairman, Pu Ramthang Amo khawm a hnuk a ul amani aw ti thei hiel in naupang hieng thil inchuk pawimaw zie a mi hril pek nghal.Andheri thralaipawl haiin hlapawl a bass inthawk a tenor chen kimtaka mi paruk vel chauvin anmi sak pek chu a ngai an hawi ie. Hla pahni kan nei an ti-a,pakhat anmi sak pek hman trawk.A dang pa kha ngai chak a um kher.Chun ei thuhriltu Pu Jim D.Gangte sermon kha vengtieng mi haikhawmin ngai phak ve hai sien nuom a um vawng vawng ie!

Ringnekin mi ei tam khan ka lu ka ngha vela, vel thum lai mi umzat ka tiem hnungin fatu hai le inneitu hai rawn kuol dingin inkhawmna a inthawkin ka fe suoka, fatu fel haiin fak ei indei dingzie le inneituhaiin hieng ringnawtu hai in an mi chawkbuoinaw na dingin thil kanhril felsa anih anti chu lungril an thawl huoi.

Zantieng nisa nep hnung le thli hrang diel dielin mi mut meka Powai Lake en puma Pu Stephen ah in terrace, sawng sari chunga Christmas hla ei sak ang kha chu thil la umngailo le um nawk thei khawm ka ring ta naw.An hawi ngei el.Christmas khuongpu kani phutna anih. Hla inzawttu Nk. Zari (Miss hlui) le Nk.Monica(Miss nilai zing) in khawsawt em emin van nghawr rak tawka Renaissance Hotel le Powai Lake Bethlehem le thlir kawpin hla ri North East chen fang phak din an mi thruoi bawk.Ei rawlmawi thangkhawk kha lungrila chen khawm cham sawt hle'ng atih.

Tv.Lalthrasang le a ruolha'n bawngsa le vawksa suongkawp,vawksabut,arsa but le thil dang dang anmi siempek khan ei hnuk a suk tlei hle;ruoi a ruola ei thre theinaw inlakhawm.Mo thar Pi Merina in ruoithre zova a sawl dingzie kha ngaituo tham anih. Sielmat, Rengkai,Gujarat etc fe hai kha chu lenglai chan ang in nih.Mi 60 chuongin Christmas ina hawi takin ei hmang anih kha. Siemtu inpakin um rawhseh!

Hieng ang reng reng Christmas hi Mumbaiah ka hmang khawm ka ringphak ngainaw, hmangnawk thei ding khawmin ei um di'm.An hawi ngei el.Hmar Cristian Fellowship in Mumbaia a hmalakna hnuoia Christmas ei hmang phutna anih, kawng iengkima lungril a tawkin a hlawtling em emni'n ka hriet. Mi sawmruk chuongin lungruoltakin Christmas ei hmangtlang ani kha.A lo thrang ve naw hai chu Lenglai chan ti inla, khel ni kher naw nih.

CHANCHIN LAWRKHAWM

## Monica Lalneivar(Miss Mumbai Hmar 08) le Roslyn hai chu Hostess sin, Firangi Pani Restaurant,Andheri ah an lo hmu tah.Chuong ang lo deuvin Joseph Joute khomin Philips DVD Player tharhlawk,DVDa play chu hrillo;pendrive chen khom play thei a lovin chawk thruoi tah.

##Tarik 31 December 2008 khan Pu Jim D Gangte inah Kumhlui Inthlana Prokramsiem ania.Hi taka hin mi 25 vel-thralai thral- fe khomin,hunser ursun taka hmang anih.Pu Jim in infuina thucha thralai hai ta ding hrilin,inhlantharna le suol thupha chawina siem a ni a; hi inzawmin lekha-raw-hmangna hunser nei ani bawk.

## Christmas le Kumthar hmundanga hmanga fe a,Mumbai hung tlung nawk ei hriet thei po hai:James Daihmingthang,Pu Luoia & family,Marc Lalrohlan

##Pilsung Academy in Taekwondo Competition a huoihawtna hnuoi ah,ei nunghakte Emily Roneikim Songate chun category pahni(2) a, a pakhatna le a pahnina dawngin,Gold le Silver Medal inhlan anih.MT chun a lawmpui hle el baka,a suong em em bawk anih.

## Chanchin ei dawng danin Pu Jacob Lalmalsawm Shakum le an nu Merina Zonuntluong hai chu karthar tieng khin,Honey-Moon ni fahranin,Delhi tieng inzin ding in an insingsa.

## Hun sawt tak ei ni lai chawl hmanga a um hnungin Sylvia Sangnunmawi chu hungtlung ding tarik 10 January 2009 hin a sin thawna RCCL zawm nawk dingin,Puerto Rico pan nawk a tih.

## Tv John K Dulian chu hunsawt tak veng tieng a hang James Bond hnungin voizan hin Mumbai hung tlung nawk ta’ng a tih.

TAWNGBAU LAKKHAWM

“ Christmas ni a Andheri choir a ka thrang kha,mak in lo ti vieuva,ei Skoda khal inchuknaa,ei van hmel hriet pui vawng hai.Ei ni tulai chung tieng chau ei ngai tuo-a,Mid Night Service za’n khom khan in suol po po ka raw hmang pek vawng cheu ani kha.”

Tv Zohmingsang(The Skoda Driver&Burner)

“Mumbai a hin a mi ngainatuo an tam ka sawna.Thenmuol ka tlung hnungin tukhom a mi hung phone um reng reng lo cheu.Thenmuol a hin phone connection a um ve tho ani aw…”

Pu Lalrothang(The Prince)

“Sielmat thlalak ka hung phur rawn taluo-a,abiekin Sielkhawpui nunghak thlalak,Daihmingthang ka hang en pui dek dek chu,a en khom kan en zo hma’n,a mobile phone a ticket zuk book a tum nghal el……”

Tv Marc Lalrohlan (Mumbaiah luck naw leia veng fe pa)

“Cooker in mi ti nek thlawt chun Samu Hawng mi ti lem ro..veng tieng khom ka ang an mi ti tho.”

Nk Hmangaizuol(Daw-te)

“Thralai threnkhat hai kumhlui inthla dingin ei fiel cheuva,hlak chu kumthar hmang dingin in hung tlung chauva”(MidNight Service-a a thuhrilna-a,a hrilsa anih)

Pu Jim D Gangte

MHWA EMERGENCY FUND

Tarik 12.12.08, a Mumbai Hmar Welfare Association (MHWA) Office Bearers inhmukhawm thurel ang dungzuiin Mumbaia eini mi umhai ta dingin MHWA EMERGENCY FUND (FUND, a tawi zawngin) tarik 01.01.09 inthawk hin indin tran anih.

Hi FUND thiltum le inenkawldan chu a hnuoia ang hi ni’ng atih.

1. THILTUM: MHWA memberhai Mumbai le hmun danga sietna tawpkhawk tuok hai le an sung le kuo Mumbaia sietna tawpkhawk hung tuok pal hai sawmdawlna dinga sum le pai inkhawlkhawm.

2. FUND ENKAWLTU DING : Hi FUND hi MHWA in enkawl atah. A sum hi Finance Secretary kuomah submit in treasurer in kawl atih. Welfare fee le inkawp lo in lekhabu hran lieuva sum lut le suok hi ziekin um atih. Sum hmang hun le hmangzat ding thuah khawm MHWA in thu nei bawk atih.

3. MEMBER NI DAN LE A BO DAN: MHWA member nilai zing a nuom taphawt hai hi FUND ah membership fee pe hai chu FUND member ni’ng an tih.

Member nilai kumkhat chuong anzawma Mumbai puoah umhai chu an membership nina an hung kirnawk hma po temporary in bo atih. Chun an trannaa membership fee pe, peknawk ding ti huna pe nuom talo hai khawm an membership nina chaan antih.

4. BENEFICIARIES: Hi FUND ah member nilai Mumbai annawleh hmundanga siet va tuok hai le member hai sung le kuo, Mumbaiah siet hung tuok hai huom atih.

Sung le kuo ti hin member hai nu le pa, unau piengpui, kawppui le nauhai, Mumbaia siet tuok, chun siet tuok hma kumkhat sung sum lamna mumal neilo hai chen ah kawk.

5. SUM HMANG HUN LE A CHINTAWK: Beneficiaries hai siet tawpkhawk tuok huna a hnuoia an tuokna hmun ang hin an chunga sum hmang thei ni’ng atih.

North East puotienga …….. Rs. 45,000 chen

North East sung mani state umna puotienga … Rs. 25,000 ;;

Mani state umna sung mani khuo niloa ……… Rs. 15,000 ,,

Mani khuo sunga …….. Rs. 10,000 ,,

v. Chun beneficiaries hai damnaw mangang tawpkhawk beiseina umta loa veng pan trul chu vuongna kalman, a tamtawpa Rs.45,000 chen mani le a fepuitu mi pakhat, economy class( a thei chun) an fe intranna hmun inthawk airport veng hnaitak chen tumpek ni’ng atih. Chun kalman hi FUND hin a pek hnunga siet tuok hai chu sum a hrana pek bel ninaw nihai.

( Note: Sung le kuo hai chu Mumbaia siet tawpkhawk tuok le Mumbaia inthawka beiseina umta lo a veng pan ngai hai cho thrangpui thei ni’ng antih).

6. SUM HMU DAN : Member ni nuom hai chun membership fee Rs.500 pek a ngai. Hihi a nuomhai chun vawikhata pek thei anih. Nuom chun thla nga sung thlakhat ah Rs. 100 pei khawmin an pek thei. Mi pakhat siet tuoka ei seng tam theitak Rs.45,000 ani leiin, sum hi Rs.50,000 hi nei tum phawt anih. Kumkhat sung hizat hi ei nei hmannaw anchun, FUND enkawltuhai in dawlsap dan ding a kumnawk ngaituong anti. Rs. 50,000 le a chung tieng nei huna chu beneficiaries hai siet tuok leia seng a umnaw chun sum peksap ngainaw nih. Sum Rs. 50,000 hnuoi a thla pha, FUND enkawltuhai in member lai dawlnawk dan ding riruong atih.

7. SUM INDEINAW HUNAH: FUND Rs.50,000 hnuoi a umlaia siet tuokpal hai chu kuta sum umzat ang pek ni’ng anta, a neka tam beisei thei ninaw nih. Chun aruolin mi pakhat neka tam in siet anlo tuok pal chun, kuta sum umzat kha FUND enkawtu hai in anruol thei angtakin sem antih.

8. INENKAWLDAN THLENG: Hi FUND hlawthlingna le a thratlemna dingin MHWA in a trul angin FUND invawng dan hi siemthra in thleng thei atih.

Darzakhum Songate
Chairman, MHWA

Stephen C. Hmar
Secy. MHWA