NGAITUONA LENGVEL - Rohming Khobung

Rohming Khobung

Ka neka var le thiem lem, tawngbau hausa lem le tawnhriet(experience) hau lem mumbai a ka unau le member pui hai hlakin,’ thaw ta’ng e’, in ti bawk si naw leiin kei, hmel phu loa chut hin mani ngaidan le ngaituona, a mawl ang2in hang thlasik ruonal(rawva?) puokpui nawk pawp2 el ei ti aw..

Ka chinlai (ti ve khanglang inla,)a ruol ‘U’ deu hai khan cowboy film kha an ngaisang a, khang hun laia tlangval hai lai khan lukhumparh kha an lar pha hle bakah tlangval taphawt kha chu zak inkau deu tan,

HRINGNUN - Rohming Khawbung

Rohming Khawbung

Zantieng vawikhat chu, buthing le kurtai dawmin kan in sir lai chun ka lo ngir a, ka u (cousin) pakhatin,’ehe kekawr khawm bun loin tuola I ngir a, I nengneng kha ka lak pek dai ding che,’ ami hung ti chuh, baklengin ina ka tlan lut a, ‘pi ka u in ka neng2 ami lakpek tum, kha thup vat rawh,’ tiin ka kurtai chawi chu ka pi(fam) chu pein a kuomah chun ka zuolko a. Ka pi hlak chun innui ker2in,’ a iengdinga lakpek I tum?’ tiin ka u hung lut chu alo halfiem a, kei hlak chun thawfuk inti fahranin ka pi sira chun ngirin an rum thei ang takin a khem damin ka u chu ka lo mel ve bawk leh, ka u hlak chun inza fahrana khek tuorin,’boi neng2 khawm ila hriet naw ni maw?’ti a a suok zo chun, ka pi chun ‘kha fa vat2 rawh’ tiin ami pek kir nawk nghal a.

(neng2 kha ka kurtai chawi kha ni loin, kum 30 zet ei leng ve vang ta hnung khawma’n hih, a khata chel lova lan zun thei chuong lo hi a lo nih ti kha lo lan hre ve tlat lo chu, haha ). Kha tum lawma ka u ka hnam dan le ka neng2 chan kan lau dan kha aw.. Kum 20 hnunga ka hang ngaituo kir nawk chang hin, khang panglai hun, a sie a tha khawm la hre mumal lo, nu le pa chu iengkim ei dit le ei nuom2 mi thaw pek thei dinga ei ngailai hun, lungril thienghlim taka hringnun a suk a tung ei lo hraw lai hun khan lung chu a min leng ve hlak e. Ei khawvel kha pansak panthlang, inkawl le vel le sikul trina nuhai le a neitu hai hriet inlau taka mi dil a tui van hlieu kha ani deu top el a, in ei hang luta, buthing dawm ding alo um lem khan chu khawvel a khan hang engto em2 ding kha a um ta hranpa nawh. Sunghaiin bawngnene phit(powder) I bar ruk rek ta ni maw? an mi hang ti a, ‘guk nawh !’ ei hang ti khu suih hun lai, hnap intol pir pera motor acid puontieka in chiea ei liekruk hun hai, rem le rem loin trukri sungah an min lut tir a,’khawvel invir I proof nuom tak2 maw?’ ti a ruol u lem haiin an min dawn a ’AW’ ka ti char le inruola sikul tlanga inthawka an min hlum(nam kui?) lai hai dam khan, ei khawvel hmang kha tulai thumb generationa naupang lem hai tadingin ‘thring’ ni sien khawm ei nun kha a boring ve zung2 naw a, ei khawsak hai kha harsa in rethei inla khawm ei nun kha a va hlimin a lova thienghlim si de aw. 

Khawvel sik le sa a hung intlak a, hna hlui hai tilin hna thar a hung in der a, chu ang bawkin khawvel mihriem hai khawm ruoltha thenkhat le hmangaitu thenkhat in fam ro lungmuol an mi lo liemsan a, eini hlak chu duthusamna khawvel, du ang kim si lona hringnuna hin ei lungawina ding zawng reng2in ei damlai hun hi khingbai taka hmang peiin hieng ang hrim hin eila hmangzo awm si a, hmatieng hun hlak chu ei thu a ei rel thei ni lo, hun liemta hnung le nunhlui ngai re thei tak2 chuong loin ei khawvel hringnun hlak chu second tin hmang zo a chatuon ram min hnai tir peiin hmatieng ke ei la pen pei chu ani a. Hehe ke hi pen pen ei ta, ei chawl hman hma in tawp nawk dei ei ta, ei tawp phat hlak chu ,’ a sa a na’ or ’a thienghlim e a thienghlim e’ tiin a pakhat lem2 hin chawl loin khek nawk char2 ei ta. Ei tawpna hun ding hlak chu ei hriet si nawh, ei ringna le innghatna thupui hlak chun iengtik lai khawma’n hung thut thei ran ani leiin inring zinga um dingin ami ti a, chulai ran chun ei inring naw lai tak, rukru angin a hung ding a mi ti pek nawk angreng si, rukru anga a hung ding ani si chun rukru hai hlak chu mi har lai le inring lai an che ngai bawk si nawh,huizz.. inring zinga ei uma ei in ring naw lai tak hung a tum tlat bawk si chun a tu lem hin am eiin chan fuk lem ding chu maw..ti dam ka ngaituo chang hin chu kei, aizawl English medium a khawm ‘C ‘ as in cherry pheikhawk nawtnala ti traltu tlunglu hi chu an hai ve mep hlak. Hringnun umzie tak hi iem nieng a ti aw tiin phak ang tawk2in amin ngaituotir ve hlak a, hi ka hringnun bul tan nadinga a ropuizie le themthiemzie hai chenin a min sui tir hlak. Mihriem taksa bung le peng hrang2, le thisenzam samzai khawm tiet lo in rem kawkal rek ruk, sienkhawm buoi thak lo a an thaw ding ang seng thawka an hang insuikhawm dan dam, thil tha le sie hriet hrang theina lungril ei nei dam, khawvela ei la hmu ngailo le hmu phak lo, nachu a um ngei ani ti ei hriet theina lungril le a hmelhmang le phiengphung ding awm chena suongtuo thei a ami siemna rihngawt khawm hin a ropuizie a min hriet nawn tir nawk hlak.

Hmelsie an um a, hmeltha khawm an um bawk a, I hmelsie ti chu ka ta ding chun hi takram khawvel anthawka suongtuo khawvel chen khawma a neka thlang lem ding um ta chuong lo khawpa tha ani thei, chu ang bawkin I hmeltha ti chu ka ta ding chun tawngtaipui ngai hiel khawpa sie ani ve thei tho bawk. I neka ropui lem le var lem, invet le mawl lem tiemseng lo an um, sienkhawm siemtu themthiemna zarah hi khawvel lo um ta le la hung um nawk pei dingah I tlukpui chu nang char kha I um, midangin tha an ti le tha a an hriet an thaw kha I ta dingin a tha vawng kher nawh. I hringnun khawvel kha I ta a ni a, tha ni a I hriet le tha I ti chu thaw la, midang mitmei veng kher naw rawh. Sienkhawm ‘tha I ti chu thaw la’ ti lei el khan I nuom2 thaw chuong kher naw, hi khawvela hin nang chau I cheng naw ti I hriet kha. Siemtu ropuina le thilthawtheina vawrtawp infunkhawmna, khawvel varna le thiemna in a suisuok phak ngai lo ding, a masterpiece chu nang mihriem, chatuon hringna neia induong ngei kha I lo ni e, chulei chun siemtu’n ama angpui tho a a siem I mihriempui dang hai I chunga leng ding an um naw a, midang hnuoisie le hmusit thei khawm I ni bik chuong bawk nawh. I ta dinga tha I hriet ang tho khan midang ta dinga tha I hriet a, I chengna khawvela midang la hung cheng pei ding haiin I hming an la hung hriet pei I nuom chun nang le I chipui hai tadingin thil tha va thaw la, hringnun umzie hi I phak ang tawk2in va zawng ve ta..ei hang ti ve deu duot ani chu teh..!

(rohming@ymail.com)

HLAWSAMNA HI HLAWTHLINGNA DING LAMPUIA LUNG LO UM HAI AN NIH. - JEFFREY JOUTE

“Success lies, not in avoiding failures, but in overpowering them. Success lies, not in never failling, but in getting up every time you suffer a fall.”

Jeffrey Joute

Hlawsamna ei ti hi, Hmangruo maktak el ani a, Mi thenkhat ta dinga beiseina popo suk tawp thei tu, thenkhat ta dinga thina run in thlun hlak tu, thenkhat ta dinga thabona tuipuia suk pil hlak tu ani. Mi’n a lawng an tawl lai zing a suksiet a; tuia an pil tir hlak ani chun, Khawvela thiemna tieng le a thilthaw na reng reng a hlawtling ngai naw ni a, ama le ama in sukbuoi in tuia tla veng a ta, vapang an hliu kai na ding chun a tha le zung, an hlieu thiemna le a lungril a hmang a ngai ding anih. Chun a lung a suk hnuol a, thang a lak naw chun khawvel ata ding chun a tawp tawp ding anih. Chuonglaizing chun mi’n a thaw thatnaw na hre a, lunghnuol loa a tha le zung, an hliu thiemna le a lungril hmanga thang a lak ani chun vapang chu in hliu kai ngei a ta, A thiltum chu a hlawthling ngei ding anih.

Hlawsamna hi inchukna khelmuol (Trainning Ground) thatak ani a, hlawsammi (Failures) hai hrietthiem dan min chuktir a, hlawthlingna thatak lampui hrawdan min chuktir hlaktu ani bawk ani. Ei hlawsamna hai hi temporary setback ang mei meia ngai a, Teimakna, tumruona le ei thilthawna taphawt ah mi hai chunga umdan min chuktir lem hlak tua ngai lem ding anih. Ei hlawsamna a hin ei tlusawng ani chun ei hmatieng chu lampui intung ngot in mi nghak ata, Lampui suk reng reng hraw zai rel ngai nawng ei tih. Chu lei chun hlawsamna hi a um ding ang renga ngai a, hlawthlingna lampui ei hraw mek laia lung lo um hai ang mei meia ngai ding ani a, lo in sui pal inla khawm in suk har thara tluk mei mei tum loa fe pei ding ei ni.

American hmingthang Coulsen Kernahan chun “ Our greatest glory is not in never failing but in rising after every fall” a ti ve tlat. Hienga mi inlar le mi ropui tak tak hai khawm hin hlawsamna hi an lo tuok mawl hlak ani ti chu ei hmei naw khop el. A quotes a inthawk hin mi thiem chungchuong hai khawm hin hlawsamna changalhme chu anlo in tem ve vawng ani ti chu an lang ani. Mihriem hin thlukna tamtak ei nei ani, ei nitin lamtluong hraw a hin, ei tlukna hai hi ienglei am ana? Ti a mani le mani in question a, ei question bawk hi ei dawn thei hun a chun tlu ngai ta naw’ng ei ta, ei tumram chu ei tlung zie ding ani. Samuel Smiles chun “ Success grows out of struggles to overcome obstacle. If there were no obstacle there would be no success.” A ti ve nawk thung a, ei hril ta ang deu in ei khawvel inelna ram a hin, ei inchukna tieng ni le, ei thil thawna tieng, sukbuoitu (obstacle) tamtak ei hrawsa ding anih. Thenkhat ta ding chun ei ngaizawng hai, ei zu dawn hai, ei ruol hai, ei ball pet hai le a dang dang hai hi obstacle an lo ni hlak a, Hi taka ei thil thaw nuom zawng hai hi ei hlawthingna ding chun ei ngaisak naw met hi a ngai ve hlak ani, Rinumna khela Malsawmna an ti hlak kha… I zu dawn leia I lekha tiem I bahla pha nek chun zuk in suom dep la, exam zo tieng I dittawk in I la chen thei an nawm. Hlawthing lem bawk I ta, Sum broke naw pha bawk I ta,I hming tha sawt bawk a ta, A va hang tangkai lawm lawm!!. Hlawtlingna hi ei nuomzawng thaw hai le inbuonpui (wrestling with insurmountable obstacle) a hung suok hlak ani ti chu lo hrieng ei tiu.

Tekhi thu pakhat zuk la nawk zawk in la, America President inlar (L) John F Kennedy khawm kha II World War lai khan a chuongna lawng in tuoksiet a tuok a, ama ngei khawm a zangruo le a taksa thenkhat a hliemna tamtak a tuok ani, tukhawm in a tho pei khawm an ringnaw ding khop a hliemna a tuok khawm khan a hliemna hai chu tumruona thlipui in mut dam tir in, a tuorselna le a tumruona in hma a thuoi a, a thawding hai chu hlawthling takin a la thaw tho tho a, chu a tuorselna le a tumruona chun hlawthlingna cho nilo in Ropuina leh a thi chen khawma a hming inlar na khop ding a la huot dawk tho tho ani. Hieng hai ang hin, mihriemin ei thiltum hai hi tumruo taka thaw trang trang a, lunghnuol el loa ei tuorna hai sirah hnawl a ei thaw ani phot chun hlawtlingna chu a lo a lo thei dingin ei ban phak tawk ah a um ran ani ti chu chieng deu in an lang anih.

Nangma ah thabona, lekha tiempei naw na le lungril ruok taka sukbuoitu I lo nei pal leia hlawtlingna I chang theinaw ani chun ei Pathien hring a um a, I nuom hun huna I biek thei, Balance thun ngai lo, network thanaw leia in biek thei lo hlak um lo, broke em lei a biek theinaw hlak um lo, nuom hun hun a, I remchang dan I zir a I biek thei ami siemtu ei nei a, Ei Bible chun “Hnila pek in um I tih.” a ti kha, Kristien ei ni hi ei vangnei biek ani ti hi hre hmai pal hlau ei ti in lau a um khop el ani. Ei weakness a haia mi thangpuitu ding iengtiklai a inlusu ngailo Pathien Hring ei nei tlat si a, Chuleichun nang le kei hi Hlawtlingna ei dit a, ei mamaw a, A mi siemtu ei Pathien chun a mi siemfel pek sa vawng ani; ei thaw ding chu mani sin chit a ringum a, ei thilthaw hai hi indiktaka ei thaw a, ei Pathien lawmzawng a thil ei thaw ani phawt chun I thaw na na ah hlawtling dingin insiem top rawh. I lo hlawtlingnaw pal ani chun I Pathien ti angin Ila um naw ti in inngai rawh. Iengkim thawthei chu ami siemtu ei Pathien hi ani sia……

saihmanghmar@gmail.com

IN TIENG PAN TRAIN - Stephan C. Hmar

Mumbai Local Train-a chuong hi ka nitin routine ana chu rinum ka ti a, thlakhlana ka nei ngai nawh. Kei chau ni lovin mi dang khawm an ni ka ring.

          Ei hriet seng ta angin Mumbai Local Train chuong chu neka dung insanglem hai zak rim ap taluo inhnamna a na. Kei lem chu, ka chuongpuihai ka neka dung insanglem deu vawng an ni hlaka, zak rim ti vel hi chu variety dang dang inhnam ding ka hnieng-in-hnar thei khawp el a nih. Neka dung inhnuoi lo umve sun hai hlaka, an lurim thum taluo’n hnarkuo inphalam thak lovin an hung in attack-tir nawk a. Ringna rama ei unau inhnaipuitak pangal-hai hlak, ei hei chuongpui changing, tienlai Mosie chanchin annawleh Leviticus hun laia an inthawi dan inchuk ve ei nih ti hre chang lovin, an khakhmulin ei hmai an hung inhruttir sal sal lem nawk nghal. A chang chu an khakhmula mana, thenvir a, train kawtkhara deng dawk pawp pawp ka nuom hiel chang a tam. Hieng  hman hin a rinum hle tah ti nak karah, ui chal hawnin, uipui ngainobei tawk tak inchua an innghar tuo ang elin, pa le pa, nu le nau nei zel zul ta haiin, ke bawpkhat chau hmun inchuin an innghartuo zing bawk. Hui Ha! Train chuong tak zet hi chuh! Tubou le doulung inkara inzep ang hlawl a nih.

Hringnun tluonglam ei hraw laia rinumna ei intuokpui tamtak hai hih, theida a awl a, ei pathien, trap chier hla inzawt khumna taka hmang khawm a awl hlak a. Amiruokchu, ei ngaituona kawtkharhai hawng lien a, ei ring pathien thu leh ei suimil chun, umzie le manhlana an nei seng a. Ei nun rama di’n inchuktirtu an ni seng el hlak a nih.

Kei khawm, train chuong hi rinum sien khawm, intieng pan train a chuong hin ngaituona danglam tak a mi pek hlaka, ka ngaihlut pha hiel a nih. A tu el ta ding khawmin, ei runlum chit a lo hlut chungchuongzie le hi khawvela ei inzin zo pha, ei chatuon in inhawi, khawvela ei in let tama inhawi lem la thlung dinghai ei nizie a min chuktir a nih.

Office trinin, ka intieng mi phur thlungtu ding Train ka hei chuong pha, ka ngaituona po povin “In ka thlung pha chu” ti ngawt a suongtuo hlak a. In ka thlung pha chu, ka lungdit leh inhmu nawk kan ta, lungril hmunkhat, tui anga luongkhawm chu chen nawk kan ta. Chu pha chun, a hmin a sel, an hnik an hniknaw, a mawi a mawilo haiin umzie nei ta lo ding an na, tiin ka suongtuo hlak. Hi ngaituona hlimum hin, vai kara thlantui far thlawk thalwkin inzep hlak lang khawm, a mi thlamuon hlak a. Mu’n ar a laka, hmun fienriel a panpui ang hin ka rinumna chu lak hmangin a uma, ngaituona paradis ka chen hlak a nih.

Ka chuongpui vaihai ka hei mel hret hret hlak a. A then hmel fai tak tak an na. A then ruok chu, hmel burip tak tak, an hmaiphek chite sunga sietna pa si-saw mawng dawk vawng dam an nih. A then, hrisel le vanglaini chena, nga sanghal inper anga um trawk trawk hre lova inper inper dam an na. An ni lai chun, tar, sam var le hmai vun trawm kheng khung an inthung ve hlaka. Polythene hin thil an khit bawk trawn a, in an thlung phata an tu-le-tehai lawm dinga an hawn ni dingin ka ring hlak. Ka hei ei chet chet tawl hlak a. Nghaknu’n par huon chite sunga par chitin a khawi khawm ang ela in ang naw vawng ni hai sien khawm, mawina inang pakhat an suklang tlatin ka hmuh. Chu chu “In thlungkar nghakhla mawina” a nih. Chu pha chun, ka lungrilin, “Kei chau kan nawh ie, inthlungkar nghakhla hih! Vaihai khawma, an runlum, an zalenna, an lainahai chengna hmunin an lunglai a kham vet lat a nih” ka ti hlak.

Hei ngaituo inthuk ve hrim tum. In tieng pan train-a chuonghai angina ei chatuon in panin nitin ringna lawnga intawl ve pei hai ei ni naw am a nih? Ei lawng chuongna hai hi, a ralmuong bik naw a, thlipui le tuifawnin chawl lova a nawt a nawt hlak a nih. Sienkhawm, khuolzintu’n in a thlung phata an hawi dingzie a suongtuo phata, a sawl a dam huoi angin, rinumna phul pik tak hnuoia inthawk hin ei chatuon in ngaituo ve hlak ei tiu. Nitin ei hnai deu deu a nih. Nikhat chu la tlung veng ei ta, Angel ha’n a kawtkhar mawia mi lo tuok ven’g an ta. Ngai ngawi ngawi puma ei the tah, ei pahai dam, ei u-le-nau, le ei lungdit po po hai, dam le hrisel takin hmu nawk ei ta. Hnung tieng reng ngai ta lovin, ropuina nun phamin chatuon chatuonin ei leng ta ding a nih. 

NUHMEI - Rohming Khawbung

Rohming Khawbung

   Lam sira nuhmei hmeltha elkhen thlalak chu mit insim meu a ka kutchala khik in iengkim thawthei kuoma chun, ‘khing ang chara hmeltha le piengnal khi mi hang pe ta,’ tiin ka hang hni tawp a. Ka khik ngai chu khik ranin ka hang Amen chu leh, EKHAI..RAJNIKANT..!? Anithei lul nawh e, Lord plizzz CTRL Delete..! Ka chuongna auto, a khaltu am a upa ding a auto lem khawm hriet hran harsa ta khawpa tawng, traffic jam leia chu nu thlalak zawn taka ngir chu ka mit in sim kar chun a lo intawl phei meta, a khel lema Rajnikant thlalak zawna chun alo ngir ta lem chu lo niin..huihah ka hnih suol chieng kher chu ti..!Ka hni lem nu khan,’rohming nang leh runhmunah leng ka nuom ie,’ mi hang ti sienla chu,he.. kei butter le cheese neka sathu le bekanthu du lem, eucalyptus buk hnuoi neka inkhieng le lamkhuong buk hnuoi thlakhla lempa hin, thinlai tui ang nem diei in bie zai nemten ka hang in hlan ding bah..!!Hni hlawtling ngat lem lang chu ka suol po2 sim vawng ka tih, on the spot, eh. Sienkhawm ka nu’n a monu a hang titi pui thei naw ding ka hang ngaituo ruok chun hni zawm lo chu tha ka ti ta lem a.

   Ka pa’n,’Boi nuhmei hi hmeltha rihngawt zawng loin lungril tha zawng lem rawh, hmeltha hmelthat suong a sawt ngai nawh,’ ami ti a, kei chun, pa hmelsie hmelsiet suong hi a sawwt em annawm ka ti pek a. Ani taka, kei lungril neka phingpui hrat lem pa hin iengtinam nuhmei nungchang tha chu hrie reng ka ti..? Pasal ei lung a sen leh zaidaw takin an mi tlem a, ei lungawi phing leh an in hmur ve thunga, I hmel a tha, I fel bawk si tiin hang duot deu inla an min du khum a, I hmel a sie tiin hang indu khum ve thung inla hlak chu huizz..khawvela hmelsie tak, indu le misuol tak kha ei chantawk chu ani der el..Aigupta anthawk Israel nauhai thuoisuok anni lai khan nuhmei hi iengza reng am an um ti ka hriet nawna le an mizie ka hrietchieng thei nawna hi inzat vel ta hrim atih. Siemtu’n hringna neia a siem lai po2 a chu an ropuiin an mak tak awm hiel e.

   Tharumah pasal tluk naw hai sien khawm, thiemthila le thluok hmangna a chu khawvela mi var tak khawm thiem takin an thu hnuoiah an sie thei a, mi hrat khawkheng le pa rorum tak2 hai khawm nuhmei hmaa chu an innem zawt2 el ani hi, nuhmei pakhat leiin ram le ram an indo a, khawvel ni thla seng naw a rorel nek chun nuhmei pakhat thlang lem ani a, eini ang, varnaa mimawl tak hai khawmin khawhri tuibur ei lo hmuom zeu chang a poisak nei maleka eiin hram mai2 lai khawmin mi pakhat lungril chu suknat eiin lau nawk tlat tho ani hi. Hieng khawpa ropui le mak anni lei hin pasal hai tading chun two wheeler iengkima iengkim, malsawmna a khawm malsawmna vawrtawp anni tawp el anih, nachu malsawmna ti leia sawma pakhat anga hang pek chi chu anni nawk chuong bawk si nawh..heh. Awm innem lem e ti lo chun pa sek/muk tak2 hai khawm ‘thaibawi’ title an inhlaw tir pawp2 el annawm.(Thaibawi hai hi mi huoisen anni ka ti ve tlat, a san chu zantin an ti(tri) tak hai kuomah an zal ngam tlat a . Mihriem pangngai mani ti tak hai kuoma zal2 ngam in hriet reng a? haha.)

   Khawvela hnam ropui tak2 hai khawm hi ei en chieng chun an nuhmei hai hin an mawphurna an lo hriet in an lo hlen hne em anih ei ti naw thei nawh. Hnam ropui taka an lo insiem thei na san za a sawmnga hi chu an nuhmei hai kha an hnam ah an lo ringum em lei anih ti inla in dik naw chuong naw nih. Ei hnam khawm hi ropui lem le changkang lem ni pei dingin le, khawvel hmundang a hai ruol a hmasawn ve pei dingin tuhin transition period ah umin rabi ei suot mek anih. Chulei chun nang nunghak, hi article ei ziekna tawng hmang tu nu, hi2 lo hre nawn nawk rawh, hnamdang haiin experiment+experience+toys ang ding chaua an dit lei che a thiem taka an nei rosum leh an tlem lei che a hnamdang tawnah lengdang i sai khan kan lo inrum hlak anih aw. Pasal dinga I dit a I hmangai ani chun I love life ah kan in rawl thei nawh, a tha, nei rawh. Amiruokchu rose, mobile or laptop an pek lei rihngawt che a kawp I ni chun ka unau, I hnamdang kawp(thenkhat lem chu black top/pucca road ah bawk tawp hai sien khawm ei hmu thei kher dim ani ti ding khawpa palien dum ren run) khan a ruka nangma hmusit ran che khan I taksa chau ni loin i(ei) hnam inza umna a baw de sa ani kha aw. I taksa chu hril loh, I thlarau chen khan keini ruok chun kan hmangai che a, I ram, I hnam le nang I himna le hlimna ding an phawt chun lutan, ban tanbawng chenin kan in huom ansawn naw. Kan ta ding chun khawvel sum tinreng le lunghlu nek khawmin in hlu naw bik chuong naw a, ni e, i hmai in hme lo in, I piengphunga bawngpui tar iengin, i hnar bawng ter tor in i kerai hai kha inchum bat sienkhawm, kan ta ding chun hmu phak lo a ,’Helen of Troy,’nekin i thatna a lem bik chuong nawh! Ei hnam hi ei la tlawm leiin nangma an thawk khan Patel, Sharma or Smith, ni loin HMAR-MIZO hung suok ngei dingin kan beisei che anih. I ram le hnam inzaumna chu nangma a khan inthuk takin an phum ti theinghilh naw la, I khawsak dan anthawk khan hnamdang haiin I hnam an ngaisangin an hmusit ding ani ti hrie ranin I nitin sin thaw na le I nungchang a fimkhur le ringum takin aw….

(rohming@ymail.com)