Mumbai Tuisunsuo 22/02/09 Vol 1 Issue 25

EI REGENERATION CAMP TAK KHA CHU AW!

-Eleazar Sungte

Nidang ang bawk in Tarik 12th February, 2009 chawhnung tieng chun office ah sinthaw in kan in thung a, tulai chu sin kan inzang lai tak an bawk leh hun khawralna dingin office sin thaw hma in darkar hni/thum vel chu kan personal mail hai kan la hai chek tawl nghe nghe hlak a. Ei camp fe hma a ka facebook profile a "Regeneration Camp ah ka thang ding a na, speaker ding khawm Rev.Chungthang a ni a, hi camp a hlawtling ngei theina dingin tawngtaina a hai milo san seng ro" ti a ka type hnuoi a chun kawment pakhat hieng hin ka hmu a, "Chalru, laiking.. dam an mei an tan a, a hung mawng nawk hi REGENERATION ei ti hlak an naw?" tiin. Zuk dawn dan ding ka hriet el naw leichun ei blog www.hsapune.blogspot.com dam kha ka zuk en vel pei a. Chutak a chun ei camp report Pu.Samuel Songate in tawi fel taka a report ka zuk tiem a. Zuk koment ve ka tum an leh ka kawment na a report pek nekin a sei lem tum tlat a. Hieng hin chu a felnaw ding a nih ti'n ka delete nawk a. Kha report kha ka ditkhawp naw lei khawm ni lovin ka thaw ding hrietnaw invaiin ka lungril a ei camp lai a inlang hai a tlawm a zawng ka hung tarlang ve lem a nih.

Ei camp thaw na kha chu a hmun an fuk dep dawp bawk a. A hung ve naw hai kha chu ‘Lenlai chan in nih’ ti el chu inti dan nepte chau a nih. In chan ropui hle. Pune a inthawk a bus in darkar thum darkar li vel kan tlan hnung chun lam intung deu hlek hin a lo um a. Chu tlang sip kan zuk tlung chun Coumpound lien deu le inhawi deu a sung a building hai reng reng khawm architect thiem filawr hai in anlo design a nih ti hril hran tul lo a mawi le inhawi kan zuk tlung a. A tlangpang kiltin deuthaw chu vadungtui in an huol khum a. Hmel danglamna tlang a ni naw khawma vanram thlafuol an lo ti vet chu ani ngei awm hi tie ti a kan ngaituo mek lai chun ei camp thaw na ding hmun YMCA Camp, Lakeside, Nilshi chu kan lo tlung a ni ta zing a. Chuongchun riekhmun hai kan hang in siem fel a. Dining hall lientak le inhawi tak a hin bu le hme suongsawl khawm ngai thak lovin du zat zat fak thei dingin an hung sie dawk a. Programme, Camp Committee haiin anlo induong ang chun hun hai kan hang hmang a. Zingkar vai pathien tho hma ei ti dim zing dar ruk (06:00am) in kan tho a. Keini hai rawi iengbek bek nilo, ahminga khawpui a sin thaw a nisa suok lai khawm hmu zen zen ta lo hai tading lem hin chu zing khuo var chu a mawi hlie hlie khawp el a. Kan umna vel tlangsip le a kawl vel a tui chu zingkar nisa innem tak chun a hung khaw eng a. Zingkar vate hai chun siemtu Pathien chu inpak in kiltin kiltang a inthawkin an rawl mawi hai chu an hung insuo bawk a. A boruok an thieng si, khawpui buoina hlak in hung chimbuoi phak lo. Thei nisien chu bawkte khaw a; kha hmuna hung um sawng el khawm ka hnielnaw a nih.

Hmun dang dang a inthawk dam in tawngtaina a milo santu an tam bawk a kei khawm ka lo beisei nek deiin a hlawtling a. Dt.5th February, 2009 zantieng ngui rap in hlasak pei khawm um lovin ei camp nei na ding tieng panin Bus lientawk fet el khan ei hang in tawl lut a. Mumbai tieng a ei unau hai khawm trip hran hran a hung insiem in an remchang dan ang peiin an hung intawl lut ve mek bawk a. Ei hung kir tieng ruok khan chu tha tho takin bus sung ah Perkhuong leh Khuongte hmangin nasatak el in inpakna zaihla ei hung rem a; "Mitthli tla puma tutuhai chun hlimtakin sik an tih. (Psalms 126:5)" ti dam kha eini chung ngeiah khawm a hung indikzie ka lungril ah a hung inlang a. Thlarau malsawmna tamtak ei dawng el bakah challenge ropui tak tak nei in in ei inlawi tawl nawk ni’n ka hriet. Ei hlima ei khek rak rak khawm kha a that lai zingin; suol inhriet dawkna mi tamtak in ei chang kha a nih a ropui bek bek chu. Mi in a fena lampui inhmang in fe pei sien la chu a bo deu deu el ding a nih, sienkhawm inhmang a ni an hriet dawk chun lampui indik chu zawng a ta; a hmu pha leh hraw el a tih. Ei suolna hai ei inhrietdawk pha zet hin chu a thatnaw zie ei hung hmu fie a, Pathien in chu suolna hai chu a mi ngaidam an tah ti ei hung hriet dawk bawk a, chuongchun chu suolna a inthawk chun thlarau thangpuina in ei fihlim thei hlak a nih. Suol inhrietna le ngaidamna mawl kha a nih a pawimaw chu.

Kei ngei khawm Pathien hma a ka tlinnaw zie le ka thlak naw zie nasatak in kan hmu suok a. Pathien thu tieng hieng lawm a tawl le tam in; ka tamzie khawm hre fu lo khawp in ka lo umzie dam kan hriet suok a. Suol sim ding ei lo hauzie dam hi aw ka zuk ngaituo a alo va tam lawm lawm ngei el de. Thil chi te te suol a ei lo ngainaw hai khawm suol an lo ni theizie dam ka hung hriet suok a. Ei Baibul chun, "A tawptaka chun, unauhai, an dik taphawt dam, an zaum taphawt dam, a fel taphawt dam, an thieng taphawt dam, a ditum taphawt dam, an thang mawi taphawt dam, thatna hrim hrim a um a, inpakna hrim hrim a um chun, chuong chu ngaituo ro" (Philipi 4:8) a lo tih a... Chuong ani chun ei thil thaw le ei umdan hai an thang mawinaw le mi hmu dinga a mawi naw hai po po khawm hi suol an hung ni thei ding a na. Nitin minute tin a ei hun hmagdan hai po po hi CCTV damin mi lo la hai sien la, mipui sang tam tak in screen lien tawk tak a dam an mi lo thlir ding ni sien la E khai! Saw saw chu midang ka angpui mei mei ning a tih ti a kuttin hnar a lut hmangdei khawm ei nuom el awm. Eini a hin inthieng nawna peithlak ding annaw leh bansan ding ei va hau awm ngei de! Ei thienghlimna tak hman Pathien mithmu a chu puontiek tirdak um tak nek khawm a tirdak um lem a ni si a. Ei Baibul bawk chun "Tukhawm thil tha thaw ding hre sia, thaw naw chu, a ta dingin suol a nih." (Jakob 4:17) a la ti ta deu deu. Thilthalo ni a ka hriet hai po po an thawkin ka fihlim an leh ka tha el ding rawm ka lo insawn a; hlak kui chu thiltha thaw ding ka hriet hai ka thaw naw khan misuol ka la ni nawk tho tho. Ei ni hai rawi hi thiltha thaw ding dam chu ei hriet rawn rapthlak ve bawk si. E khai! Aw Lalpa vaihai dawr a khawm thil kan inchawk rawnna deu a chu manthlawm te dam in an mi pek hlak annawm mi kawnsesawn pek ve em tala ti tak khawm chu nuom a um el a nih. Tuiluong kawla thingphun a hun taka ra tha insuo kha ei mawphurna alo ni nawk bawk si, chu ding chun Ama (Pathien) thu a sun a zan a ngaituo a zawm a tul bawk si. Bible tiem chu a tha a nih an ti lei a lo tiem hlak, tiem sung sun sun khawma a umzie ngaituo hman lek lo a ka lo tiemzo chang dam kha a tam si. "Ka tlinna Lalpa ka mawina Isu nang chau hi I nih ka tlinna le lawmna" ti chau naw chu thei na reng kei a hin a um lul nawh. Hi hla hi chu Rev. Ngamlalchawl khan a milo phuok khal der a nih!

Nuom in la nuom naw in la khawm Isu Krista’n a thisen hlutaka a mi’n tlan hai hi ama anga thienghlim le a fel famkim anga um ve dingin a mi dit a. Chu chu ei mawphurna lientak a ni bawk. "Chuongchun, in Pa vana mi a thafamkim angin in thafamkim ding a nih." Matthai (5:48) ti le "Mihriem thar chun in inthuom ta sih a, chu mihriem thar chu, hriet famkimna nei dingin a siemtu angpui anga siem tharin a um mek a nih." (Kolossa 3:10). Chanchin pakhat ka tiem a chun hieng hin a hril a. Hmun pakhat a hin lungchiktu (sculptor) pakhat hin sai lim a lo chik a. Mi pakhat kha lai hmun hung hraw ve pa chun a sai lim siem chu thiem a ti em em a. "Ruola iengtinam sai lim kha I zuk chik dawk el leh?" tiin an dawn a. Sai lim siemtu pa chun "Ruolpa ka thil siem hi thil intak tak el annawh; hi lungpui lientak hi sai a angnaw na po po ka chik thlak ringawt a sai lim a hung suok el a nih" tiin a dawn a. Chuongang bawk chun eini ringtu hai khawm mawphurna tam tak ei nei a, Isu Krista (Pathien) ei ang nawna hai, ..inditna dam, inthiengnawna dam, hurna dam, chakna suoldam; duamna dam...(Kolossa 3:5)...le a dang dang hai kha nitin a ei ni an thawk a pei thlak ve hi ei mawphurn na a nih.

Ei Regeneration Camp tak kha chu aw taksa le thlarau tieng malsawnna tamtak ei dawng a inhawi ei ti hle. A let sing tam a inhawi lem le ei mihriem ngairuotna ringawt chun a ropui dan ding khawm a suongtuo phak naw, "An mita inthawkin mitthli po po hrufai ata; Thina um nawk ta naw nih a, Lungngai dam, tap dam, nat dam khawm, um nawk ta bawk naw nih (Thuphuongsuo 21:4) a ti ram chu Lalpan mi thuoi thlung ngei a nuom a nih. Amiruokel chu unau, "Nisienlakhawm, thil inthiengnaw hrim hrim lut der naw nih a, thil tirdakum thawhai le khelinhlip khawm lut naw bawk an tih (Thuphuongsuo 21:7)" ti a ni bawk si. Tiemtu dittak chu ram chu tlungdingin in pei ve tam? Ei Lalpa Isu chun kross lerah I tading le ka ta ding a tlanna sin chu a lo thaw zo dei an tah. Chu hmun thienghlim chu I hluo ve theina dingin nanga tienga I mawphurna thil inthiengnaw le thil tirdak um amanih le Ama ei angnaw na po po peithla dingin a rawl nem in nitin a la ko zing che!

"Lungdit hai po leh I vanram inlawi kim kan tim ti a ka dawn changin; ka lung a zing hlak Lalpa nang hung khek suok rawh, Hnuoi rothil ngaiin hringnun an hmang zo ding si".

Lalpa’n ropuina chang raw seh. Amen!

elzsungte@yahoo.com

Hmar Christian Fellowship,Mumbai 2009-11 thruoitu ding hai:

Chairman: Pu Darthangluoi Sinate

Vice Chairman: Pu Lalramthang Amo

Secretary: Pu Christopher Lalrothang Tusing

Asst Secretary: Pu Darzakhum Songate

Finance Secretary: Pi Esther Songate

Treasurer: Dr. Laldaikim Sinate

Information Secy: Tv.James Daihmingthang Pudaite

Music Secy: Tv.James Lalkhumsang

Chanchin Lawrkhom

## Staff Selection Commission hnuoi-a Graduate level ,Mains exam chu a fe meka.Mumbai-a ei member exam pe ve ei zuk hriet thei hai chu Lalthakhum Khawbung,Jacob Shakum le Stephan C Hmar hai annih. Lalthakhum Khawbung lem hi chu hung tlung ding tarik 24 February ,2009 hin Intelligence Bureau hnuoi-a Interview ding nghak mek anih. Hlawtlingna lawmumtak an hung dawng ngei MT chu a nuom pui hle.

##Nk Hmangaizuol chu zanita inthawk khan damnawna leiin bawrsawm hle-in a khawsa.Medical Doctor pan pui a ni hnungin,enkawl mek ani-a.A hung dam vat ta ei beisei.

##Tv Zarzolien chu hungtlung ding tarik 26 Feb,2009 hin Maharastra hnuoi-ak class-XII Board exam tran a tih.

TAWNGBAU LAKKHAWM

##MumbaiTuisunsuo hai hih in mi hietfuk naw taluo...hi lai hin nunghak ei um ve zinga...tulem hin chu sam thar leh.

-Nk Lalthazam Songate

##Tulai ka ruolhanBollywood side dancer in an mi lut san vonga,kei khom side dance min chuktir dingin Rakil le James of Bossini ka fiela,zan tin kan chuk ve char char

-Tv Lalthuomluoi(Thuoma)

##Joseph le Marka hai camp lut hi midang angin an hlawkpui naw hmel ngei..thu le hla thar an nei nawk ba'ka...iem an hung ang pei ding..

-Pu Darzkhum Songate

Mumbai Tuisunsuo 15/02/09 Vol 1 Issue 24

BOMBAY YMCA CAMP LAKESIDE NILSHI PANNA LAMPUI

-Darthangluoi Sinate

YMCA Office, Colaba-a Bombay YMCA Camp Lakeside Road Map kava laka. Map ka zuk bi chun, kan fena ding chu ka chieng hle a. A fe dan ding tu khawm indawn nawn ngaiin ka hriet nawh. Map zui peia, awlsam deuva zuk tlung el thei dingin an lang a nih. Chuleiin Map chu copy iemani zat zerox-in, ruol dang hai ka pek tawl a.

Awleh! Date 05.02.09 zan dar 7 anri ta a. Colaba a’nthawk Tavera le Swift thuoiin kan ruolhai lam dingin Kalina tieng kan pan a. Pu Rama, Jim le Tv Joseph, Marc hai in inthla dingin an mi lo nghak a. Pu Rama’n Pathien kuoma tawngtaina a nei zo chun zan dar 9 alo inri der tah. Map chu driver pein, kan tum ram chu pan dingin ami lo inthlatu hai le chun kan in ba-by-a. Darkar 4.5 zet lam ani leiin zanrila hrietlo ram hei paw ding chu Pathien thu le inzawm ninaw sien lem chu ngaituo nawn khawp a ni tho ani aw! Kan tlungna ding hmun hlak chu mobile net-work khawm aum ta naw an la ti nawk nghal. Lam inhmang pal deu khawma phone a indawn /zawngdawk chu hrillo.

Iemani chen hnunga mumbai traffic ning-ip umtak nerthlengin, Mumbai-Pune Expressway kan hei pawta tawk a; chiten lungril ahung zangkhai deu huoia. Kan seat belt-hai kan khit tha sau sau a, thawk le khatin Expressway chu zipper kei zip ang elin kan hei zut zo nghal a. Kan ruol Nk Chami le a rawihai lem chu an hrat taluo/inhmang deu lei amani, 10 kms vel zet in kan kawina ding an lo tlan khel a. Vangnei thlak takin net-work a la um a, kan lan biekpaw thei hram a. Chuong chun U-turn hung lain a ruola inzui pei dingin, Old Mumbai-Pune Highway(NH4)-a chun kan in her lut nawk ta a. 25 kms vel kan tlan hnung in Nilsi village panna lampui intep le kawi deu nek nawk a kan hai innawt tan ta pei a. Pu Lalrothang lem chun Thenmuol lampui khawm a ang vang vang a ti a a khuo-a-sawt hman hle. Tv Daihmingthang ruok chu a beiadawng tan veu nisien a hawi, ‘Kei chu lokir el tang ka tih’, hung ti thut a ti in lau a um fut el. Iemani chen kan tlan hnung chun net-work a hung bo ta a, an thim ang reng bawk, map khawm, hang ena ka chieng ang rawk khan alo chieng bik ta nawh. Ka ngai a tha ve ta naw a. Driver chu i chieng am ka ti sena. Ama hlak chu a confident vieu bawk si. I fe ta hlak maw ka hei ti chun, “ka la fe ngai nawa chu map dung zuiin ei fena hi a lan dik pei ani”, a ti awl et a. Ieng hi an naw, Driver hin YMCA camp chu mi thuoitlung ngei a ti innghat /ringzo phawt el ding ani kan ti ta a.

Iemani chen kan tlan hnung chun, Edlyn nu chun lake-tuipui rim ka hriet tan, sawva saw tuipui an naw maw? A hung ti a. Chuzet chun Daihmingthang khawm ahung invak nawk suor ta a. Kan la zuk tlung el chuong nawh, phak chu kan phak-in-ril hle ta ning a tih, inzun thawl ding a driver kan hei hril chu, in hmaw deuin aw, Sakei an um an ti ani a hung ti ta deu deu. A hrat thei ang tawkin kan zunhai chu kan pump dawk tawl a, motor a chun kan lut nawk vat vat a.

A lo tlung hmasa le a hrie chieng han kan pan ram, a hmun an hawi le a danglamzie lampuia kan umlai an hung hrilhai khan a mi hip-hne em leiin, lampui khir-in-khaw le tit um chu kan hriet chang bek naw. Edlyn nu hi motor a chuong char hin 2^nd driver appointment ama le ama inpe nghal hlak mi a nia. Chuleiin driver inlusu/changsuolpal ding veng pui tieng pang po hi chu ama kuta ka sie hrim hrim hlak a, a duty ring um taka thaw mi ani leiin, a hung in up-date zinga, zan dar 2.5 vela chun ei driver hin ‘ni-4 le zan-4 in thak loin motor ka khal thei a ti’ ahung ti chu a thlamuong um thlak khawp el, asanchu darkar 4.5 suong cho chu zanril khawm nisien a buoi naw ding a chieng em a. Chuong lai zing chunYMCA signboard lo intar chu kan hei tawng thut chu , Pastor Lalsiesang khawm a na, ei zuk ti nuom vang nghal chu tie.

Chu hlak chu thawk-khat tlan a tul nawk pei, a hmun tak tak kan hei intawllut tawm meu chun Mazupui(Hare/Rabbit) khawm a milo nghak sawt ta a ti hle chu ni tang a tih, ami hmu le inruolin chi-bai khawm ti hman loin lam thlang tieng in rang mang-kheng-in an chawmthla zuk el. Chuong chun gate-keeper han, ramhnuoimi-misuk buoitu kan ni an ringlei niloin, a dan ani leiin an mi lo check vel a, kei ni chun Siemtharnawkna Camp-Pune a unauhai zawm ding kan ni thu hrilin, kan lut thleng ta pei a. Mitlawmngai,Tv Stephan le aruol hai chu an hung inchawm thoa saptawng hmang nuom chi deu ni hai sien chu ‘warmly welcome’ lo ti mei an tih. An mi lo lawm lut hle in ka hriet. Hitieng hin an ti le inruol in, Ar mal/awm taksa tha tha ei zuk luok dawk nawl nawl el ani.

Chu zova chun, Banker ni awm tak hnuoi-sunga a sukzawnga step indawa chun an mi sawmlut nawk ta pei a. Iem an milaw tum ani ei ti nuom vang el. Chu hlak chu Cabin changkang fahran, bathroom le toilet attach, tui lum/dei dit ang ang hmetput el thei chu an mi ruot pek alo ni zinga.

Chu hmun zet a chun taksa khawsak ngaituoa inkeibuoina abo chieng ta hle el. Mobile le wallet hai tangkaina abo bawk. Pathien thu cho naw chu thildang hrim an leng ta nawh. Chuong chun Speaker Rev. Chungthang, kum 30 lai Isu Krista Sandamna thua hnam-dang hai laia khawm rawng lo bawl ta hlak(Sandamna thua Specialist tling hiel ding) chun camper hai natna le harsatna chu ama X-ray ngei chun a hmu chieng hle ning a ti, phet fawm nek nek ngai loin a bat bat in Bible chang, thu le hla hai ahung in irsuok hai chu kan tlai in kan dampui tlang hle anih.

Driver in Nilsi Camp Lakeside miphur tlung ngei a ti ti a kan innghat ngam chie khan kan hadam choa. A mi phur tlung ngei bawk.

Chuong ang bawkin Isu Kristaa ei in nghat/ringzo phawt chun ei hadam at a,Vanram mawi inhawi chu mi thuoi tlung ngei a tih.

SIEMTHARNAWKNA CAMP REPORT

Ahmasatakin, bohmanghai zawnga sandam dinga hung ei Lalpa Isu Krista hmingin chibai ka buk cheu. Liemtah Feb. 5-8 2009 sung khan SIEMTHARNAWKNA CAMP chu YMCA Camp, Lakeside, Nilshi hmunah Pune le Mumbaia hmar nau 70 deuthaw fekhawmin hlawtling taka zo a lo ni tah. Speaker Rev. H.C. Thiek khawm Lalpa'n a hmanga a ropui kher el.

HI camp a hin thalai nunghak tlangvalhai lai 'piengtharna' le sandam inhrietna el nilovin SUOL INHRIETNA (suol simna) a tlung nasa em em el a. Nuoma hlima lam ringawt el nilovin lungril tak taka suol inhrietna le suol ngaidamna chang an tam hi a hlawtlingna em em chu a nih. Hieng thalai Pathien neitu tak tak hai hmang hin Lalpan ei ram le hnam la tungding nawk sien nuom a va um de aw!

Ditkhawplo takin hi camp hi tumtiek a niha, hieng thalai Pathien nau nina inhre thar hai hi tawngtainaa san an tul em em a nih. Camp hlawtlingna dinga sum le pai le tawngtainaa lo thang hai po po kha Lalpa'n a let tamin malsawm raw se cheu.

Lalpa ropuitak raw se!

Kristaa in unau,
Samuel L Songate

SIEMTHARNAWKNA CAMP YMCA CAMPSITE NILSHI PICS

Mumbai Tuisunsuo 01/02/09 Vol 1 Issue 23

Barack Obama

 Alan L. Thiek

 

Barack Hussein Obama in US president sin a hung chel hi ngaituona thar a min nei tir tawl di’m? A nei naw ei um pal chun thil ngaituo tham tak nih ti inla an khel ring a um nawh. Midum, a naupang laia Kenya Mawsawlman sikul ‘madrasa’ a kai, a pa Kenya mi mawsawlman nawk nghal,khawvelin America an ti huoi huoi President zuk ni el chu! thilmak an nawh ti thei ei um di’m a nih?!

Hun hin lungril le ngaidanhai a thlak thleng an ti hi ring a um lawm lawm ngei.Kum riet liem ta chau, kum 2000 khan kum 2009 pha US president dingin midum thlang tling ning a tih tiin lo hrillawk hai sien chu ei awi da’l thei. Ani ngei, awi um lo deu ding chu a nih.Hi hin a makzie ei hriet theimet ring a um.

Midum khawm nisien, a pa Africa mi Musalman khawm nisien,‘Hussein’ ti hming khawm put ieng ang sien, an ram le hnam ta dinga thuoitutha,an harsatna chirduma inthawka keisuok theitu dinga an ring , amaah beiseina pholeng an hmu tlat leiin a hung intana hai chu hmukhumkhelin an President dinging an thlang tling el a nih. Ku hi hnampui le hnam changkang mizie indiktak chu!

Mi hnam hai ngaidan le ei ngaidan (India) chu a thlauin a lan ang naw hle.Ei chengna India rama chu Prime Minister annawleh cabinet minister ni dinga pawimaw tak chu i thatna, felna, varna le thiemna lei ni loin i piengna sungkuo le i pawl (party) thangna a ni a tawp.Ieng anga ‘mamuli’ khawm nila i hming tawpa‘Gandhi’a um phawt chun cabinet minister chu bela huonsa ana, Prime Minister khawm i ni thei zing! Ei hlaphuoktu pakhatin ‘Hming khela iem a um naw chun’ a ti kha a lo ‘hit’ fuk ngei el.

Barack Obama hi India pieng le seilien lo ni ta ang sien chu India Prime ni chu a ta dingin vana ra ang ning a ta, a thawfuk hle khawma Parliament inhuona sung tuollaia kawtkhar vengtu khawm a ni phak da’l thei! Mi ram mipuihai ngaidan le ei ram, India mipui ngaidan chu a lan thlau hle. An thlauzie chu hrilrak ngailoin tu kum 2009 inthlanga hin ‘ banga kutziek’ ang elin mitin hmuthei dinga chieng taka suklangin um a tih. Gandhi Junior hi India prime minister inbeiseiin tulai hin a che nasa khawp ela. ‘Discovery of India’ tour a nei meka hin iem a discover ding chu! India ang ram lien le hnam dang, chi dang le sakhuo tamnaa thuoitu ni ding chun NREGS a vainupui tawite sin va thawpui met le Amethi biela bawngin kan vel khel met trening a ngai a nih. Junior Gandhi hi a thawnaw hulhuol tina niloin, Gandhi hming a put lei el a prime minister ni dinga ruotlawksa ang deua inbeiseina neia an lang hi a nih fuknaw deu ei ti chu!Mi ram hai anga a mi tha,thiem, fel le varhai thuoitu dinga ei thlang hun ding chu nghakhla takin ei thlir tak meu chuh an hi! Pu Obama tha deuin aw!

Chanchin Lawrkhom

~ Pi Lalengzam le Pu Bendang Nochet hai khom Shillong EFCI biekin a ‘Aw kan tiem’ tia kut insuina an hang nei hnungin an sinthawna sunzawm nawk dingin Mumbai an hung tlung nawk tah. MT chun kristien sungkuo thratak indin dingin a ditsak hle.

~ Darzakhum Songate & family hai khuol-in-zin khom damtakin Mumbai an hung tlung nawk.Inzin report ding khom an hau hle ei beisei!

~ Pi Nempi le ei nunghak te Brenda khom voisun khuotieng Churachandpur pan in an liem.

~ Tv James Daihmingthang a sang,William Pudaite Baroda-a,a u-le-nau hai le Krismas le Kumthar hmanga thlakhat deu thaw cha’m ta chu,tuta kar ningani khan Sielkhawpui panin Mumbai a lo suoksan tah.

~~ Nk. Abhisek,chuongchen Mumbai a suoksan hnung-in tuta kar khan Kalina a lo hung chuong kai nawk tah.Ruol dang nunghak 2 Mary Kimboi le Kimneihat hai in an hung zui nghal bok.Chuong ang bok in James of Bossini khom Mumbai a lo hung tlung nawk tah.

Trongbau

“Mo thar le hriet-lang hi an hme naw khawp el”

Pi Lalengzam

“....sin thaw trin-a,in pan thlakhla khop raka raka hringnun hmang hih malsawmna anih”

Nk Hrangneimawi(Beautiful)

“..tulai ka mangin fooball ka pet pei em a,ka zal tawm zat in moza sei khup chen ka bun zie”

Nk Roslyn(Dar ang lengna)

“..sap hming hi in ti vet a ,kei khom saphming ka nei tho Jerusalem”

Ms. Jerusalem Lalnuntluong

“ ..tlangval thar Mumbai an hung lut chu,nunhlui ei hriet dawk el a”

Nk Esther Varte

“Rengkai le Khawmoi-a inthawk nunghak shipment hni an hung ding an ti na,nunghak hung tlung thar hai po po kei thlang first”

Tv Carlos Lienlal

“….next nunghak shipment thar hung tlung ding hi chu ka phur top anih..Carlos in thlang first ti sien khom

Tv(?) Joseph Joute

“ka license in mi lak pek tum ringot a,tho-kang thatna leh dam in hungin thawk vela,tho-kang thatna a inchu pui dawk ruol an le,a hlaw-a ka hlaw anih. Live and learn”

Tv Daihmingthang

“ kan hung inkhawm thei zie naw nasan chu,kalman lei ani nawh,ei ni Mumbai America-a um ei ni hi teh,ei in khom hun hih keini ta ding chun Midnight service a ni ringot”

Nk Lungawizo(Andheri Baak)

“MT Lenglai Gurup meuvin ,ring phak der lova an hung surprise leng thut kha chu,phiengna inkuoi kha chu a um tan aw hrim(2),hung in leng zing deu hai sien chu aw!!”

Nk Lisa Lalrosiem(PG Model)

“Tu’m ani hi,Vashi chanchin in dawn vet naw ro...indawn suol rawp hlak in tih. Vashi nekin Kalina-a a huna hmang rawn lem in hriet naw mawh...!!

Nk Monica Laleivar (Konica Smile@Miss nu)

“ voizan tieng khan kan hotupa nunghak leng lai ka hmu-a, zinga Sunday School kan nei ding le ding naw kan dawna.”

Nk Esther Lallunghnem (Sunde Sikul)

“....mumbai val hai,hairstyle thar leh ka hung tlung naw’k tai ie..in nuom leh Abigail khom-in mi ko thei in tih.”

Nk Abhisek

HCFM 09-11 sunga thruoitu dinga thlanghai:

1.Lalramthang Amo

2.Darthangluoi Sinate

3.Darzakhum Songate

4.Dr. Laldaikim Sinate

5.Esther Songate

6.Lalrothang Tusing

7.James D. Pudaite

8.James Lalkhumsang

Mumbai Tuisunsuo 25/01/09 Vol 1 Issue 22

Amchi Mumbai

Ei khuolzinna ram Mumbai a hin buoi nei nuoi hlak inla khawm, nakie tieng Mumbai ka umlai a thil dangdai deu ka hmu le thaw hai tia ei tu le te hai kuoma ei lan zawt thei ve thei ding thenkhat hai khu experience lovin Mumbai maksan tum nawng ei tiu.

NEWSPAPER PAGE 3 A INLANG NUOM CHUN - Mumbai a nitin chanchinbuhai a inlang I nuom chun mi inlar, hmeltha, huasa le danglam deu ni kher kher a lo trul nawh. I thlalak an nawleh I ruolhai le in party-na thlalak Mumbai Times Page 3-a inlang ve sien ti I nuom Medianet, Times Gruophai hei phone la a thlalak size le an lang tam dan ding i zirin a man le a hung suok ding hun hung hril thap nghal el an ti che. Zuk in suk lar deu met dam eilo um a ni chun 022- 2273- 5483 hi phone thei zing a nih.

MUMBAI-A CITY BUS LAMPUI SEI TAK - Sum tlawmte senga Mumbai fang kuol I nuom chun Borivali Station (E) a bus No. 524 man la Vashi chen cheng 22 chau sengin tlung thei I ta chun Mumbai khawpui khawm fang kuol zek thei bawk I tih. Hi bus lamtluong hi 44 km zet a sei ania darkar hni zet lampui a nih. I thawve nuom sin chun alo thaw tasa Tv Lalthasang le James Daihmingthang hai kawla ngaiven thei zing a nih. An hriet chieng hle a ni kha aw....

MUMBAIA JAPAN THLANMUOL LE CHINESE TEMPLE - Nipponzan Myohoji chun Japanese temple tia threnkhatin an I ko bawk Worli hmun lai sawm hrietlar taluo Japan hai thlanmuol a uma. Hriet dan chun hi thlanmuol hi Japan anthawka hung inpemlut threnkhathai le Japan nawchizawr iemani zat zet hai rawna vam hi hmun a hin sie a nih. Hi hmun hi a hmu nuom hai chun hi address hi aw... Japanese temple,Hindu Shamshan Bhoomi, E Moses Road, Worli. Hieng ang bawk hin Mumbai-a Chinese Temple umsun hmu nuom tuhai chun Nawab Tank Road, Mazagaon a hin, abiktakin Chinese New Year hunlai fe chi tak a nih.

LEM ZIEK (PORTRAIT) - Tlalakna hmang ngai lova kut a ziek ngei i lim, banga tar thei nghal mawi em em a ziek I dit chun Jehangir Art Gallery kawthler hei hrut pheila I lem ziek nuomin lo inchu mur mur el an tic he. Hmai nam raklo lkhawm nam patin an ziek suok el anih. Mumbai-a um ini si vawikhawt chu pan chi ni ngei a tih.

POWAI-A NGAIKUOI KAM - Powai Dil a khin ngaikuoi kam phal ani a chu ROU(Meiteihai nga hming) nekin awle an tam lem el thei ani aw... Maharashtra State Angling Association chun ngaikuoi kam hin a tui a thienghlimna vawng tlat chu a tum.

NUHMEI KAWRHNUOI - Kawrhnuoi inchawk nuom chang I size ilo hriet naw pala an nawle I hril inzak ani chun bouina ding reng reng a um nawh. Crawford Markey pan el la an hei hmu char in I size ding chu lo hril dik chat el an tih. Thawtranni anthawk Inrinni chen I va nepin i van chawk true thei anih. Anachu vaihai in zerhuom tla vanga an en che kha thil pawia ngailo met trul mai a tih. An naw si chun tlangval thiekthu se deu thruoi khawm thra’ng a tih.

BANG ZIEK TRIEL (GRAFFITI WALL) - Sap filma ei hmu hlak, mi tamtak in ei lo thaw nuom ve hlak rawng chi dang dang hmanga bang ziek triel i tho nuom ve chun, Bhulabhai Desai Road, Mahalakshmi pan el rawh. Hi taka hin i lungril a sipliem hai, thumal tawi te te, anno le trawng mawi le mawi lo iva ziek rang hrep thei (tu khawm in pawi anti nawh).

MUMBAI-A ZUN IN HLUITAK - Bombay Dockyard laia um Bombay Castle a chun Mumbai khawpui sunga zun in hluitak hmu thei zingin a la um . Hi zun in hi ei pi le puhai dier bengchep chaua tuol an leng hunlai, kum 1750A.D. anthawk ta khan an lo hmang tran dai tah. I van zun ve nuom chun kum khat sungin vawi 12 chau chance a um. Thlatin ah Chawlni (Sunday) hmasatak chau hin an hawng hlak a nih. I ngaituo sin ve ding eini chu tu chen hin veng tieng vantlang zun in mumal la neilo ei tam ani aw.. Changkang dan an thlau hle. In zun hi India mi cho phal ani!!!

STRAND BOOK FAIR - Lekha bu inhnik hai tading leu leu Stand Book Fair hi kumkhat sung voi hni, January le September a nei hlak ani. Lekhabu akim in an man hle. A ni le hun hre nuom hai chun 2208-6103 call thei ani.

Chanchin Lawrkhawm

# Pu Darzakhum Songate le a sunghai chu chawl hmangin an fe. Damtaka Aamchi Mumbai an hung kir nawk kar ei lo nghakhla hle. MT chun sungkuo chawl hmang inhawi dingin a nuompui hle.

# Lo sawt vang ta sienla khawm ei theinghil ngailo Nk Jimry Krismas hmanga veng fe chu damtakin Mumbai khawpui kar liemta khan alo hung tlung nawk tah. MT chun a sinthawna thra taka sunzawm nawk dingin a ditsak hle.

# Tv Carlos Lienlal a sangpa Planning Thangboi, kum 18 mi chu tui-a changsuol leiin liemtah Pathienni zantieng khan alo boral tah. Hi zan la la hin MHWA le HCFM in rawina hnuoina –a lusun sungkuohai meng puia lengkhawmna hun hmang a nih. Nunghak Tlangval thrahnem tawk tak fe khawm a nih. MT chun lusun sungkuohai a tuor pui tak zet.

# Edlyn Sinate D/o Pu Darthangluoi Sinate chun an School Anual Sports an neina a 80m race-a gold medal a lak a, chun, Elsie khawm, fancy dress a silver medal a lak.Ei lawmpui hle a an lawman dawng hi a lawmna’n voisun an inchong nghal bawk. MT chun an hlawtlingna hi a lawmpui hle a hmatieng pei a khawm hlawtlingna tamtak dawng nawk pei dingin ditsakna an hlan nghal.

# Eini laia hun sawttak lo um ta hlak nunghak fel em em le biek inhawi, Nk Niengneimawi(Mawite) chu bawrsawmna leiin veng tienga damdawi in enkawl dingin zanituk khan veng tieng panin alo suok tah.

# Ei lo hriet seng ta ang khan hung tlung ding 5^th-8^th Feb. khin unau Pune hai chun hartharnawkna Camp nei an tuma chu taka ding chun Fellowship member hai popo fiel seng ei ni ang bawkin thrang seng tum ei tiu. Hi Camp a Speaker ding Rev. H C Thiek khawm biek fel diem ani tah.

# Thei ang anga ei lo buoipui ve trawk trawk MT website kha tuhin chu blog nita loin Website puitling nei thei ta dingin Pu Kaprosang Juote a tlawmngaina le an phalna leiin induong tran mek a nih. Ei website thar hming ding chu www. mumbaihmar.com a nita ding a nih. Thilthra thawtuhai ke chu a mawi ie chawimawiin la um nawk pei an tih.

# Pu Jacob Shakum le Pi Merina hai Honey hmangin Taj Mahal le Qutub Minar hmun hai biethu inhlan zing puma an fang kuol hnungin damtakin an runlum Powai,Mumbai damtakin liemtah Pathienni zantieng khan an lo bung tlung nawk tah.

# Ei fellowship hung kan dingin Pune a inthok in Pastor Lalsiesang le a ruolhai mi pathum zanikhan damtakin an hung tlung. Vosun hin Pastor Lalsiesang in rongbawlnna nei nghal ati. MT in ei lo welcome hle.

Trawngbau Lawrkhawm

## Nunghak ei hei leng ei ti leh, an kut tin le ke tin baak hre lo hai. Hohlim pui ei hei tum ngiel le hlak chu Bandra khel tieng bak chu hril pui thei ni hlawl lo hai. A buoi thlak thei bawk chu a nih.

-Mumbai Val Upa

## Sam keitluon chu ka lo thiem mama nieng a ti maw..... nunghak sam ka kei tluon pek hai chu pasal an nei zat zat nghal el a nih. Lo en tanla in awi naw leh, Sary, Merina le Engzam.

- NK Vanlalcham

## Sam keitluon tluon in an nei pei a kei khawm ka kei tluon ve el ta diem a ni aw.....

- Nk Rachel Lalhrietpui

## Nuhmei nei nuom in um chun min roommate pui el roh. Ka roommate pui hai chu nuhmei an nei pei hlak a nih. Nang te I nei nuom ve am? Kei chu mi theinghil unla nangni lem kha.... Hmu ta zing inti kan naw a hmunaw bik khawm ka ni chuong bawk nawh.

- Tv John K Dulian

## Jude Cross Junction (Ruth Khawbung hai PG hlui lutna lai kha)lai hi a kuo a chin a chu Kolivery kawtthler lai chu a pawimaw tak anih. Ei lut threl vei chun ei inhmang ram a nel. Chulei chun a chin khawm hi a pawimaw tho ani aw... Heh Heh Heeh...

- Tv Joe Songate

## Mumbai vai hai ku hi in bawl an thiem tawl ngawt el maw.. inrel khak khak hin an bawl tawla in trum bak hin ei in hnawping lal tawla, a thren ek in lem chu SAAP thaklai an bang ei kiss thei zing ana.

- Nk. Joy Rebecca Khawbung

## Kei chu ka imu a suok ta chun tlangval mi tir ti dam chu ka dawn lo el a nih. Chu nelh!!!!!!!!!

- Nk Rebecca T Ngaite

In Awi Am?

In awi am, ei lo hriet dan chun ei tlangvalhai threnkhat Bollywood Film shooting dingin an fe a mawi fahrana an sam hai an khuoitho sar chu a mawi zuolna ding ti in an lo met kawl pek lem dei chu ti.... Amakin apoi thei ngei maw......