Mumbai Tuisunsuo 19-July-09 Vol 1 Issue 42

HERMIL HRINGNUN

Simeon L. Joute

Khawvel a dangin hma ei sawn pei a. Hrietnaw karin ei lo inkang tiel tiel ve thung a. Tu lem hin chu dingdihlipa ei lo thlier treng treng- Mumbai, Delhi etc a hai ei lo inhnawm hruot ve ta mei mei el. An khawdawk le an kuiluot pawl ei in pel nuk zing a. Vadungte angin kil-tin kil-tang an thawkin ei luongkhawma, tiem khawp chuh ei hang intling kieu el tah. Leh, a min an hril Sleepless City ah hringnun chu ei hang hermil pei chu a nil ta a. Ei hermil dan hai ruok chu in ang naw rep rup hleng a tih. A tran mek lai um ei ta, a kip-a-kawia hi lai nunphung po2 lo hermil ta khawm um mei ei tih.A tha a ngai phawt chun a pawina um nawh. Hnam dang dan tha hai chu lang ei ta ti a la ni pei khah. Hieng tieng pang hih in nal (expert) zata ei graduatena a ni reng hrim an nawm. Kei khawm a ieng2 khawm ni sien kan rempuiin ka changsawn ve tho a, kan admit ve top. Ieng po kahwm ni sien, kha van chawkpawlna lei khan vai/sap etc hnam ka/ei va ni duok chuongna um naw a, zuk thre thrawp ding chun HMAR takhlawk el pa chu ka la ni zing tho.A tak tak pa hi a pawimaw ti na a ni chuh Ei hringnun hi Sana battery chau hnung,hermil tuol zing ang deu, hermil talaklaw chun hermil ding a um ngat ngat el hlak. Ei sakhuona khawm thil dang2 leh ei hung chawkpawl ta pei a. An hme thei rak naw khawm a ei in rempui tum phet2 a. “A awm, a mawi tho” tin ei inthiem rak naw san ei zuk inthiem fawm pei a. Lam huna khawm ni sien, a thlarau thawk naw sa san ei van hermil tum nawk phet2 a. A battery hring tha lo na ma chu LALBIEKNA le a bo an ruol nawk hlak. An leh chu lo ni sien, hermil fawm in Kriestien nundan po po lo zawm famkim la/lang, LALSIPAIHAI intlar huna a mi sanhim zo diem. Ring chu um nawh. Mi hnung hnawt ei ni tlat leiin an mi maksan tho2 ding. Mi nun va hermil ringawt hin umzie a nei phak naw ding a ni chuh. Pu Stephan C Hmar in,’Um kawrawng tui a nampil thei lo(Tarsis Hripui) a ti ang deu khan ei lan leng dawk tho2 ding chu a ni awm a. Ei nu-le-pa kriestian tha tak an ni leiin ei thla a lo muong viu el thei. Ei va hermil pa/nu hlakin a mi fen kai zo awm si nawh. Lum lo,dei lo na na chuh kai lo tla lo bawkin suom lai ei in tang ding ti dam ni sien chuh a zie la umin hermil man a la um deu rawi maw. Hlak chu thil thei ni mang si lo.Kriestian nun hi a laklaw (a kher kherthlaw) in a va harsa ngei.

INHRIETTIRNA

Mumbai Thlahmur(August 19, 2009):Liemtah Chawlni thlahmur ni 12 khan Hmar Christian Fellowship Mumbai Executive Committee inkhom ko a ni a.Hi inkhomna a hin thu poimaw tak tak Mumbai khawpui a la um ngailo hai, Pathien hratna ringsana thaw dinga rel anih.Chulai-a pawimaw zuol biek hai chu hieng hai hih an nih.

· Hun sawttak a inthawka Hmar nau hai,hmun dang danga chenghaiin ei i buoipui mup mup,Hmar Gospel Centenary 2010 chu India tlaktieng rama cheng state pathum hieng Maharastra, Gujarat le Goa(MGNG) inkawpa hmangkhom dan ding nguthluok taka ngaituo anih.Mumbai tieng panga inthawka rawtna siem dan chun, Pastor Lalsiesang Joute kolkhawmna le keihruoina hnuoi-a MGNG hai anthawkin palai inthlangsuokin Organizing Committee anhma thei ang taka indin dinga rel anih.Chu dungzui chun Mumbai a inthawka Palai ruothai chu HCFM Chairman le Secretary, MHWA Chairman le Secretary hai ruot nghal an nih.A hmang dan ding le a programme hai chu an ni chunga ngansie ania,anni in trul le thra an ti ang peiin hung induong an ta,a ni le a thla chu nakie le vantlang hriet dinga hung insuo nawk nieng a tih.

· Mumbai-a a voikhatna dinga Mumbai sunga cheng vengbuk dang dang intuokkhawm/inkhawmpui hmang dinga relthluok a nih.Rel dan a chun hung tlung ding August(thlazing) 15, 2009 hih hei tinzawn phot anih.Hi programme hi tlawmngai taka bawzuitu dinga ruot hai chu- Marc Lalrohlan, John K. Dulian, Joseph Songate, Joseph L Joute Christopher Lalrothang, Simeon L. Hmar, Jacob Lalmalsawm, Stephan L Hmar le Daihmingthang Pudaite -an nih.Mitin mani sin senga buoitak tak vong eini tawl lein,a thei a, chawl ei lak tawl tar au rau si leh,Mumbai puo tienga hmang nisien ti-a ,rawtthluk anih.A hmun ding hin Lonavala(YWAM) ti phot anih.Hall booking tieng mawphurna la dingin Pastor Lasiesang Joute dande anih.Hi a chunga tlawnga a ei ruot hai hin, a programme hung induongin iengkima fe dan ding,thalai thu le hlapawl in elna le a dang dang hai hung siem an ta,Programme kimchang lem karnawk hung insuo nieng a tih.

· September Beiruol hmang ve thra a hriet ni leiin hmang dinga relthluk anih,September Beiruol hih hmang ngei ei nuom nasan chun kumpui linglet sin inrimitakin ei thaw-a, thlakhat sung na na chu Pathien ei mamaw zie, ei ngai le trul le Ama ta dinga thlakhat sung chu hun hei pe inla ti lei anih.Ei thupui ding le ei hmang dan ding tlang pui chu thlathara tarlang nieng a tih.

CHANCHIN LAWRKHAWM

~ Union Biblical Seminary (UBS) ah Bachelor of Divinity 2nd yr inchuk lai mek Zoliensang Joute chuh, Hmar Christian Fellowshop Mumbai lai weekend ministry hmang dingin zirtawpni July 17 2009 khan Mumbai a hung chuong kai.Chuong ang bawkin, Elizabeth Khawbung khom a PG hun sawttak,Rengkhopui tieng a hang suksan hnungin,zirtawpni khan Mumbai a hung tlung nawk tah.

~Pu Darthangluoi Sinate chu Sinate’s Creation in thuomhnaw chi dang dang a thruoi chei hai hang suklang dingin tuta kar liem ta khan Delhi a hang inzin.

~2009 Mumbai Hmar Welfare Association(MHWA) registration,a thar le renewal hih August thla chena thaw thei nieng a tih.Chuleiin,mi tin a lan register lo le renewal ding hai chuh hung ngai pawimaw in,August thla tawp chen Welfare fee,Finance Secy John K. Dulian kuoma pek thei nieng a tih.

~Henry Lalngaizuol chu medical check-up thaw dingin Mumbai,ningani khan a hung tlung.Henry hih MHWA, Finance Secy sin lo chel hlak anih.

TRONGBAUS

“ Jacob, I conscience in a la kik dat dat che chun, I lung sukmuong roh.Pathien in a la maksan naw che ti na,a ni chuh”

John K Duhlian(Proprietor :Sinlung House)

“ Voisun-a ka Bible tiem ding hih,ka pienga inthawka ka bible verse by heart hmasa tak nih.Trongtrai khom khah ka lo practice by heart top anih”

Sally Lai-rai(Sr. Member, Sinlung Casino)

“ tuiruong tui dawn phak chin hih chu ngaituo ding meu kan um le.Kan khat hin kan in todel hne anih”

Reuben-David Khawbung

“Chanchin tha,chanchin tha, ei ti;ei ti-a,Chanchin tha hih iem ani lie?”

Pastor Pa

“Ka room mate pa’n, weekend zat-a, Destination Kalina, a lo ti zie hih, a san le an hoina thuruok kei ngei khomin ka hriet ve tah“

Benjamin Khawbung(Dais mate in Vashi & Kalina lengs)

“ Da Gurdian ka hung tlung nawk ta ie...tuhin chuh Rengkhawpui ah ka hang in tuoina’m ta boka,LOC upper House chu khuoiva lu’n lai chu nepte nieng a tih”

Elizabeth Khawbung(Da Guradian)

Mumbai Tuisunsuo 12-July-09 Vol 1 Issue 41

HMING HER DANGLAM

Darzakhum Songate

Kum 1987 khan Kolkatta ah B.A. kan chuklai sinussitis natna ka nei leiin, Muslim doctor pakhat ka zu pana, a prescription ah khan X-Ray lak dingin ka hming Darza khan ti in a mi ziek peka. X-Ray clinic ka pan nah radiologist chu Hindu kulmut deu, a bawka thil nalsen hluk el hi aniah; X-ray report ah khan ka hming Durga khan tih in a mi ziek pek nawka. Fiemthu thawna dingin mawi reu tiin X-ray report kha kum iemani zat ka kawl. Sawrkar sin ka thaw hnung hin a tawi zawng baka mi hrietthiem thei ding ringin D. Songate tiin ka ziek hlaka, khawm chu vai hai hin intak anti am anih, an fimkhur naw lei am anih an la ziek suol rawp hlak. Dibrugarh ah X-Ray report bawka D. Sengupta tiin felfawkin hming an mi siempek bawk.

Hnam dang hai hin ei hming ko indik chu hrillo, a zieka an ziek suol hi chu thil pawimaw raklo ah chu ngaithiem an umtho. Eini hi a phuok tu haiin ditdeuva an phuok, ei hriet mi hmingtaka kolo hi thil indiklova khawm ei ngai phaknaw hi maktak anih. A mak nawkzuolna chu a phuoktuhai khawm in an pawisa raknaw ah, kova um hai khawm hin pawi eiti beknaw.

Eini mi laia hming inlar pawltak chu Pu Lalthlamuong Keivom I.F.S. retd. hi ning atih. A phuoktu chun hming umzie inthuktak neia ah phuok pek anih. Pu Lalthlamuong hi a ruolhai leh eini mi a neka upa hai ruok chun ngaina le duot deuin Muonga tin anko tlat. Lalthlamuong kha Muonga tin ei in changtira, eini a naupang deu hai lem chun Pu Muong ti rikngawt in ei ko nawk. Awrizinal hming chu a kawk phak tanaw hle. Nisienlakhawm a kotuhai khawmin maka ei ngainaw; ama khawm hin a pawisa chuongnaw ah ang.

Vengtieng khin mi threnkhat chu an hming letling deiin ei ko. Lalkiemlo hi a thren chun U Kiem antiah. Laldailo khawm Daia tiah ko anih.

Mumbai ngeiah khawm hin Pu Stephen C. Hmar hi annu takngielin, Ste tin a hang kova. Vai han lo hriehai sien chu, Stay ti rikngawta hang inko chu mak anti el thei. A kalpenlai a nuhmeiin a hnungtienga inthawkin Ste tiin hang ko sien, ama hi a lawnlai chat chawtin hang inhawi sien chu a hmu hai chun chu pa chu nuhmei pakhatin stay atiah a chat chawtel, a thaibawi de, ti pal rawinaw ni ham( a thaibawi nawh ah chu!!). Stay tiah min anko hnunga la hang lawn vuk vuk hlak chu a mawl tlak awmsi. Chuong ang bawkin Pu Darthangluoi Sinate chu, U Luoi, Pu Lalramthang Amo chu, U Ram, Nk.Zarzokim chu, Zari tiin ngaina deuin ei inko suk vel neng nung el anih hi.

Ei bau thabo leia mi hming a tluonsuoka ei ko peinaw hang ti thei chu ni chuong silo. Entirnan Mumbaia ei Welfare Vice Chairman hi ah hung thlung hlim khan Marc Lalrohlan kanih tin a hung in report ah. Chu chu Marc tiloin Maarka ti kher kher in eilo ko nawksi. Pu Lalrothang Tusing hi a ruolhai chun LRT tin a kova. Hihi Lalrothang ti le chu bau chang zat an ang thosi. Ei in ko indoutna ti ding hlak chun hieng Hrangdanglien (Danga), Joseph(Seppa), Darzakhum(Darza), Paukhomawi(P.K.) tihai hin duotna rawng a kai zo naw baka, hming tak kha kawk phak ta reng reng lo. Hmai trim thrak lova inko in, kova umhai hlak inring kungin ei inhawi bawk.

Ei hming pel metin ei inkova, inhawi pawi eiti chuongnawh. Ei tradition khawm alo ni bawk. Hming letling dera inko khawmin ei inhawi tho. Nisienlakhawm hming tluonsuok hmang ding huna hmanglo,mi hming indiklo le nina indiklo hmang hi manner hrietlo a hlaw baka mi lung sukinhawinaw tirtu ani thei.

Vawikhat chu vai Officer lien inti ve deu hi Chief Guest dingin hmunkhata an fiela. Fielna hi lekha ngeiin an hungpeka. An fielna lekha a hang en zo chun iengleia Chief Guest dingin an fiel am ana ti ah hang indawna. A fieltu hai khan an ngainat lei le thil dang an fielna san an hang hril chun ana aver nawh hle. A san chu a hming le ani na kha indiklovin anlo ziek lei anih. Ama chun chuonga mi ngaina le mi pawimawh a in mi ngaisi chun ka hming le ka nina bek khawm hi in hrietnawh am anih ti zawngin a dawn veh.

Hming hi stage annawhleh pulpit vela inthawk chun a tluonsuok ngeia hmang a thra. Chun news ah hai khawm fiemthu column or sms news annaw ruokchun andik pa tak hmang hlak ding anih. Fielna/greeting card hai khawm hi mi ei ngainat leia ei pek anni leiin hming spell indiknaw le nina indiknaw hi ziek ngai ding annawh. Mi thil ei hnina lekha ziek dam hin annina le an hming indiktak kha ziek hlak ding anih.

Mi hming hi an inahwi peinaw chen raka thlengdanglam hi thil thra ani beknaw.

CHANCHIN LAWRKHAWM

~ Dorothy Songate,kha hma pova Bangalore Hmar Welfare member lo ni hlak chu, National Aviation Company of India hnuoi-a,Indian Airlines ah AirHostess(Cabin Crew) sin lo hmu in,tarik 05 july 2009 khan Mumbai a lo hung chuong kai tah.Tuhin thla 6 sung training dingin Air India Colony Girls Hostel,Kalina-ah a um.

~ Tuta kar sung ei Pastor Lalsiesang Joute chu a rongbawlna hung sunzawm nawk dingin, Kalina a lo hung tlung nawk tah.Chuong ang bawkin mimal trulna leiin,Baroda tieng ei member hai Pu Lalsansuok le an nu Pi Lalnunsiem hai khom Mumbai an lo hung chuong kai bawk.

~Pu Lalthrakhum Khawbung(Buonga) le Laldomsang hai chuh ei ni lai hun iem-a-ni chen a um hnungin,zani inrinni tarik 11,July 2009 khan Tuithraphai tieng pan in a lo liem tah.

~Ei Welfare Chairman,Pu Darzakhum Songate chuh hun iem-a-ni chen Bandra Kurla Complex(BKC) Income Tax Office ah Additional Commissioner sin a thaw hnungin,Income Tax Office,Church Gate tieng-a transferred a lo ni tah.

~MT Lenglai Gurup Membhai hai chuh Pastor Pa rawi-in,zani zan(zanril) khan Sinlung House(Proprietor:John K Duhlian,Joe Songate) ah Rome,Bible study an nei pui.

TRONGBAUS

“ Tuhin Pasal le pasal,nuhmei le nuhmei hi in nei vong ta in la, chi ei inthla thei naw ding ana.Kum 100 khat hnunga chu tunam hnuoi ro hlu’ng an ta?”

Rama Amo

“Lenglai Gurup hai hih, zingtieng dar 3:00 hnung-a nunghak leng dinga insuok chau nasan hih,I aw a san ding awm-a ka ngai chuh,phak deu ta hnung chun,nunghak hai khom khan “awveh” hang ti khah a awl ta lem-a, a nih” Darzabhai(Roneikim Pa)

“Kei chu trantu or mi hma-a thu hang hril nekin hlasak or Lam char2 ka nuom lem……”

Rody (Salsa Dancer)

“Iem tulai hin a khuosawt in mi ti in mi ti a,ka khuo a sot ta lo zan...Vanlalsailo hla chu ka dit reng ani longtime back a in thok……..”

Sienglienkhawl

“MT lenglai gurup hai hin Zari hi kan leng hman naw reng2,a chol sun2 Goregaon or dinner a ka fe ding ati nawk pei..Zarvuongi ni loin Zarvangi ni lem raw sen..

Jacob Sakum (aou aou Saghi)

“Sepa in a mi leng fuk thei naw chun, ka leng hrat hle nieng a tih.” Zari (Zarvuongi)

THIL INHME HAI

~Pastor Siesang le Pulpit chum puma dingdihlip rak rak.

~RT Varte le guitar per puma Second voice thaw.

~Zarzolien le purda system thaw ang deua Boksam thrin

~Sally Lairai le Jeans shorts (in sieng tei tei).

~Buona(Buonlywood) le half pant puma Office kai.

~Marc le Kwality chai, thingpui(Lemon tea nge) dawn.

Mumbai Tuisunsuo 05-July-09 Vol 1 Issue 40

EI THIL HMU DAN AN DIK AM?

Pastor Lalsiesang

Chuongchun an pahni chun an mit a hung var a, saruok an nih, ti an hung inhriet tah a: theichang hna’n puonbil an siem fawm ta a, chuongchun, huon lai a chun Pathien an inbiksan taa, Gen,3:7.,8.

Ei thlatu bul Adam le Eve in Pathien thupek bawsie-in, Pathienin faklo ding a ti thingra an fak charin an mit a hung var ta-a. An mit var dan hi mak tak anih.Pathien ropuina le hmangaina hmuna nekin an saruok ni zie an hmu lem tlat, saruok ti hin umzie inthuk tak a nei, a tlangpuia ei hmangna deu chu pasie, iengkhawm neilo, inzak umnaah ei hmang deu hlak.Vawisun hin ei ni khawm hang in ngaituo’ng ei tiu, ei mit var dan hai hi. Pathien ropuina le hmangaina nekin mani saruokna, pasietna le inzakna ding ngawt ei hmu el rawi mawh! Ei lo hmu pal an chun, suol ra ani ti hre-in Lalpa kuom tieng kir ei tiu. Ringtu threnkhat chu Pathien nei a insal si, pasie inti ngawi ngawi, lungawi le lawmna ding hrim hrim neilo. Pathien ropuina le a hmangaina hmu-a, Ama Pathien chuh inpak nekin mani tlinnawna le felnawna chau hmu-a inzak ngawi ngawi-a hringnun hmang an um bawk. An mit-var dan chuh Pathien-a inthawk sawnin, suolna leia mitvar an ni reng hrelovin, tlinnaw, felnaw le pasie ngawi ngawia an inhrietna tak chu an chapo pui hlak. Chuongang mi chu ei lo ni el rawi mawh?

Adam/mihriem chu Pathien hlimthla/inlang-dan a siem, Pathien’n mihriem a siem hi a siem zova a mak san el nilovin, inlai chinna neizing dinga a siem anih. Mihriem chu Pathien a innghat ding le a ma le relationship/inlai chinna nei ding a siem a na. Ei hringna le iengkima Ama Pathienah innghat chuh Pathien laka mihriem mawphurna pawimaw tak chu a nih. Amiruokchu mihriem suola a tlu char khan, saruok/tlasam a ni zie a hung inhrieta, chu saruokna/tlaksamna chu inkhum dingin manikhata intodel tumna lungril a neia, a nei chau niloin, Pathien thrang loa mani intodel nuomna, Pathien pawimawa inhrietnawna a hung nei nghal el a nih. An saruok inkhumna dingin hna thruiin silfen an siemfawma. Vawisun hin ei ni khawm hang in en ei tiu. Tlasam le pasiea inhre ngawi ngawi siin. Lalpa thrang lovin mania intodel ei lo tum el rawi mawh. Mihriem hringna hi fak le dawn le silfen intodelna chau hin a thla a muongin a lawm thei ngai nawh. Mi tam takin an thlamuong nawna chu sum le pai neia in suk thla muong an tum hlaka, sum le pai nei theina a ni phawt chun iengkhawm pawisa loin sum an zawng hlak. Chuong mi hai chun an nei rawn deu deua an saruokna an suk lak deu deu hlak. Ama Isu Pathien ngeiin hieng hin a lo tih: “Mihriem hi fak le dawn le sil le fen chauin hringin, an thlamuongnaw ni haia, Pathien baua thu tinsuokin hringin thlamuongin um lem an tih,” Matthai, 4:4. Lalpa Pathien chau naw chun mihriem hi saruokna le pasietna a inthawka sansuok theitu iengkhawm a um nawh. Mihriemin saruok an hrietna hi; sum le pai, sil le fen, a tlasam leia an hriet niloin, Pathien thupek zawmnawna leia saruok,pasie,retheina hi an hriet a ni lem sia. Lalpaah ringna le beiseina innghat loa mani theina a innghat ei ni chun mi lungsiet um tak ning ei tih. Jeremia 17:5-8 ah chun, Lalpa chun hieng hin a tih: Mi mihriem ringa, mihriem ban hratna ringsana, a lungril khawm Lalpa-a inthawka hran ta chu a chung a rik! Ama chu thlalera hlobuk ang ning a ta, thil thra hung tlung khawm chu a hmu awm si nawha, thlalera chun hmun trawl lai lai chu hluong a ta, chilung ram chuh. Mi Lalpa ringtu le Lalpaa beiseina innghattu chu a hamthra. Tui sira thing phun, a zung khawm vadunga kai ang, thina hlim ruom a hraw lai khawma tri lo, khaw inthral khawma a hna hai hring zingin ra insuo zing a tih. Pathien hlimthla(image) a siem ei ni ang bawkin, ei hringnun hi Pathiena innghat ding ei nih, ei iengkim hi Ama a inthawk le a ma zara um ei nih, ti thutak hi ei hriet a trul tak zet. I um dan ding chu Lalpa chunga innghat la.Ama chu ring la, ama in thaw vawng a tih. Sam 37:3.

Mihriem chu suol-a a tluk charin, Pathien ama siemtu,thil po po hretu nitina an pawlpui chu inbiksan thei a ringa, inbiksanna lungril a hung put nghal el a nih, chuongchun, huon lai a chun Pathien an inbiksan taa, Gen, 3:8. Suolin mihriem a hang sawisak tak tak pha chuh a suk vet phawthlak, Pathien siemtu le iengkim hretu chu inbiksan thei inringna an nei tir a, A mak ngeimaw Pathien inbiksan thei ringna an zuk nei el hi, Pathien hmu phak nawna hmunah an um thei hrim hrim dim maw? Lal David chun a rukin, tu hmu loin a sipai General Uria nuhmei Bethseba a uiretpuia. An lalna le thuneina hmangin a suolthaw chu thuphmang a tuma, Amiruok chu Pathien iengkim siemtu, hmutu le hretu hmaa inthawk chun iengkhawm thup thei a ninaw zie chu, Lalpan zawlnei Nathan hmangin a thil thaw chuh hienghin a van puongtir a nih: Lalpa chun hieng hin a ti a nih, “Ngaita, nangma suongkuo laia inthawk ngeiin i chunga thil thranaw in suoktir ka ta, i mithmu ngeiah i nuhmei hai chu lapek kati cheh a, i venghai peng ka ta, sunkhawvarah i nuhmei hai chu zal pui an tih. Nang chun chuh inrukin i thawh a, kei ruok chun chuh Israel mihai po po mithmuah sunkhawvarah ka thawding a nih” tiin in, 2 Samuel,12:11,12. David chun Pathienin iengkim a hmu zie le a hriet zie a hang hriet chun hieng hin a hung hril ta anih;”I hmaa inthawk hin khawlai am thlanhmang ka ta ? Vana hang lawn lang, chu taka chun i um sia, Seola zalna siem lang, ngai ta, chutaka chun i um bawk sia. Inthim khawm a nangma kuoma chun iengkhawm a hlie nawh a. Zan hi sun angin a var lem anih: I ta ding chun inthim le var hi thuhmun zing an nih, Sam 139:7-12. a lo tia. Vawisun hin ei ni khawm Adam le Eve ang hin Lalpa Pathien ei inbiksan tum el hlak am? Lalpa hmuphak loa um thei ringna ei lo nei el am? Suol chun Patien hmu phak loa umthei dingin ringna a min neitir hlak a, ei nuom nuoma khawsa in, siemtu Pathienah innghatloa mania innghata hringnun hmang dingin a mi thruoi hlak. Ei mit vardan hi an dik chie am, in enchieng a hun.

CHANCHIN LAWRKHAWM

~Tarik 2, July 2009 khan Nk Lalruotkim Joute chuh Sion Hospital-ah, a kampui natna le inzawmin minor operation thaw naih.Chuong ang bawkin,zani inringni tarik 4, 2009 Nk.Ruthi Joute chu pile natna le inzawmin operation Noor Hospital, Kurla a nei anih.Damnaw hai an hung dam vatna dingin ei trongtraina hai-ah hre zawm pei ei tiu.

~Ngurnunsang le a sangnu Rohmingmawi hai chu tuta kar liem ta khan Kalina ma ma ti in,an lo hung insawn lut tah.An in address thar hih, ei hriet thei dan dingin,a hma-a Mawinu(Beautiful) hai lo umna khah anih.

~Elizabeth Khawbung chu trulna leiin tuta kar liem ta thawleni June 30, 2009 khan,a mawphurna Da Guardian pawimo hle sien khom, Rengkhawpui tieng pan-in a lo liem tah.

~Benjamin Khawbung chu Nirmala Niketan ah Master Of Social Work (MSW) seat lo hmu-in,karliem ta khan class a lo zawm tran ve tah.Hun sawttak Powai tieng-a,a um hnungin,James Pudaite le in room mate ding in,Vashi tieng a lovin sawn phei tah.

~Vashi tieng-a ei nunghak hai Edith ,Catherine le Dorothy hai chuh tuta kar liem ta khan,an sinthawna, hnai le remchang ding leiin,Andheri (E),Chakala tieng an lovin sawn phei tah.

~Ngurnunsang, Dorothy Khawbung le Ruthi Joute hai chu Gebbs( Andheri) ah sin thar an lo hmu der tah.MT chun a lawm pui hle.Anni hih tarik 13, july 2009 hin an sin thar zawm an tih.

~Pu Kawlvelthang Amo,hun sawttak ei ni lai-a a hung um hnungin karliem ta khan a naunu Marisha Vanhlupui leh Shilong tieng an lo liem tah.Hieng lai zing hin Siemmawi chu tulai hin Mumbai-ah a hung chawl ve.

TRONGBAUS

~ Ka U Eli’n PG Manager sin ami zuk in hlan chi ei thluok a buoi ram2 el an nawm, ka Hmai khom ka buoi pui hman ta nawh… Neihlupui (Gulthabi)

~ Thil mak deu pakhat chu May-June lai khan lum leiin imu ei khop nawa,tulai ruok hin chu imu in hnik talu leiin Imu ei khop nawk nawa, I don understand” Lalal (SuperIndt NSSU)

~Usss..bhai zani zantienga kan Moivie en kha chu a hall kha a fuok top..kan en pui hai kha ka hriet fu naw top tie….Oberoi Mall mew kha cha aw..Joe Songate (Sinlung Analyst)

~Mi pui hma a ei ngir chang hin tarmit(Spec) siem thra vet hi nghok a um ta em el ka ti leiin Spec flip-in flip –off chi ka awr thruoi el ani….Darthangluoi (Edlyn Papa)

~Tukum Sikpui Ruoi 2nd session a thrang chau ding ani,fresher’s Miss ni pal ka ti...Siemi (Miss Sinlung Extn)

THIL INHME HAI

$$ Jeru Lalnuntluong le naute zong malam a leng

$$ Lalliensung(TISS) le inkhom naw dan ding zong

$$ James Bossini le Tibur(tuibur) hmum

$$ Joy Rebecca le khop talu ang el a phing tuoi tuoi..

$$ Rody le Doll Inchu dinga mi fiel

$$ Stephan C Hmar le Tiffin Box

$$ Hau Joseph le “ A umna hriet lo “

$$ James Dais le a Bag pai

$$ Dr Kimi le “Edlyn in trin vat a nuoma “

$$ Rosiemlien(Gou) le vai film bie chur chur

$$ LRT le khuosawt

$$ Jacob le Solacid/Digene/ORS etc

$$ Nemzahat le Cigarette Paak

Mumbai Tuisunsuo 28-Jun-09 Vol 1 Issue 39

Mi Chanchin i Hril Nuom Chun

John K Dulian

Mi chanchin hril hih (mi um naw lai-a, lo dem-a, an chanchin ei hril chau ei-in huop tir), hnam dang lak a chu ei ni mi lai ( a nuhmei ni leh, a pasal ni leh) ei chieng bek bek in, ei thisen-a, a kawp am anih, ti thei hielin ei chieng. Chuong ani lei chun, a tha a thanawh chu ei ti thei nawh.

Mi chanchin hi ieng lei a ei hril am, mi ei dem hlak am ana, ei ti chun, asan tamtak um thei a tih. Chuong hai chu :

1. Mi tlingzo nawna/thratnawna annawleh an vagduoina ei zuk hril hin,a ruk-a hlimna ei dawng hlak lei ani thei.

2. Mi thratnawna, fel nawna, tlingzo nawna annawleh an vangduoina ei hril cha’ng hin ei hril hai leh ei zuk in tekhi chun, anni nek a ei that lemna, fel lem na, tlingzo lemna annawleh vangnei lemna amin hriet tir leiin, a ruk-a ei hlim lei khawm ani thei.

3. Mi chanchin, a bik-in chanchin thra bek lo, annawleh mawi bek lo ei hriet hin,ei chanchin hriet hai chung-ah le ala hre lo hai chunga power ei nei ei ring a, an chanchin hril lei a suksie thei tu ei in ring lei khawm ani thei.

4. Mi chanchin ei zuk hril annawleh le ei zuk dem chang hin, a hriltu le a ngaitu chu ei zuk in hnai sawt in, ei zuk in ruolthra sawt anga an lang lei khawm ani thei.

5. Mi chanchin ei zuk hril hin, ei lungsenna hai, mi ei hnamna hai, mi eiin hnarna hai a mi sukza’ng sawt ni a ei hriet lei khawm ani thei.

6. Mihriem ei ni lei hin, ei chanchin-hawda’k reng reng in,ei vervek reng reng a, thil thar, chanchin thar ei zuk hriet nuom / the dar noum lei reng reng khawm ani thei.

7. Mi chanchin ei hril lei hin, mi tamtak in dem an tri leiin, thil thranaw an thaw ding an thaw naw pha hlak ei ring lei khawm ani thei.

8. Threnkhat ruok chu, chanchin ei nga ve hrim hrim khawm a ni thei bawk.

9. A thren chu mi-in mi dem an tih/ka chanchin hril pal an tih, ti inlau lei a, midang chanchin-a, mani le mani intlan tum khawm ei ni thei bawk.

Nisienlakhawm, mi chanchin ei hril hma hin, hieng hai hi ngaituo ve hlak ei tieu.

I thu hril hi khel am anih, belchieng a bawl am?

Mi chanchin nangin khel i phuok fawm, i hril ani chun thil inzak um tak a nih, hrilnaw lak law a thra lem.Chun mi chanchin nangin i phuok fawm lo khawm, i lo hril sawng chu a pawi chuong nawh. Asan chu mi chanchin, mi dang phuok fawm, khel khawm lo ni sien, khel anni ti I ring naw chun, i lo hril sawng chu a pawi bek chuong nawh. Anachu, I thil hril ding hin, mi pawi a tawk nasa dinga i hrieta, khel le khel naw i hriet chieng si naw chun, thudik anni ngei anih, I hrietchieng phawt chu, I mawphurna anih.

Mi in ringzo taka an hril che am a nih?

Mi chanchin I hril tum chu, i hrietna pa/nu khan ringzotaka a hril che-a, midang kuoma hril naw rawh a ti sa sa-a, I hril chun, thil indik ani nawh. Sienkhawm, midang hril naw rawh, anlo ti chuong naw chun, I lo hril sawng ve chu a pawi nawh.

Thiltha am thilthalo a ra suok:

Mi chanchin I hril tum chuh,thil thra am, thil thanaw a chawk suok diem, ti hih mani le mani indawn a thra.Thilthranaw nekin thilthra suok lem a tih, ti I ring tlut chun,mi chanchin I hril chu a pawi nawh.Amiroukchu, I thil hril lei chauva nang I hlim le lawm ani chun,I thil hril khan, thilthra a chawksuok chu ring a um nawh.Asan chu, chanchin hril dar lei a lawm/hlim i na, i thil hril rasouk lei a hlim ruok chu in nawh. Chuong ang bawk chun,mi chanchin I hril leia thil thra nek a thilthalo a rasuok lem I ring chun topui tawk tawk a tha lem.

I hril/dem nu/pa nilo midang tading a natna a ni thei am:

Mi chanhin I hril tum chu khel le phuok fawm nilo, thu indik anih ti hriet a, I hril leia thil thra a suok ngei khawm I ring a, a hril/dem pa/nu khawm a pawi a ti nawh. Chu khawm chu lo ni reng sien, I thil hril chu a mawi le mawi lo, tul le tul lo, dawn chu thil pawimaw tak a nih. Asan chu, a chanchin I hril/dem pa/nu khan pawi lo ti naw ta reng sien khawm, a pawi ti le a sukna thei mi dang an lo um thei. Entirna in: Tv. A le Nk. B hin chanchin an lo nei tah a. Chu chanchin chu nang khawm-in I lo hriet ve a. Tv. A le Nk. B hai hin an chanchin hril hi pawi an ti bawk naw el thei, amiruokchu nang in hi hai chan chin I lo va hril dar lei khan(lungril thienghlim tak a I hril khawm lo ni sien), Nk. B a soung hai, roul le lain a hai ta ding in lawm um lo tak a lo ni ve thei bawk.

Leh khi ,a chunga ei ti tah ang khin, mi chanchin hril chuh, a tha, a tha nawh, ei ti thei naw lai zingin, a ngai thlatu hai khawm-in mawphurna ei nei ve. Mi-in, midang chanchin an hung hril che chun, i hriet char khan pawm nghal naw la, hnawl nghal bawk naw rawh. Thutak-a lak ding le ding naw chu damte’n lan ngaituo lem a tha.

Chun, dem-a i lo um ani khawm a, lawm naw la, lung sen el bawk naw rawh. Asan chu, an tluk naw lei che-a an dem che ani kha hre zing rawh, Oscar Wilde in a hril ang in “ Khawvela a pawi tak chu, ei chanchin mi hai in an hril nek in, an hril thak naw hi ani” ati kha hrezing rawh.

Khawhe! Ei hnam mizie ani ang bawk-in, mi chancin hei hril-in, hei in dem tak tak ei tih. Nisienlakhawm, nang a kuoma-ah mi chanchin hung hril-a, hung demtu chun, midang kuoma, i chanchin chu hril-in, va dem ve ngei ngei a ti che, ti hi hre zing roh.

CHANCHIN LAWRKHAWM

*Kikim chu hun iemani chen ei ni lai a hung um hnunngin, tarik 25 June 2009 khan Delhi tieng khawsakna/sinthawna thralem beisei in a lo liem tah.

*Welfare Secretaryy Stephan C Hmar chuh Staff Selection Commission hnuoi a Section Officer(S O Audit) chuh written hnesaw takin a tling.Tuhin interview hmasuon ding mek anih.MT chun,a suong bek bek el khela,interview khom tling ngei dingin a ditsak hle.

*Pastor nu Remthangmawi,karliem ta-a BP insang leia bawrsawm taka Pune tienga lo khawsa chu thrat tieng hun pan pei-in, M.Div khom thratakin a exam thei.Pastor Nu ei trongtraina ah hrie zawm pei ei tiu.

*Unaunu Zothansung chu inhluo ding thra le lien lem lo hmu in,Kalina sung vek,Kurla border tieng a lovin sawn tah.

*Unaunu Marisha Vanhlupui chu hun sawt tak Royal Carribbean Cruise Line a sinthaw-a,a zu thanghmang hnung in,tarik 22 June, 2009 khan Kolivery kotthler mi hrut pui ve dingin,Mumbai a hung tlung nawk tah.

*Tv Lalthuomluoi chu hun sawttak advertise shooting dinga Jaipur-a fe chu,hlawtling takin,tuta kar khan Kalina a hung chuong kai nawk tah.Jaipur-a shootingna report ngainuom hai chun le Bollywood tieng career inhnikna nei hai chun,Sinlung House Extn ah ieng tik lai khom pan thei zing anih.

*Pu Crusade Lalpiengfel, State bank of Patiala,Patiala(Punjab) hmuna sinthaw zing chu,Mumbai-a transfer a hmu leiin, June thla bul khan an sungkuo in,Mumbai tieng-a sinthaw le khawsa dingin an mi hung zawm ve tah.Ama hih nau pasalte 2 neiin,an sungkuo in Khargar(Navi Mumbai)ah an khawsa mek.Member ei pung pei leiin ei lawm hle.

TRONGBAUS

“MT Lenglai Gurup hlak hi a tu2 khom hung in kap kai tum ta lo hai...!Kho hei tam Veng la hang suok phot ka ta chu Ground floor a inthokin ka hip kai el rek ka tih.

Eli Khobung(Da Guardian)

“Veng I suoka I hmel ka hmel ka la hmu chieng thei naw!!!! A bang na gen hi….U Sepa...Gulit kha a dam pei am?.......... Rebek ()

“Tulai chu ka Street hawk thei ta naw….LOC ka lut hma sa hin chu No Way Out Ani Top..Casino attraction a hrat…..”

Hau Jousep (Wow Wow Jousep)

“Veng hang suok phot hai khan veng Kuva zahni(Rs200) man bek in hung phur a ngai ani aw….Kan figure hi en inla,capacity kan hau hle.Mumbai kuva ara a chang thei ema……..”

Olivia & Lalthazam(Da Queens of Pan)

“Bible in U nau hai in ngei diel diela um khom….ati ang bokin...Mumbai a chu U nau hai Card inhnel khom diel diel hi ava thlum in avan thaw chi de ti hi ka thupui ani tulai……..”

Lily Par (CEO Nunthieng PG )

“Joute attraction hi chu a hrat ning ati, ei Secy Pu mi hril hrep sien khom Joute zunzam ana, ama khom an kuoi top ve tho si, mi ati atia chu….”

Memory (PG Memory card)

“Mi hai chu foreign or Veng hang fang kuol hai sien khom kei ruok chu 24hrs suonga Baroda in fawr kuol hi ka chak pa tawp ani” Lalrameng CST Sundari Sis(Mis Around Baroda)

“Ka subject thruoi ding ka huphur taluoa ka khuo khom sot hman naw…” Lalrothang

“Salsa is equal to Casino Zatsawm”...

Rody (V2 Dance2)

Mumbai Tuisunsuo 21-Jun-09 Vol 1 Issue 38

IN BIEK-IN A FAI AM?

-Pastor Lalsiesang

Pathien in inni le Pathien thlarau nangniah a um ti in hriet naw am a ni ? Tukhawmin Pathien in chu a suk khawhlo chun Pathienin ama chu suk khawhlo veng a tih. Pathien in chu an tieng sih a, chu in chuh NANGNI in nih, 1Korinth, 3:16,17.

Korinth hi Asia minor, tuipui kama um sumdawngna hmun khawpui pawimawtak anih. Mi chi tum tum an uma, a tam lem hi sumdawng or sum zawng an nih. Hi khuoa hin Tirko Paulan Pathien thu hrilin kohran an hung um tranna. Kristien an hung ni hnung khawma, sum ngainatna a nasa a, chu chau chu niloin nundan mawilo tak tak, hieng inditna, nuhmei pasal thua zalen taka umin, nuhmei le nuhmei, pasal le pasal inditin, threnkhan chun an pa hai nuhmei chen an nei pek bawk. Zu le sa chena insukhlim an chinga, chu chau chu niloin, sakhuona tieng khawm nasatak an nih, trawng hrietloa trawng le sacrament Lalpa zan bu khawm inrui khawpa dawn hlak, hausa le rethei in tlirhranin . Chuong ang ringtu Kristien hai kuomah Tirko Paulan hi lekha hi a ziek anih.

Sakhuo hi indiklo taka invetpui thei ana, Pathien thil tum tak hreloa ringtu kristien nun khal thei a nih. Ni khat lai el khan, ka makpa, hotupa Lalrothang Tusing leh ei inkhawmna ding biek-in, Pathien ei biekna ding le Pathien le ei inpawlna ding zawngin, Kalina kawtthler mazu kawng ang ela bel a chun kan invaka. Biek in pathumlai kan en a, chu biek-in hai chu an in-angnaw thei hle. Pakhat chu a fai em ema, a fai chau niloin pheikhawk bunlut khawm phallo, thrungna khawm an daw naw a, ke tlepa a truonga inthrung ding a nih. Lalrothang kuoma “Hi takah hin chuh eini rawi chuh inkhawmpei naw mei nih, a hluo man boin mi pe hai sien khawm” ka tia. Hi taka ka thil hmu hin kum sawmneka tam liem taa, biek-in le inzawna Pathienthu keimaa hung tlung an min hriet suoktir nawk chu tie. Kum sawm lai liem taa khan, tuk khat chu zing trawngtrai dingin inhma deuin Biek-in ka pana, chuonglai chun sada (raja) ka hmuom hlaka. Biek-in ka zuk tlung chu tukhawm an lo um nawa, Biek-in sunga chun ka lut tleng peia, ka hang thrunga trawngtrai ka hang tum chuh, ka baua RAJA ka pei sak hmanlo chu ka hriet fuk ta leh. Inrang deuin ka thova tuola ka va pei saka, ka thrungna ngaibawka thrungin trawngtrai ka hang sun zawm tuma, ka lungrilin kei le kei kan sel tran taa. Iengleia biek-in tuola ka va peisak kher kher am ? Iengleia Biek-in sunga ka hmuom ngam nawh ? Ka hmuom ngam naw chau niloin a pei khawm ka pei sak ngam nawh. Kei bawk chun ka zawnna chu ka dawna. Biek-in chu Pathien chengna an leiin kan za a nih ka tia, chu phing chun; A chunga Pathien-thu khi fie deuin ka lungrila chun a hung inlang a. Pathienin A ma chengna dingin, suola thi ka ni lai zing a naupa Isu Krista thina le a thonawkna a a min din ka nizie le. Pathien’n thienghlim dinga a dit chu biek-in building niloin keima ngei hi ka nih ti a mi hung inhriettir ta a nih. Ringtu tamtak setanin a mi dawivet dan hreloa, Pathien le a ram ta ding niawmtaka thrahnemngai em em ei va tam awm de aw... Hmarhai, setanin a chin a lien a mi dawivetna pakhat chuh Pawl le Kohran thua hin a nih, mani pawl seng chuh Pathien phun Kohran anga ngaiin, pawl dang leh ei inse ek a. Biblein kohran a ti le ei nin Kohran ei ti hih an ang chie dim maw? Kohran ta ding tia ei thrahhemngaina hih, Pawl ta ding a ni lem el rawi mawh. Pawl hih kohran angin a min hmutira. Vairam khawpuiah Kristmas pha Santa Clouse’n Isu ai a aw angin. Hmar lai chuh Pawl hin Kohran ai a aw nisien a hawi. Ei pawl hming tawpa C (Church) a um phawt chun ei lung a awi em ema, chuonghai chuh kohran indiktak anga ngaiin ngaimuong deuin ei pawm thei. Kohran indiktak chu Isu thisen zara chatuon hringna changdinga, Pathienin ama ta dinga a ko suok hai hi an nih. Ka hril nuom ka pehel ta chu tie. Biek-in bawka hang lut nawk ei tih. Biekin building ropui le nal ah Pathien a cheng nuom deu dinga ei ngai am ani ding. Biek-in building ropui le nalin ei in el a. Ei biekin building haihi ieng angin lienin, nalin, ropuiin, fai sienkhawm, ei ni (Ei nunPathien chengna) hi ei fai/thienghlim sinaw chun Pathien thlarau thienghlim chenchilin um theinaw mei nih. Biek-in building hi a khatin a ropuiin a tienghlim thei nawa,a sung a chenghai ropuina le thienghlimna leiin a ropuiin a thienghlim thei ve chau a nih. Biek-in building lien ropui le fai a thrat laizingin, chuneka thra le Pathienin a dit chuh; nun thienghlim hi a nih. Kei a angbawka, Biek-in sunga sada hmuom ngamlo, biek-in building puoa hmuom ngamtu chuh mani le mani inhlem ei nih. Rawngbawltu khawm Biekin thienghlim thu sermona, thienghlim dinga Pathienin a dit vawng thienghlimlo tu chu a ma le a ma an hlem anih. Biekin building le einun hi Pathienin ieng lem am ngaipawimaw lem a ta ? Biek-in sunga sada ei hmuom nuomnawa, puotienga ei hmuom hi Lalpan iengtinnam mi ngai a ta ? Biek-in sunga chuh nungchang mawi em em, puotienga nung chang mawilo taka ei um hi Lalpa a lawm ding? Biekin sunga chuh zu dawn le inrui nuomloa, puotienga dawna ei inrui hin, Pathienin Biek-in inzaah mi ngai a ti ? Ei hril nuomtak chu zu an nawa, sada khawm anbawk nawh. Pathien biek-in inza thu ani lem. Ei inza em em le, a tu tu khawma fai taka chei ei tum Biek-in chuh khawlam a um a? Biek-in chu iem a na ?

Pathien in inni le Pathien thlarau nangniah a um ti in hriet naw am a ni ? Tukhawmin Pathien in chu a suk khawhlo chun Pathienin ama chu suk khawhlo veng a tih. Pathien in chu an tieng sih a, chu in chuh NANGNI in nih, 1Korinth, 3:16,17. Ei ni ngei hi Lalpa chengna chu ei nih. Hmar Christian Fellowship Mumbai hai, In Biek-in a fai am?

CHANCHIN LAWRKHAWM

~ Joseph Joute le Judith Joute hai chuongchen Rengkhawpuia an u pa Lungdaw hawngna prokram hmang malam le chawl hadam met dinga hang fe khawm an thaw trul hai po thaw zovin Zirtawpni tarik 19^th June 09:45pm khan an Run lum Kalina,Amchi Mumbai dambtakin an hung tlung nawk tah.Vengtieng News/Happenings deu hai hre nuom chun an ni kola ngaiven thei anih.

~ Sr. Membhai Marcbhai(Marka tia ei hriet lar) a unauhai Lalringsan le Lyda Lalneihlu hai khom chawl hmang dingin Delhi a inthokin zani khan Amchi Mumbai an hung intawl lut ve tah. Ani pahni hin ei MT Editorpa (Sr.Membhai ) run luma innghat ani.

~ Laldomsang, Debory le Ruthi Joute hai Vashi (James Dais in Lalna ram tia ei hrietlar)anthokin Nk.Gladys Sanate hai PG,Kalina an hung insawn lut ve thung.

~ Pastor Lalsiesang in HCFM le MHWA thruoituhai Tv John Dulian inah an pawlpui. Hi huna hin member fe khawm hai po po in tawngtai pe tuona le Pathien thua inpawl tlangna nei ani. Huna tawpna taka Pastor Siesang in athei tawpa abuotsei Ruoi kil tlangna neiin hun khar ani.Prokram hi ditkhawp lo deua hmang ni sien khawm,ching rawp chi ni in an lang.

~ Ei MHWA Secy Pu Stephan C.Hmar khawm Churchgate Income-Tax Office a inthokin a hnai lem deu BKC I-T Office a transfer anih.

TRONGBAUS

“Mumbai chu ei hung intawl lut rek phat chu ana,Kalina abiekin Kolivery Nunghak hai kha aw lo in ring ro...Zan sawt le sawt naw’n rorel naw’ng ei ti”.....

Tv.Lalringsan (Da Holiday Man)

”Samson ti um zie chu Hairstyle chi dang dang nei tina anih....

Tv.James Lalkhumsang(Kalina Samson)

“ Mumbai a hin um zing ka nuom si,ana chu a expensive si kan pa sawl taluo ding kan lau bawk,mi Ngal hmul pawtin kan hlaw top ani....Ngalhmul hau met hai khan mi hung kontek thei zing inti.”

Ms.Rohlupui (Old Sundari) CST Rd.

Zan khata kan va Disco na, Juhu kha chu an hoi taluoa, Vanram tlafuol ani top...Sinlung Disco kha chu nep te ani......Disco Disco ei ti ran el anih....

Ms.Rothangmawi (Misco)

“ Kan pa transfer hi chu a Office hnai lem ni sien khawm ka ta ding chun “Kar lam a hla” ani dei....fone man hek hle’ng ati...Kan Dawr khom hi BKC a um ve’ng atim aw?? .. ..”

Pi. Joyce

“ Tlangval (Marcbhai)ministry a thruoi hi chu anthaw chi khop el..Nunghak ina bu fakna ding a tam....”

Pastorpa